A misi mai le Tanifa Samoa, ae tulai mai le Black Sox e pine auro i le The Tradestaff ISF Men’s World Softball Championships 2013, o le ‘au softball a Niu Sila ua manumalo i le taamilosaga, o le atunuu ua fai nei ma aiga lua o tagata Samoa ma le Pasifika o nonofo i Aotearoa.
E sefulu aso na faagasolo ai le sailiga siamupini o le taamilosaga Softball a le lalolagi le World Softball Championship New Zealand 2013 lea sa faamae‘a i le faaiuga o le vaiaso, e pei ona fai mai i Niu Sila nei.
O le taamilosaga foi lea na malaga ma auai ai le ‘au Softball mai si o tatou atunuu o Samoa, le Tanifa Samoa, e saili siamupini ma nisi o ‘au a atunuu tetele o le lalolagi e sefuluono. E ui ina lē manuia le taumafai a si a tatou ‘au mo le ipu autu o le taamilosaga, peitai ua maualuga le siitia o le taalo a le Tanifa Samoa, ma agiagia ai le tagāvai o le tatou malo o Samoa, ina ua sao i le quarter final.
E lē ni atunuu laiti sa auai i le taamilosaga, o atunuu tetele a faatusa i ai Samoa e lē mafaitaulia sona tamaoaiga i atunuu tetele nei o le lalolagi, e aofia ai ma Niu Sila. Peitai o le mau e talasua ai le tupulaga, e masani ai, ‘e laititi lava ae maini’. I le amataga o le taamilosaga, e tolu taaloga sosoo a Samoa na manumalo ai i le vaiaso muamua o le sailiga siamupini o le taaloga Softball a le lalolagi.
O le taaloga ma Peretania 0 vs 2 Samoa, sosoo ai lea ma le fetauiga ma le ‘au a Amerika 2 vs 3 Samoa, taaloga lona tolu o Indonesia 10 vs 11 Samoa ma le taaloga lona fā, o le va lea ma le ‘au a Venezuela 4 vs 3 Samoa. O le taaloga lea sa faamoemoe a manumalo ai, o le a see sa‘o loa le Tanifa Samoa i le quarter final, peitai o lea sa malolo ai.
Faagasolo pea lea o le taamilosaga, na o le malolo lava o si a tatou ‘au, e fai lava si faigata ma malolosi le taaalo a ‘au uma o le taamilosaga. Manatua foi, o atunuu tetele nei, e mātele le latou foi taalo i taaloga faapenei e iai le Softball, kilikiti faapalagi, o le lakapi faa-Amerika ma le anoanoai o nisi taaloga e seāseā lava a maua mai ai se tatou autaalo faavaomalo.
O tatou tagata Pasifika, e masani tele i le lakapi iuni, lakapi liki, ae faafetai ua sao mai se ‘au Softball e ave fu‘a mo atumotu laiti o le Pasifika, le tatou ‘au mai Samoa, le Tanifa Samoa, se‘i vaganā ai le Black Sox mai Niu Sila.
Aso lona lima o le taamilosaga na malolo ai Samoa i le la taaloga ma le ‘au mai Czech Republic 6 vs 2 Samoa. Poo le ā le malosi o le ‘au a Ausetalia e tasi lava le ‘ai na manumalo ai i le Tanifa Samoa, ma e tusa lava pe malolo Samoa, e lē ni ‘ai se tele na manumalo ai Ausetalia 3 vs 2 Samoa.
O Aferika o le atunuu telē e fefefe ai turisi e asiasi i le feai o a latou manu o le vao e faatataa solo, peitai na leai se feai, ina ua faamo‘amo‘a lelei e le feai o le Tanifa Samoa, i le la fetauiga i le aso lona fitu o le taamilosaga ma manumalo ai Samoa 8 vs 0 Aferika i Saute, ma sao atu ai loa Samoa i le quarter final.
E lei manuia ma faia‘ina le taaloga o le quarter final a Samoa na taaalo ai ma Iapani, manumalo Iapani i ‘ai 4 i le 2 a Samoa. E ui ina lē au le taumafai a le Tanifa Samoa mo le ipu autu o le lalolagi, peitai ua maualuga le tulaga o loo iai i le aotelega o ‘au taitasi o le taamilosaga, pei ona silafia o Samoa sa iai i le Pool A o le World Softball Championship NZ 2013.
O le Pool A sa iai faatasi ma ‘au a Ausetalia, Venezuela, Amerika, Peretania, Aferika i Saute, Czech Republic ma Indonesia. Peitai i le mae‘a o le taamilosaga, o loo tulaga tolu Samoa i le faasologa o ‘au a le Pool A, fitu taaloga, fā manumalo, tolu faia‘ina. E lē ma‘i le finau a le Tanifa ma le taaalo malosi o si a tatou ‘au.
Pei ona silafia, o le Black Sox mai Niu Sila ua manumalo ma pine auro nei i lenei taamilosaga Softball a le lalolagi 2013, suipi faalelei lava ia Venezuela, ma manumalo ai i ‘ai e fā Niu Sila i le tasi a Venezuela ma faamae‘a ai foi ma lenei taamilosaga i le 2013.
O le faaono ai lea ona manumalo o le Black Sox i le ipu o le lalolagi, mai le 1976, 1984, 1996, 2000, 2004 ma 2013.
