O le Aso Faraile na tea nei na feiloai atu ai le aulakapi a le Samoa-A i le Aoga Maualuga a le James Meehan High i Macquarie Fields. O lenei aoga e pei ona faailoa e le susuga Fou Atonio e tusa ma le 40% o tamaiti aoga e tupuga mai Samoa ma le Pasefika.
O le mafuaaga lea o le manao o le tamaitai Pule ia Mrs Gayle Taylor ma le alii pule lagolago ia Kurt Wascowicz e maua se feiloaiga na faailoa i ai e le faiaoga ia Fou Atonio. E ui o le laiitiiti o le taimi na iai le au i Sini ae na tapena e le Afioga Leilua Uesele o le leitio Samoa Sportstar lea manaoga na masii atu ai le Manu.
Na faafeiloai e le aoga tama taaalo ma le pulega i se patipati tele. Na maimoa foi sui o le au i le “Pasefika Corner” lea ua fausia faapitoa ai le ‘umu’ o nofoa ma laulau i fafo i le tulimanu e faia ai mafutaga ma fono a mātua ma Faiaoga faapea le fanau. E tusa ma le to‘a limaselau le aofia na potopoto e aofia ai mātua, faiaoga ma tamaiti o James Meehan.
Na malomaloā le feei ma le pati a le aumaimoa ina ua tolaulau igoa o le pulega ma le Samoa-A lea na muamua ai lava le afioga i le Faiaoga Muliagatele Brian Lima. Na sosoo ai ma le alii faiaoga o le Manu Samoa ia Masoe Stephen Betham lea e faufautua nei i le Samoa-A.
Na faatoa silasila ai foi lea o le fanau ma mātua i le susuga Mailo Potu Leavasa le faiaoga lagolago, Maselino Paulino le kapeteni, Uale Ma‘i le sui logologoā o le taitoafitu aemaise le sui o Samoa i le Olimipeka lea ua iai i le ‘au, Susuga Kaino Thompsen Fuataga.
O le fanau aoga lava na saunoa i le lauga faafeiloai ma le Siva Tau na faia i luma o le Samoa-A. O le taitai Malaga ia Siiliili Isaia Lameko na saunoa muamua e momoli le faafetai i le aofia faapea le aoga a James Meehan.
Na faailoa foi e Lameko le tāua o le Faaaloalo, Faamaoni, Finau ma le Fealofani i totonu o le aulakapi a le atunuu ma o se fautuaga e aoga foi i le fanau i taimi o aoga ma taaloga. Na sosoo ai ma le saunoaga a le faiaoga o le Manu Samoa ia Masoe Stephen Betham e uiga i le finau o le Manu Samoa e ui i le utiuti o avanoa ma le taimi.
“O le Manu Samoa e faigata tele le tuufaatasiga auā e piki mai tama taaalo i atunuu eseese o loo taaalo ai. O le tausaga na tea nei e tasi le vaiaso na matou faatasi ai ae taaalo ma Kanata lea na manumalo ai Samoa. O le vaiaso lona lua na manumalo mataina ai ia Uelese e ui sa tatau foi ona manumalo ia Farani i le taaloga faaiu auā e lua sikoa a le Manu i le tasi a Farani.” o le saunoaga lea a Masoe.
Na mavae foe i se siva puupuu na faaali ai taleni a sui o le aulakapi lea na taliē ma patipati ai le aumaimoa i le lelei o Siva a tama. I fesili ma tali na mafuli lava i le pue malosi a Muliagatele Brian Lima auā sa fia manino le fanau pe aisea ma faapefea ona malosi ai lona tauau.
“I aso faatoa lima o‘u tausaga sa amata ona matou taaalo ma isi tamaiti ma na amata mai lava i lena taimi seia oo mai lava ua matua e saili lava poo ai e aupito malosi lana pue.” Na taualuga lenei mafutaga fiafia i le saunoa o le tamaitai Pule ia Mrs Gayle Taylor: “O le Samoa-A ma sui o le Manu Samoa ua avea ma faamalosiau i le fanau, e le gata o tamaiti Samoa ma le Pasefika o James Meehan ae faapea foi i tamaiti Ausetalia.”
“Ua faailoa i uiga o le Manu Samoa le tausaafia ma le pulea ma o se aulakapi faapolofesa ua moni ai le upu e ui ina vaivai faaletamaoaiga ae lē tuu ai le finau ma tausinio mo ona tagata o le mafuaaga lea o lona lauiloa i le lalolagi atoa, ma e faafetai tele atu ai mo lo outou afifio mai.”
E atoa le itula o saini ma pue ata o le aulakapi ma le mamalu o faiaoga, mātua ma tamaiti e pei ona tumutumu ai foi le mamalu o le atunuu. Na taualuga i se taumafataga mamafa na saunia e mātua na fai ai se faamalositino a sui o le ‘au ma nai mātua. Na taualuga i le lauga faafetai a le sui o mātua ia Papalii Tumatavai e momoli le agaga mitamita ma le faafetai i le Samoa-A mo la latou tiute tautua atunuu i taimi faapenei i tua o le malae.
Na feofoai foi nai meaalofa laiti mo le malaga ma ofo foi se foai faatauvaa a le Aulakapi mo le aoga ma faamavae ai auā koleniga o le Afiafi.
Sa momoli foi le faafetai ia Fou Atonio, o le susuga i le avepasi ia Masoe Tau Oeti aemaise le Patu Medics, Samoa Sportstar Radio, Taulaga Recycling, Sydney Samoa Media, Polynesian Umu Cooker ma le paia ma le mamalu o mātua.
