E faalupe tina o le pae ma le auli i totonu o se aiga, nuu ma le Ekalesia, o le tina lelei foi e sili lona tau i penina. O le maualuga ma le tāua o le Aso Sa o Tina o le avea o latou ma avefeau ma molimau ola i agaga o tama ma le fanau e ala i le upu a le Atua ma aitema faatino.
O le vaaiga eseese sa iai malumalu i le Aso Sa ua mavae, na molimauina ai le tāua o le pitolaau ma le matafaioi o tina i totonu o aiga aemaise o le galuega a le Atua.
O le faatinoina o polokalame i lea aso sa faatautaia uma e tina, e leai se leo o tamā na o le tapuai lava ma faafofoga i molimau.
O le taitaiina o le sauniga, faitauina o le Tusi Paia, aoina o le taulaga ma le folafolaina o le upu a le Atua o tina uma lava sa faia lea galuega.
O totonu o nisi o Ekalesia sa su‘i fefiloi ai le faafofoga a nai tamā i le mālie o molimau a tina i le mafutaga i totonu o aiga, ua faailoa ai le lē lava onosai o tamā pe a umi ona alu ese le tina ma le aiga.
Molimau ai se taeao fou i le ala ae ua leva ona pakeko le toeaina i tua o le ogaumu ma le fanau, ma le loto naunau maimau e, pe ana faapea aso uma o lona olaga. A o nisi falesa na vaaia ai lomata mailgi o nisi o tamā ona ua leai se tina, ua valavala ona ua fai i lagi le folauga.
O molimau tau molimoli a tina na faatāua ai le tiute o le tina e tatau ona faia i le la mafutaga ma lona toalua ma le va ma isi tagata o le saili i le loto maualalo e maua ai malo, ma le faalagolago i le Atua e mafaia ai mea uma.
O le tele foi o Ekalesia ua ave lava le faamuamua ia tina i mea uma e fai, aemaise lava le taimi o le toonai e laulau uma e tamā ma le fanau meaai ae na o le faasasa‘o lava o le loomatua i lona nofoa vaevaeloloa.
O le aso foi ua luuluu ula lole ai le ua o le loomatua ma tali manuia e ala i meaalofa a le fanau ma le tamā sa foaiina mo i latou.
