E faatalofa atu Samoa i lenei foi vaiaso aemaise o galuega o loo feagai ai. Le paia maualuga i ou tulaga faalupe o le a le toe oo i ai se faamatalaga, ae tau ia ina ou faapea atu faamalo le folau, malo foi le soifua manuia. E fiafia lava e faafeiloai atu i le mamalu tele o le aufaitau ae tainane o paaga masani o le Samoa Times, ae alo maia o le a sei taumafai atu se lagona aua foi lenei vaiaso ma le faasoa atu.
Ua manatu e faaulutala se lagona e faapea, “Aua le fefe, ae toe timata le upega”. O le a faapito se talanoa atu i le tulaga o loo iai nei le toatele o le mamalu o si o tatou atunuu o loo faapea ona ova aso i totonu o Niu Sila. Ia vaimalu i finagalo se afe atu o se faamatalaga i le itu lea, ae ua lagona lava le faatauaina o le faatupu manatu.
O le ala lea ua lototele ai e tufatufa atu ma le manatu maualuga o le a iai se aoga o le Peni a le Tusitala i nisi o loo aafia i le va lea.
E malamalama lelei le Tusitala i le agaga saili malo ma le naunau o nai o tatou tagata i le taumafaiga aua le atinaeina o aiga. I lea lava agaga ua mafua ai ona autovaa mai i Niu Sila ma le faamoemoe ina ia saili ai le tali o nei manaoga. Paga lea le naunautai ina ia fulifao le vaa o manu ae faaae le vaa o mala, aua e lapelapea i le tele ma le anoanoai o tulafono ina ia maualafia ai ona tino mai le naunautai. O ia tulafono ua fai lea ma pa pupuni ua punitia ai le vaai atu i le manuia lautele aua e tatau lava ona tausisia auala uma e tusa ai ma le tulafono.
Talofa Samoa e, e moni o le toatele o tatou ua fai lava Niu Sila ma nuu ma aiga moni aua ua uma ona fai pepa nofomau ma sitiseni. Peitai o le faigata o le tulafono tau femalagaaiga ua pumoomoo ma aunoa ai se avanoa mo nisi. O le fesili o le a faapefea la i latou ia? Ua manatu le Tusitala e lelei pe a tuualalo atu faapea. Pe faamata ea o le iuga lea o le faamoemoe mo se lumanai lelei pe afai ua le mafai ona fai se nofomau? Ae o fea o taoto ai le saolotoga e tupu ai le olioli pe afai ua taomia le naunau ina ia nofomau ma saili manuia i lenei atunuu?
E iai le lagona e lelei ia i latou o loo ova aso ona toe silasila i se isi itu aua lava le tino mai o moemitiga mo ni lumanai lelei o aiga. O le upu e masani ai Samoa, “E fai foi o lena a o lenei”. A oo ina aafia nai o tatou tagata ona o le ova o aso, e oo ifo i lota loto le alofa, aua e logo i tino logo i toto le mafutaga o le Samoa i le Samoa. E mafua ai ona augofie e faatupu manatu atu. Ua faafofoga tagata uma i le saunoaga a le Minisita o Femalagaiga ma ua aumai ai le tali o le a le tuuina mai se avanoa mo se isi faamanuiaga e faanofomau ai i latou o loo ova aso. I le vaiaso na tuanai atu nei lea sa malaga ai i Samoa le Palemia o John Key na ia toe saunoa ai foi i le tala lava lea e tasi. E le o iai se manatu o lana faigamalo e faia se tulaga lea.
O afea la o le a maua ai se avanoa mo i latou o loo nonofo faasolitulafono? O le uiga lea o le Peni a le Tusitala i lenei vaiaso. “Aua le fefe, ae toe timata le upega”. E iai lava le talitonuga afai lava ua leai se isi auala e mafai ona toe faaleleia ai le pemita e nofo ai i lenei atunuu, pe le sili ea ona toe foi i Samoa e toe afuafua ai ni isi fuafuaga aua lava le manuia o aiga? O le luitau, se a le aoga o le nofo ai pea faasolitulafono i Niu Sila ae le o iai se saolotoga? E fealuai ae atu le loto i nei tei ua ta‘u e se isi. E nofo ae le manofo i nei tei ua maua e se leoleo. Ae le faitaulia ai le mai faafuasei ona pologa lea e tau totogi le pili a le falemai. O le upu moni e matua leai lava se saolotoga ma mamao ai lava ma le fiafia sa tatau ona maua e le tagata soifua.
O le lelei o le toe foi i Samoa, e maua ai mea uma e aunoa ma le atu pe pologa foi le mafaufau. E fiafia i taimi uma aua o loo iai aiga. E saoloto i soo se mea aua e fiafia ma olioli e aunoa ma ni pa pupuni e taotaomia ai lea saolotoga. O le lelei foi o le toe foi i Samoa e toe faataoto lelei ai se isi amataga fou aua lava le saili manuia.
O le mea lea Samoa, aua le fefe, ae toe timata le upega. Aua le fefe i tala a tagata ma ni mea e ono tutupu mai pe a toe foi i Samoa, ae timata le upega e ala lea i le faia o le faaiuga ma le filifiliga sao.
Taula i le Atua le faatuatuaga e Nate le tuulafoaiina i tatou i soo se aso ma soo se taimi, o Ia foi e fesoasoani mai i manatu lelei e mafai ai ona toe faataatia se isi ala fou e tau atu i manaoga aua le manuia o aiga. Mo le tupulaga o loo nofo solitulafono i Niu Sila e aunoa ma ni mafuaaga tatau, o le manatu o le Tusitala e sili le toe mafaufau lelei, aua o loo iai le avanoa tele e mafai ai ona taumafai mai i le sei i Samoa, nai lo le nofo ma amo le pologa i lenei atunuu e aunoa ma se fiafia e maua.
Ia agalelei atu le Atua Samoa aemaise lava i latou o loo aafia i le ova o aso i inei. Ia faamanuia foi le Alii i lenei vaiaso Samoa i galuega o loo feagai ai, atoa ai ma alofaaga molioo a le Samoa Times i tuaa matutua aemaise o soo se Samoa i Aotearoa, ma le aufaigaluega paia a le Atua o loo nonoina manuia aua nei ma a taeao.
Soifua ma ia manuia, ae tatou te toe feiloai pea.
