Na vave ona tapē e le alo o Samoa, Joseph Parker, le uaea ola o le TV a le alii fusu o Bowie Tupou i le taamilosaga muamua o le la fusuaga lea sa faataunuuina i le ILT Stadium Southland i Invercargill i le po o le Aso Toonai ua mavae.
Sa leai se manatu o le autapuai o le faatafa lea a Bowie Tupou e tatau ona faō ai, pe a fua i le saoasaoa ma le vavave mai o ana so‘a tasi lua, tasi lua i le amataga. Ae ua faateia le toatele ina ua see le taumatau o Laauli i le taliga o lana paga ma pa‘ū faō ifo ai i lalo le alii Tonga.
E lē o manino lelei foi poo le ā le ituaiga lavea na oti ai Bowie, poo le ogalima o Parker poo le saviligia o mea faipele i taliga na mafua ai ona tau se‘i i fafo le mouthcard mai lona fofoga.
O loo paso pea le toatele o le aumaimoa a o toe faaemoemo mai pea lea vaaiga i le televise, auā e toatele o loo molimau, e lei taatia lelei se faalava poo se tu‘i malosi a Parker ia Bowie, ae ua faateia uma le maimoa i le palasi ifo o Bowie ma faō ai lava ua lē toe tu i luga.
O nisi o alaleo faasalalau a o talanoaina ai foi lenei fusuaga, ua faapea mai o se tu‘i faavavega (miracle punch). O nisi e manatu, e moni lava i le tiotio o le alii Tonga i le amataga o le taamilosaga, ae atonu ua ia tau lagona ua amata ona malosi mai le sau a Parker, sue ai loa iina sina avanoa lava e pa‘i atu ai Parker ae se‘i faapa‘ū ai loa i lalo ma faamuta ai le fusuaga.
Ua sa‘o ai le upu, ua manao i ai le tino ae o le manava ua mole mai. Auā pe ā na o le 46 sekone o le taamilosaga muamua ae faafuasei loa ona pē le TV a lea uso ma lē mafai ai ona toe faaauauina le taaloga.
O nisi faasoa i luga o leitio e tau agai foi manatu, pe lei muai faapolokalameina foi le faiga o lenei taaloga, peitai e oo mai le taimi nei, o loo tumau pea le faaiuga, na faamuta le taaloga i le tu‘ioti i le alii o Bowie.
Ia poo le ā lava le mea tonu na tupu i si alii, pe na taugā se vaega o lona ao na taia e Parker ma pa‘ū ifo ai, poo le mea na faapa‘ū lava ia, ae tasi le mea ua mautinoa, na toe agiagia ai foi le tagavai a Samoa i lea afiafi ina ua mae‘a le taaloga manumalo a le alo o le atunuu.
Mo le aumaimoa lava latou, e lagona le faameo ona pei e lei lava le taimi e maimoa ai ma molimauina se taaloga matagofie mo ni taamilosaga se tele. Atonu ua lē sikuea tau o tickets sa totogi, aemaise foi nisi na totogi faapitoa lava le Sky tau o lena afiafi mo le maimoaina o le fusuaga lenei ua leva ona feaveai ai tala, ae o lea ua vave ona faamuta e le tu‘i see a Parker le tafitifiti a si ana paga.
O Laauli Joseph Parker lea o loo numera 8 i le faagasologa o tama fusu o le WBO ae lona 13 ai Bowie Tupou.
O Laauli Lupesoliai Joseph Paker ua 14 manumalo, leai se faia‘ina, ae 12 tu‘ioti, ae o Bowie Tupou ua 25 manumalo 3 faia‘ina. Ua maitauina e le lalolagi i le taimi nei ua fai si faigata ona toe faagasegase mai le mafaufau o Parker pea fua i ai i le tulaga maualuga ua oo i ai lana fusu, ae o le tele foi o ana taaloga e manumalo lava i le tu‘ioti.
Ia talosia ia le taumafai o lenei alo o le atunuu, ia aveaveai lona malosi, ma faataunuuina ana moemitiga o loo tulimatai pea i ai lona soifua taalo i lenei foi faagatama o faipelega.
