Ua pasia e le Senate tofiga a le afioga i le alii Kovana ia Lolo Matalasi Moliga, mo le tofa a Tunupopo Alalafaga ma le tamaitai loia ia Gwen Tauiliili-Langkilde e avea ma Faamasino o le vaega o faamasinoga i le palota e tai 14-0, ma o le Aso Faraile, 16 Ianuari na faalauiloa mai ai lena faaiuga.
O le tofa a Tunupopo o le a avea ma Faamasino Lagolago i le faamasinoga maualuga ae o Tauiliili-Langkilde o le a avea ma Faamasino Fesoasoani, i faamasinoga itumalo. I lalo o le Faavae a Amerika Samoa, e na o le Senate e faamaoniaina tofiga o faamasino o le faamasinoga a Amerika Samoa.
A o lei faamaonia e le Senate tofiga a le Kovana mo Tunupopo ma Tauiliili-Langkilde, na muai faia se iloiloga na faatautaia e le Komiti o Faamasinoga a le maota, e fesiligia ai agavaa o i laua nei ua tofia, ae avatu ai foi ma fautuaga a tamā o le atunuu i le auala e faatino ai le galuega.
O le toatele o afioga i alii senatoa na maua le avanoa e tulei saunoa ai, sa latou ta‘ua le ova o agavaa o Tunupopo ma Tauiliili-Langkilde e faatino ai le galuega. Sa latou faafetaia foi le alii Kovana i le tofiaina o i laua e galulue i lenei galuega.
Saunoa le afioga i le alii senatoa ia Uti Petelo ia Tauiliili-Langkilde e faapea, ua matuā manaomia e le faamasinoga ni faamasino e toa o latou loto i le faia o faaiuga, aemaise lava i mataupu ia ua vaaia le saoasaoa i le taimi nei e aofia ai ma fualaau faasāina, ae na ta‘ua e Tuiasina S. Esera ma le alii perestene ia Gaoteote Palaie Tofau ia Tunupopo ma Tauiliili-Langkilde, “o lupe faalele a le atunuu ua lava le tomai ma le agavaa e tautua ai Amerika Samoa”.
Na fesili le sui peresetene ia Nuanuaolefeagaiga S. Nua ia Tauiliili-Langkilde po ua talia le galuega, na tali le tamaitai faamasino ioe, ae na toe saunoa Gaoteote e faapea, “e lē tāua le fesili pe ua talia le galuega, ae tāua le fesili, po ua sauni e faatino tiute i le galuega”.
O le auala na faaaogā ai e le tamaitai faamasino le gagana Samoa e faatulima ai i le mamalu o le komiti i le amataga o le iloiloga, na mafua ai ona saunoa Gaoteote e faafetaia lona faatāuaina o le gagana a le atunuu.
Saunoa le alii peresetene e faapea o le toatele o fanau a le atunuu ua foi mai i aoaoga i fafo, ua latou lē toe tautala i le gagana Samoa, peitai o le tāua o le gagana Samoa i le galuega faafaamasino, e fesoasoani ai foi i tamā ma tina matutua e lē malamalama i le gagana faaperetania e pei ona saunoa Gaoteote.
Na faaiu fautuaga a le maota i lo latou fautuaina lea o faamasino tofia ina ia fai faaiuga ma le alofa i le atunuu, faamuamua le Atua ma tausisi i le tulafono. O le tofa Tunupopo lea ua tofia e sui tulaga i le afioga i le alii faamasino ia Logoai Siaki na malolo litaea i le aso 2 Ianuari 2015.
E silia i le 20 tausaga na galue ai Tunupopo i le Ofisa o Aoga o se faiaoga, e lē gata i aoga maualalo ae faapea foi i aoga maualuluga, sa galue foi o ia i le Ofisa o Mataupu Tau Samoa. O le tausaga e 2012 na avea ai o ia ma matai i lona aiga, o ia foi o le taitaifono o le Ekalesia EFKAS i Nua ma Seetaga.
O Tauiliili-Langkilde, o se tamaitai e iai lona tusi loia i Hawaii ma Amerika Samoa nei, e tele ofisa o le malo sa galue ai o ia, e aofia ai le ASPA ma le ASTCA. E tofia o ia o loo galue i lona lava ofisa loia. O ia e toatolu i ai Faamasino Fesoasoani o le faamasinoga, lea e aofia ai Roy J.D Hall Jr ma Fiti Sunia.
Toe lomia i le faatagaga a le SamoaNews
1
