Ua mae‘a le tauvaga taualoa o le sailiga o le Tausala o le Pasefika mo lenei tausaga lea na faatautaia i le Atu Kuki. O lenei tauvaga na vaaia ai le maoae o taumafaiga a tamaitai e toavalu ia na tauva i lea tauvaga.
O le uluai taimi lenei talu ona faavae mai le tauvaga o le Tausala o le Pasefika i le tausaga e 1986 ua manumalo ai se tausala mai Papua Niu Kini, le tamaitai ia Abigale Havora i lea tausinioga.
O le tausala o Samoa lea na tulaga lua ma e toatele lava foi na manatu sa tatau lava ona sola ma le sui o Samoa lenei tausinioga tele ona o le manumalo i le faatalatalanoaga aemaise o ana folasagauma na manumalo ai, ae ua faaalia le faafetai o lea tamaitai i le tausinioga ma faamanuiaga ua agai i le tamaitai Papua Niu Kini i ana foi taumafaiga.
E valu ni vaega lautogia o le tauvaga, o le sarong le ie sulu, o le laei o lou atunuu, o le taleni, taligafesili, o le tausala o loo ua palota ai tagata tafafao maimoa mai fafo, o le tausala tausaafia ona uiga, o lē ua tele i ai le palota a tagata i luga o upega tafailagi faapea le tausala aupito i aulelei.
Na vaaia le maoae o taumafaiga ai latou taitoatasi i vaega na togi i ai lea tauvaga. Mo le tausala o Samoa lava ia Ariana Taufao na manumalo i taligafesili ina ua fesiligia o ia i itu tau siosiomaga.
O le tausala mai Amerika Samoa, Suluga Talofaalii Taliau na manumalo i le tausala tausaafia ma lē ua palota i ai tagata tafafao mai fafo. O le laei faaleatunuu na manumalo ai Zaira Begg le tausala o Fiti. O Britanne Fuimaono le tausala o Tonga na manumalo i le tausala aupito i aulelei ma le tausala e toatele tagata e palota i ai i luga o upega tafailagi.
Mo Abigale Havora o se matatia ua ia faatuina mo lona atunuu le avea ai o ia ma uluai Tausala o Papua Niu Kini ua pale mai i nei tauvaga. Tulaga lua le tausala o Samoa, tulaga tolu le tausala o Tonga, tulaga fā le tausalamai o Fiti, ma le tulaga lima o le tausala o Solomona.
O le tasi foi lenei o mataupu sa tele ina laga i le tauvaga lenei i tausaga ua mavae ona o le itu lea o le toatele lava o tamaitai e manumalo ai, o tamaitai o le Atu Polenisia, a lē o Samoa, o Amerika Samoa, o Tonga, Niu Sila, poo le Atu Kuki, ae o tamaitai o le Atu Melenisia ma le Atu Maikoronesia e leai lava se tasi e filifilia, ae o le finauga a tagata o ia atunuu e ese lava foi le vaai faale-Polenisia i tamaitai tauva, ese le vaai mai a le Atu Maikoronesia latou poo le Atu Melenisia foi.
O suiga ua molimauina i lenei tausaga i faamasino na faaaogā i lenei tausaga ua faapea ona faasafua foi i tagata o atumotu eseese nei, ma atonu o le isi mafuaaga lea ua vaaia ai le suiga e pei ona iai nei. Atonu o se auala foi lea o le a toe vaaia ai le toatele o tamaitai tauva e pei ona sa vaaia i tausaga ua tuanai auā o le toatele lava o tamaitai tauva i tausaga taitasi o tamaitai o atumotu Polensia.
O le tausaga fou o le a talimalo ai Samoa i lea tauvaga e faamanatu ai ma le atoaga o le 30 tausaga talu ona amata le tauvaga e saili ai se tausala o le Pasefika.
Iuga o le Tauvaga:
Miss Pacific Islands – Miss Papua New Guinea, Abigail Havora
1st Runner up – Miss Samoa, Ariana Taufao
2nd Runner up – Miss Tonga, Brittne Fuimaono
3rd Runner up – Miss Fiji, Zaira Begg
4th Runner up – Miss Solomon Islands
Best Presentation & Stage Interview – Miss Samoa, Ariana Taufao
Best Talent – Miss Papua New Guinea, Abigail Havora
Best Sarong – Miss Papua New Guinea, Abigail Havora
Best traditionally inspired outfit – Miss Fiji, Zaira Begg
Miss Social Media – Miss Tonga, Brittne Fuimaono
Miss Photogenic – Miss Tonga, Brittne Fuimaono
Tourism Award – Miss American Samoa, Suluga Taliau
Miss Personality – Miss American Samoa, Suluga Taliau
