E lei milia faauu saunoaga tuusa‘o a le afioga i le Faamasino Sili, Patu Tiavaasue Falefatu Sapolu i lana saunoaga faalaeiau i le sauniga na faatauto ai faamasino fou o le Faamasinoga o Fanua ma Suafa a le atunuu.
O le fautuaga malosi a le faamasino sili i faamasino fou ua filifilia ia aua lava le fefe e faatino le faaiuga sa‘o, tusa lava poo ai o loo aafia i le su’esueina o se mataupu e oo atu i luma o le faamasinoga. E lē o se galuega faigofie le avea ma faamasino auā e tele faaosoosoga aemaise o luitau.
O le toafā o faamasino ua amata nei ona galulue ina ua mae‘a ona faatauto o se faaopoopoga lea i le vasega o Alii ma tamaitai Faamasino o le Faamasinoga o Fanua ma Suafa. O se faaopoopoga foi ua molimauina le siitia ai pea o le numera o tamaitai e tofia e avea ma faamasino o lea faamasinoga mamalu a le atunuu.
O Fiu Mesepi Sialaoa o se tamaitai ua lauiloa i le tautua i taaloga aemaise le taaloga netipolo sa avea ai ma sui o le atunuu i ‘au masii sa tausinio i tausinioga faavaomalo. O le afioga Tauiliili Sekuini o se tasi o tamalii ua tele tausaga o tautua i le Matagaluega o Faamasinoga. O le susuga Nanai Pologa Ioane sa tautua foi i le Malo i le matagaluega o Tupe i tausaga e tele ua mavae, ae o le afioga Masoe Tovia o se tamalii sa faapena foi ona auauna i le Malo i nisi o tomai o loo ia umia, aemaise o lona tiute faamatai tausi aiga ma nuu.
O le toafā o faamasino na filifilia mai i le silia i le valusefulu oi latou sa talosaga mo avanoa faamasino o le Faamasinoga o Fanua ma Suafa.
Na faatumulia se tasi o potu faamasino o le Faamasinoga o Fanua ma Suafa i aiga ma uo aemaise o taitai o le Malo ma le vasega o alii ma tamaitai faamasino o le faamasinoga atoa. Sa latou molimauina le sauniga na faatauto ai faamasino fou e toafā. O moomooga lelei ma faamanuiaga na ofo atu e aiga aemaise o uo ma aumea mamae i le filifilia oi latou nei e tauave le galuega faafaamasino. O le galuega foi ua iai ona taiala e faatonutonu ai, e pei lava o isi tofiga ma galuega i totonu o le Malo.
O faamasino fou ua sui tulaga i nisi o faamasino o le faamasinoga o Fanua ma Suafa ua malolo litaea, a o nisi ua tuumalo. Ua mae‘a ona pasia e le Palemene se teuteuga o le tulafono e faasino i taimi galulue o faamasino lea ua mafai ona tautua e oo i le matua o le soifua e 65.
