O tala lealea i le matagi ma tala feaveai solo e le au faimafaufauga o upufai o Malo poo le au polokiki ua faamuta ina ua fofola mai nei e le afioga i le faipule o le itumalo o Lepa, o ia e toe tauva ina ua faailoa atu le finagalo lagolago o lona itumalo e toe tulai e avea ma tofi faipule o le paeaiga fou a le Palemene. “O e vaai mai o gi foliga o se kagaka e ma‘i? Ua uma ona fono lo‘u itumalo, ioe ou ke koe alu i le paloka”.
O le saunoaga lea a Tuilaepa i le alii faasalalau sinia o le leitio o le 2AP le tofa Vaasiliega Iupati Lagaaia i le talanoaga masani i luga o le leitio a le Malo i le Aso Tofi na tea nei. “O le pa‘ō o le kaka o lo‘u faku e pei o se iliafi le saoasaoa”.
O le finagalo o le alii Palemia poo le sui faipule o Lepa, ua lē taunuu ai sona finagalo na faaalia ina ua mae‘a le palota tele o le tausaga e 2011 na ia faailoa ai, a mae‘a le paeaiga o iai nei a le Palemene ona ia tuua lea o le tofi.
I le tele o tala salalau solo i taaviliga o polokiki i totonu o le HRPP i le iai o ni manatu e faapea, ua fevaevaeai sui faipule ma ua leai se maopoopoga, na toe faailoa ai e Tuilaepa e lē sa‘o ia manatu.
O le finagalo o le taitai o le HRPP na ia toe faamanatu mai ai se tasi o vaitau a o sauni foi i se faigapalota tele na oo atu ai ni sui faipule se toalua ma fesiligia o ia poo fea o loo iai lana lagolago. “O la‘u tala na fai i sui ia, vaai e lei faia le palota, e lē faia e tatou le faaiuga o le faigamalo fou ae o le mea lena a faipule fou e filifilia mai e le atunuu i le palota o loo loma”. Talu mai lena palota a le atunuu e oo mai i le taimi nei, e lei toe pale sui ia e toalua i tofi faipule o le Palemene e pei ona faaalia e Tuilaepa.
O le aso 16 o le masina lenei o Setema 2015, o le a feiloai ai le komiti o tapenaga o le palota tele o le 2016 a le HRPP ma sui ua iai lo latou faamoemoe e tauva i le faiga filifiliga a le atunuu. Faaalia e le Palemia o le a faamautu tonu ai sui e tauva i lalo o le fu‘a a le HRPP, ma sui o le a tauva o ni sui tutoatasi. O le faiga masani a lea vaega faaupufai e fesiligia muamua lē o loo umia le tofi faipule pe finagalo la te tauva faatasi i le fu‘a a le vaega faaupufai ma se sui fou o loo fia tauva, afai e lē talia ona tauva lea o le faipule i le igoa o le HRPP ae tauva le isi poo isi sui o ni tutoatasi.
O aiaiga o tulafono faavaega faaupufai o loo mafai ai ona ofi se sui tutoatasi e tauva i se vaega faaupufai e fia lagolago i ai pe a manumalo i se palota, ae o sui e tauva i le igoa o le vaega faaupufai e lē mafai ona toe sui sana filifiliga.
O le tulaga lea sa iai i isi palota tetele a le atunuu ua mavae, e tusa lava pe tauva i le HRPP ae a manumalo e mafai ona toe filifili ise isi vaega faaupufai e fia lagolago iai. O le mafuaaga lea o le faia o suiga i le tulafono ina ia taofia le feoai o sui mai isi pati i isi vaega faaupufai.
