O le faamoemoe o le Malo i le faalauteleina o le auala mai Apia i Faleolo lea ua amata i le faalautele muamua o se vaega o lea alatele autu mai Apia i Vaitele e pei ona silasila i ai lo tatou atunuu ua malaga i Samoa, o le mafuaaga lea o le suatia o nisi o mea toto ma tuugamau o aiga. O le tia maa ua silasila pea i ai le atunuu femalagaa‘i o loo i luma tonu o le falegaosi ‘ava malosi o le Vailima i Vaitele o se meatotino o le a aafia i lea galuega.
O le mafuaaga lea o le talia e le Aiga Sa Matai‘a i suli o Uilaefa o le faatalauula a le Pulega o Felaua‘iga i luga o le Laueleele, e aveesea le tia maa ona o le a faaaogā le eleele i le galuega o le alatele.
O le liutofaga o nisi ua maliliu o le tu ma ala agaifanua a Samoa e tali toga. E faatino foi isi vaega e pei o se sauniga lotu ma faia talaaga o tagata ua leva ona maliliu auā le silafia e suli talavou o se aiga o lo latou tupuaga. O tia maa e lē ese ma se peremita poo se pyramid i tu faa-Aikupito e na o Tupu ma tagata maualuluga ma tāua e lagomau ai.
O le saunoaga a le afioga i le Palemia susuga Tuilaepa Lupesoliai Sailele Malielegaoi i le sauniga o le liutofaga na ia faailoa ai, e $60 miliona se vaegatupe o fesoasoani mai fafo ua tuuina mai ia Samoa mo atinae o suiga o le tau, lea e aofia ai ma le toe fausia o alatetele tu lata i le sami. Na saunoa le Palemia o le fuafuaga o lea seleni o le toe faalautele ai o le auala mai Apia i Faleolo peitai o le tausaga e 2012 na aumai ai lea fesoasoani ae o loo faatuai. E mafua ona o loo faatalanoa aiga e ana eleele ma meatotino e aafia i le galuega ina ia maua muamua so latou silafia i fuafuaga o le galuega.
O le mafuaaga foi lea o le faia o le liutofaga i le tia o Matai‘a o Vaitele ona o lea faamoemoe o le Malo. Na ta‘ua e Tuilaepa e iai foi piramita a Samoa o tia maa o loo lagomau ai alii taua o nuu ma aiga, ma o le tia fou o le fausia e toe liutofaga i ai tamalii o le nuu o Vaitele ma le itumalo o Faleata o le a pei ona foliga o se piramita, e iila maa vai ma isi teuteuga o le a tuu i ai ina ia feoai ane le atunuu ma latou silafia ai o isi foi ia tagata tāua o Samoa o loo teu tu lata i le alatele autu agai i Faleolo.
O le tausaga e 1790 e tusa o faamaumauga a le aiga na tuumalo ai Mata’ia Siliga ma teu ai i le tia sa fausia muamua i le itu ala i tai lata i le sami. Peitai na liutofaga i le ituala i uta ona o le galuega foi o le auala, ae o lea ua toe liutofaga latalata i le pa o loo siomia ai le lotoa a le kamupani ava malosi o le Vailima.
O lona uiga o le liutofaga faalua lea. Sa iai le nuu o Vaitele i tausaga e tele ua mavae e tusa o se folasaga a le tofa Toi Faamoana Matai’a ao faafofoga le itumalo o Faleata. Peitai na faatau e Tamasese Titimaea le lima selau eka o fanua o le nuu ma le aiga i fana e 16.
O ia gaioiga na faia i taimi o le fetotoa‘i o le atunuu i le sii taua o isi nuu i isi nuu. O le taimi foi o le fetaua‘i o Tupu o Samoa ona o le sailiga poo ai se isi e tasi i ai le pulea o Samoa.
O le mafuaaga le o le lē toe nofoia e le aiga o o latou eleele ma fanua, ae faasee ane i Lalo‘ape i Vailoa Faleata ma nonofo ai. O le taimi o Matai‘a o Tafaigata a o pulea e Siamani Samoa, na toe talosagaina ai e le aiga ni eleele lea na tauia ai i fanua o loo nonofo ai nei i Vailoa, Alafua ma Moamoa faapea Lepea ma Fatipule.
O le tia o Tamasese Lealofi le III na tuumalo i le Mau, o loo i Lepea o loo lagomau i se tasi o vaega eleele o le aiga Sa Matai‘a i suli o Uilaefa. O tua ane o le tia o Tamasese o loo lagomau ai se tasi o le aiga le afioga Galumalemana Puaapaee o le atalii lea o Matai‘a Siliga. O le taimi nei o loo avanoa le suafa Matai‘a o Faleata ona o loo taoto i foga a le Malo nisi o mataupu a le aiga potopoto.
