O se isi pisinisi i se vaega o Malifa ua toe tupu ai foi se isi gaioiga solitulafono a ni alii se toatolu e faapea mai lipoti, sa ufiufi foliga o ni alii se toatolu na o latou osofaia lea pisinisi ma fao faamalosi ai ni tupe.
Peitai ua faaalia e le sui sooupu o le Matagaluega o Leoleo ma Falepuipui afioga Leaupepe Fatu Pula, e foliga mai i suesuega a leoleo o loo faia, e ono molia se tasi o le aufaigaluega a lea pisinisi la‘u uta ma faamomoli i le tuuina atu o faamatalaga sese i leoleo e faatatau i le mea tonu na tupu.
“O lea e aliali mai o le tasi o alii ofisa e aafia i le gaoiga o tupe ae ua nofo ma fafau se faamatalaga sese ina ia alofia ai le maua o ia sa iai i le faatinoga o le gaoiga”, o se faamatalaga lea a le sooupu o le matagaluega o leoleo.
Faaalia e Leaupepe Fatu o loo iai molimau ua taulimaina e leoleo ua iloa ai, e lei faoina faamalosi e nisi tupe a le pisinisi, ae o ni tagata na latou talepe le ofisa ma toesea ai seleni.
I se talanoaga ma le sui sooupu mo galuega a leoleo na faaalia ai e le sooupu le afioga Leaupepe Fatu Pula, ua ese le mātau a le matagaluega i le tulaga ua oo i ai soligatulafono i lenei vaitaimi.
“Ua tele suiga fou ma mea fou ma ua faaaogā ai foi e le au solitulafono ma suiga ia e faatino ai a latou gaioiga”.
Pe a fua i le gaoiga o se tasi o lālā o le faletupe o le Westpac i Vaitele, o gaioiga na faia e taulelea e toafā o loo molia sa taupule lelei ma fuafua tonu le taimi e faatino ai.
O le mātau foi lea a leoleo i le tele o solitulafono tau gaoi, talepe fale, ma le faomea ona e maua ane lava i suesuega sa fuafua tonu le faaatinoina o se osofaiga.
O suesuega o loo faia i le gaoiga o le pisinisi i Malifa o loo taulai ai le vaai a leoleo i le ono iai o se aafiaga o ni tagata faigaluega o lea pisinisi ma i latou na faia le solitulafono.
O le asō, 17 Me 2010 o le a toe tutulai ai i le faamasinoga maualuga i Apia alii e toafā o loo molia i le faomea lea na latou osofaia le lālā o le Westpac bank i Vaitele-tai.
E tatau ona valaau le mataupu lenei ua iai ni loia e tutulai mo le isi toatolu, ona ua iai le loia mo le tasi o ia taulelea e toafā.
O i latou o loo molia e aofia ai, Shane Chan Tong, Robert Chong Nee, Nazario Chong Nee ma Faiga Victor Tanielu.
E lei tuuina atu ni a latou tali i moliaga ona o loo iai nisi moliaga faaopoopo a leoleo o le a faailoa i le valaauina o le mataupu i le amataga o le vaiaso nei.
