O le tamaitai o Leemo Lemamea-Saolotoga mai le aoga o matata eseese a Manukau, le MIT, sa tuufaatasia se feiloaiga a le kamupani inisiua a le AIL, ma taitai o ekalesia poo susuga i faafeagaiga mai ekalesia eseese. E toatele le mamalu o faifeau ma faletua sa auai i lea faamoemoe, aemaise ai o le faatāuaina o le valaau faaaloalo sa tuuina i ai e le faletua ia Leemo.
O lea alo o le atunuu o loo a‘oa‘oina ma tauaveina le mataupu tau i fesootaiga faalauaitele ma tagata lautele (Public Relation) i le MIT. O se vaega o lea mataupu ma lona faatinoina, sa mafua ai ona ia taumafai e tuufaatasi le faamoemoe e pei ona sa faataunuuina i le faaiuga o le vaiaso na tea nei.
O le filifilia o le kamupani inisiua mai Amerika, le AIL e fai ma uili e faataavale ai lea fuafuaga, ona e talafeagai lelei ma iai sona fesootaiga ma le manaoga moomia o le mataupu ma le matata a le tamaitai sa ia galueaina le faamoemoe e pei ona ta‘ua. O le AIL, o le tele o auala o loo faatino ai a latou galuega, latou te faaaogāina tele le tulaga o fesootaiga ma tagata lautele, e tiliva ai la latou mau, ma le uiga o faamanuiaga e maua e soo se tagata e sainia ma faaaogāina teugatupe faaagaga mo maliu ma faalavelave faafuasei e tutupu mai. E toatele tagata Samoa o loo ua i totonu ma faaaogāina le AIL, mo a latou inisiua o le soifua, ma faalavelave.
O le faamoemoe i le Aso Tofi na tea nei, o se vaega e mafai ona faitau ma faataitai ai agavaa ma metotia o loo a‘oa‘oina ai tama ma teine aoga a le MIT, mo le agai i luma, ae o le a fesoasoani tele foi lea mo le sailia o galuega pe a faauuina ma tau lau o le faamoemoe o loo a‘oa‘oina ai. O le ituaiga galuega foi e faaaogāina i ai le tomai e pei ona ta‘ua, e le faigofie auā o lana matafaioi tonu o le a vaavaai i ai, o le sailia o auala talafeagai e fesootai ai ma matagaluega a le malo, matagaluega tumaoti, pisinisi ma tagata taitoatsi. O fesootaiga uma foi e ao ina faia i le tulaga maualuga faapolofesa, ina ia taofi mau ai ma aua ne‘i suia ai le uiga ma le aano moni o le tulaga tau fesootaiga.
O le saunoaga a le faletua ia Leemo i se feiloaiga ma le Samoa Times, sa ia faamaonia mai ai le tāua tele o le feiloaiga lea ma faifeau ona e tele itu e tāua ai. E iai lona naunautaiga e moni lava o se vaega e tatau ona faatinoina, ona o le manoga o lana mataupu o loo a‘oa‘oina ai, ae sili ai ona tāua auā o le a faalauiloa ai foi isi mealilo ma auaunaga a le kamupani a le AIL, o le a penefiti ai soo se tagata lava, e pei ona ia filifilia. O lona uiga o se faamanuiaga mo tagata o aulotu a faafeagaiga, o se faamanuiaga foi ma le kamupani a le AIL, ae sili ai ona faamanuia ai lona taumafai i le tulaga o aoaoga o loo feagai ai. O Leemo e le gata o loo a‘oa‘oina i le MIT, ao o loo galue foi faavaitaimi i le kamupani a le AIL.
Ae o le polokamalame sa fofogaina e se tasi o alii pule o le kamupani inisiua a le AIL, Steve Hill, sa ia faailoa ai le tulaga manuia ua ofoina e le kamupani, mo soo se aiga lava i totonu o ekalesia. Sa naunau tele le alii pule o le kamupani, ina ia malamalama lelei susuga i faafeagaiga ma o latou faletua i vaega uma o lea maliliega, a o lei agai ane e faamautu ma saini lima loa mo se faiga paaga. Sa faamaonia foi e le Samoa Times, le tulaga manuia tele o aiga Samoa ma soo se tasi lava, i aiaiga uma o le maliliega tusitusia faaletulafono lea sa saunoa i ai Steve Hill e fai ma sui o le AIL.
E maualuga tele le vaai a le kamupani i tagata Samoa, ona e le gata i le toatele o le aufaigaluega o loo galulue ai, ae maoae foi le fuaninumera o tagata ma aiga Samoa ua mae‘a ona fai paaga ma le AIL. A silasila foi i tulaga maualuluga i totonu o le kamupani, ua fao foi e alo ma tamafanau a le atunuu.
O se tasi o alo o le atunuu o loo sosoo pe pule lua foi i le AIL i Niu Sila. O mafuaga ia e matuā tāua tele ai le fesootaiga ma le sootaga o le kamupani ma tagata Samoa. O isi ia vaega sa saunoa i ai le alii papalagi o Steve Hill i lana saunoaga autū o le aso.
Faamalamalamaina o le polokalame a le AIL (Steve Hill, manager)
O le faamatalaina e faapenei; e $2000 se vaega tupe o le a tuuina mai e le AIL, mo soo se ekalesia lava e maliu se tasi poo so latou sui e aunoa lava ma se tupe e totogi atu i le AIL. O lea foi vaega tupe o le a totogi sao lava i le igoa o le eklaesia, ae le o le suafa o le faifeau, poo se igoa foi o se tagata e toatasi. O lea vaega tupe e le silia ma le lua vaiaso e faatalia ai le taimi o le a totogi mai ai.
O le a tapa e le AIL, se pepa faamaonia mai le fale maliu, poo le pepa maliu foi e pei ona masani ai. E ono tāpā foi se pepa faamaonia mai le ofisa o leoleo ma le falemai pe a manaomia mo se faamaoniga o le mafuaaga moni o le maliu.
Aiaiga
E tatau ona sainia muamua pepa faaletulafono ua mae‘a ona saunia e le kamupani, e faamaonia ai le feagaiga ua osia i le va o le AIL ma le Ekalesia. Ia mautinoa lelei, o le maliu pe afai ae tupu lea tulaga, na mafua ona o se faalavelave, ia manino lelei le vaega lea o aiaiga. O le isi ona faamatalaina e faapea, e le aafia ai le maliu, ona o se ma‘i poo se gasegase.
O le maliu i se faalavelave mo se faataitaiga, e faapei o le lavea i le taavale, poo se nofoaafi, aafia fua i se misa, lavea i se taaloga, mu i se vaalele, poo se isi foi mafuaaga, atoa ai ma isi.
E le na o le pau lea o auaunaga a le kamupani o loo avanoa mo soo se tasi, peitai o lea lava aso sa faamamafa ma mafuli le tautalaga ma le saunoaga a le alii pule, i le unaia o le vaega fou lea o le a penefiti ai le ekalesia poo le aulotu.
E silia i le fa sefulu faifeau ma o latou faletua sa auai i le aso, faatasi ai ma nisi foi o tama ma tina malolo manumalo sa auai foi. O sui o le AIL sa faatasi ai o le alii pule Steve Hill, o le fofoga o le kamupani le PR, ma nisi o taitaiau i lalo lava o le taitaiga a Hill.
Na faaiu lea aso i le taualuga masani lava, o le tali o le sua ma le taumafataga mamafa na saunia lava e le alii pule ma le kamupani a le AIL, faatasi ai ma aiga ma uo a lē na tuufaatasia lea faamoemoe, Leemo Lemamea-Saolotoga. Sa faafiafiaina foi le auvalaaulia i le siva naifi a le susuga ia Lenni Mamea ma ona alo e toalua.
