E sili ona lelei o se mea itiiti, a o iai le mata‘u ia Ieova, i le ola e tele, a o iai le atuatuvale. E ui lava ina loloto le silafia ma malamalama ma kerisiano o tatou tagata, peitai e lē o mavae lava le tulai mai o faafitauli i le faaaogā lea pe faavalea e le isi Samoa le isi Samoa, ona o le tuinanau ma le manao tele i lenei auauna faatosina o le “tupe”.
I tausaga ua tuanai na tulai mai ai le tele o nisi o vaega i le aoina lea e nisi o pasese o le tele o tagata ae faaaogā pei lava e patino ia te ia e aunoa ma se mata‘u i le Atua pe toe to manatu ane pe ono mafatia ai sia tagata na afu e saili le tupe.
O le faletua ia Lemalu Tuuu Patricia Slade ma si ona alii le susuga ia Stephen Sevele o loo tautuaina Samoa i le ofisa malaga a le Sina World Travel e ala i le fesoasoani malosi e faafaigofie pepa malaga e pei o visa ma le tele o vaega tau femalagaa‘iga i o tatou tagata Samoa.
E toatele nai tagata matutua ma i latou e pisi, o loo tuu atu lo latou faatuatuaga i le auaunaga lea auā e maua ai lo latou toomaga i le tautua a lea faletua loto fesoasoani.
Na sulufai atu i ai nisi o kulupu e ova atu i le tolusefulu tagata na afatia ina ua maua ane a latou pepa malaga (tickets) e lē mo‘i, e fiu saili e lē iloa poo fea e omai ai numera fake i totonu o tickets.
Na totogi i se tasi o faletua i totonu lava o Brisbane e aunoa ma se laisene poo se tomai e faia ai ni pepa malaga. Sa matuā lagona le faanoanoa o le toatele o tagata na sauni atu i le faigamalaga mo Samoa i le vaiaso ua tuanai, ina ua oo mai i le minute mulimuli o le a malaga ae maua ane le tala ua tafea i le vanimonimo o latou pasese sa aoina e se tasi o le aumalaga sa tuu i ai lo latou faatuatuaga.
Ua silafia uma le agaga ma le loto o le Samoa pe a tulai mai ni tulaga faapenei, e sola lava le loto faamagalo ae muamua mai le agaga o le tiapolo ma le fia fusu pe afai ua lata ina taunuu se faamoemoe ae faafuaseia mai ni faaletonu faapea.
Ona o le utiuti o le taimi o lea na tapa ai le fesoasoani a Lemalu Tuuu Patricia auā ua lē iloa poo fea ua sola i ai le maula na ao i ai tupe a nai tagata. E sola lava le amioleaga ae tuliloaina lava. O le fili o le tama o le maua ae o le faletua la lea o loo sailia nei.
O le faitalia o le vaega toatasi lea e faia i ai le filifiliga o le loto o le tagata, peitai a oo loa ina mu le lima ua tapa loa i le i‘ofi e pei o ia upu a le atunuu.
Ua moni ai Afioga mamana a le Atua, “O iai ala ua tonu i le manatu o le tagata, a o lona taunuuga, o ala ia e oti ai.
E iai taimi e lē amanaina e nisi tagata, ia tautua a Samoa peitai e mu loa le lima tapa loa i le i‘ofi. O se faamanatu mai le faletua ia Lemalu Tuuu Patricia Slade-Sevele, ina ia tagai lelei i taimi e faatumu ai apalai i luga o upega tafailagi pe a fai bookings auā a sese se mataitusi e apalai lava le fee, ae lelei lava le fesagai ma o tatou lava tagata pe soo se ofisa malaga ae o loo maua le avanoa e toe fetuunai ai ma toe siaki na vaega uma.
Na saunoa le faletua i luga o le leitio e lapatai ma faamanatu, “Soia le talitonuina ni tagata e leai ni laisene, pe te lua aiga ma masani ae afai e leai se faamaoni, e ono tulai mai ai ni faafitauli tetele.
