O le lolofi ane o tagata i le malaevaalele i Faleolo, e tofu le tagata ma lana tagata autu o loo fia vaai ma faatalofa mai i ai. E ese mai le fia feiloai mai ma lululima i le aulakapi siamupini o le lalolagi le Olopeleki, ae o le isi anoano na naunau e fia feiloai ma vaaitino i le alii faasalalau ta‘uta‘ua a Niu Sila, o ia foi lea na malosi lana unai ina ia faataunuu lenei taaloga faitaulia o le senituri, o le Susuga ia John Campbell.
Ua vaaia i nisi o ata i luga o le facebook, se tasi o vaaiga i Samoa, le matuā fofola mai o se ie o loo tusi matamata tetele ai le faatalofa ma le faafetai mai a Samoa ia Campbell i lona finauina malosi o lenei aso uigaese o le a lē toe galo i loto o soo se Samoa, le aso 8 Iulai 2015, ua mafai ai ona masii atu le aulakapi ta‘uta‘ua a le Olopeleki, ma faia se la taaloga faavaomalo ma le ‘au a le atunuu le Manu Samoa.
O molimau faatuatuaina sa iai i le malae vaalele i le aso na taunuu ai Campbell i Faleolo i le faaiuga o le vaiaso talu ai, na mataina le lolofi ane o tagata e mananao e fia feiloai i le alii faasalalau, ma o se vaaiga na ootia ai Campbell, ona e leai sona manatu ua matuā lauiloa o ia i Samoa, aemaise le faatāua e Samoa o sona sao na faia i le uunaia o lenei taaloga faitaulia.
O se faatalofa, o se faafetai, o leo nei na lagona i lea aso, aemaise le mananao e fia tapue ni ata faatasi ma lenei alii iloga i le itu tau faasalalauga. O loo auai atu Campbell i Samoa faatasi ma le vaega faasalalau a le Sky Sport, auā le lipotia mai o le taaloga i le aso a taeao, Aso Lulu, 8 Iulai.
Peitai a o galue le alii o Campbell i le Televise TV3 i lana polokalame faapitoa le Campbell Live, na ia matuā unaia ai ma luitauina loto o le pulega a le Olopeleki ma le malo Niu Sila, o se mea tatau le oo atu o le ‘au a Niu Sila e faia se taaloga ma le Manu Samoa i le malae o le Manu, pe a fua i le telē o le sao o Samoa i le atinaeina o le aulakapi a Niu Sila, e tauala mai i nisi o alo o Samoa o loo ta‘uta‘ua ai le ‘au a Niu Sila.
O lenei la vaiaso atoa i Samoa, e tofu lava le tagata ia ma lana tagata ta‘uta‘ua o loo naunau e fia luluaao i ai. Ae matauina, o loo sili ona fia feiloai tagata Samoa ia John Campbell, ona o lona faamatilatila maia o lenei mataupu i lana polokalame le Campbell Live, ma avea ai e pei o se asu oona i fofoga o le pulega a le ‘au ma le malo Niu Sila, seia oo ai lava ina faia le latou faaiuga, o se mea tatau le fai o se taaloga faitaulia a le All Blacks ma le Manu Samoa, i le malae o le Manu i le Apia Park.
Welcome John Campbell….Faafetai tele Lava!
