O upu o le Tusi, o le faamoemoe ua taunuu o le laau lea o le soifua. E moni lava e agalelei le Atua ma tali mai i manaoga o lana fanau.
E talitonu ua faatumulia i le agaga faagaeetia ma le faafetai le susuga i le faafeagaiga ia Safiti ma le faletua ia Hinemoa Iupati, ona ua tali mai le Atua i le tatalo faatauanau, ina ia vave mai se aso e faaaogāina ai lo laua soifua i lana galuega o le tala‘iina o le Talalelei o le Faaolataga.
O le susuga ia Safiti Iupati ma lona faletua ia Hinemoa, ua mae‘a ona a‘otauina i le Kolisi Faafaifeau i Malua.
Ua faai‘uina ma le manuia lo laua taumafai, ona toe taliu atu lea i le aulotu sa galulue ai muamua o le EFKS i Kingsland i Aukilani, sa faafaileleina ai lo laua soifua a o lei valaauina e le Atua e fai ma ana meafaigaluega.
O o la mātua faaleagaga i le Ekalesia i Kingsland o le susuga i le faafeagaiga ia Maligi Evile ma lona faletua ia Faauuga Evile.
O le Aso Toonai, aso 4 o Setema 2010 i le 10 i le taeao, na faataunuuina ai le sauniga o le Osigafeagaiga a le Ekalesia EFKS Sulu o le Talalelei, ma lo latou tofi fou ua tuuina mai e le Atua e fai ma o latou ta‘ita‘i.
O le susuga lea i le faafeagaiga o Safiti Milo Upati ma lona faletua o Hinemoa Iupati. Sa faapea ona faatumulia lea taeao, i le paia o le Pulega i Saute, faapea foi le mamalu o le paia o le Matagaluega a Kuiniselani.
Ae lē gata i lea, o le paia o aiganalua o le faafeagaiga ma lona faletua faapea le Ekalesia a le Sulu o le Talalelei.
O le nofoaga na faataunuuina ai lenei faamoemoe, o le malumalu o le Puna o le Olataga o le Ekalesia i Southwest Brisbane, lea na faato‘ā mavae atu lona umusaina, le susuga i le Toeaina Tauaaga & Senerita Mataafa.
O le Ta‘ita‘i o le sauniga, o le susuga lava i le Toeaina o le Pulega i Saute, le susuga ia Tauaaga Mataafa. Sa fofogaina le Afioga Paia a le Atua, e le susuga i le faafeagaiga ia Peniamina Tuifaasisina.
O lē na saunoa i talosaga molia, o le susuga lea i le Toeaina o le Pulega i Matu, le susuga ia Lauie Lupematasila.
O lē sa lauga mo le faifeau ma lona faletua, auā se upu faamafanafana mo le amataina o le galuega, o le susuga lea i le Toeaina Faatonu o le Matagaluega i Kuiniselani o Kerita Reupena. O lē sa lauga mo se upu faamalosiau i le Ekalesia Sulu o le Talalelei, o le faafeagaiga ia Pevise Leo.
Sa lagona i tino matagi lelei i le matagofie o le upu a le Atua sa tomatauina ai e le au Toeaiina ma le Aufaigaluega, le faafeagaiga fou ma lona faletua, faapea le Ekalesia Sulu o le Talalelei.
O le susuga i le A‘oa‘o Fesoasoani o le Ekalesia Sulu o le Talalelei, le susuga ia Mulipola Isaraelu, o ia lea na saunoa e fai ma sui o le Ekalesia, e faailoa le mafuaaga na ala ai ona o latou filifilia Safiti ma lona faletua e fai ma o latou faifeau.
Ina ua mae‘a le sauniga lotu, ona tulai lea o le Failautusi o le Ekalesia o le Sulu o le Talalelei, le afioga ia Anae Saoaumaga Nanai, e momoli le faafetai i le paia o le aufaigaluega i susuga i Toeaina faapea le au mautofi i lea taeao, ona o upu faamalosiau ma upu faamafanafana e lē gata mo le faafeagaiga ia Safiti ma lona faletua, ae faapea foi i le Ekalesia o le Sulu o le Talalelei.
O le susuga lava i le Tiakono o Fata Peteli Fata, o ia lea sa fai ma fofoga o le aso, e fai ma sui o le Ekalesia faapea Aiga na lua, auā foi faaaloaloga mo le paia i le aufaigaluega, ma ē ua molimauina le faamoemoe o le Ekalesia.
O le tofa ia Aumua Sepulona o se tasi o tiakono o le pulega ma le Matagaluega, sa fai ma fofoga taumolimoli o le Au Toeaina ma le paia o le aufaigaluega faapea Samoa na potopoto i lea aso e momoli le agaga faafetai i le paia o le Ekalesia o le Sulu o le Talalelei, ae tainane ai le paia o Aiganalua ona o le maualuga o faaaloaloga sa silamiō ai le Matagaluega ma Samoa ua potopoto, ona o pelega o alo ma fanau aemaise ai o taulaga tagata ua tuuina atu i le Atua ma lona finagalo.
Sa tauaaoina e le Ekalesia o le pulega ma le Matagaluega, aemaise ai tagata taitoatasi ma a latou alofaaga molipo mo le Ekalesia ma si o latou faifeau fou, e tusa lea ma le $3,800.
