(Asosi a tama tuai a Malisi i Kuiniselani)
O le poto na faavaeina ai e Ieova le lalolagi; ua faatumauina le lagi i le mafaufau. O lona poto ua vaeluaina ai moana; o ao foi ua toulu ai le sau.
Ona toe fetalai lea o Ieova i le tusi lava lea o Faataoto “Lo‘u atalii e, aua ne‘i te‘a ese nei mea i ou luma, ia e taofi mau i le poto ma le mafaufau”.
O le ala lea e lē mafai ai ona aveesea e le Isaraelu moni faleaoga na uluai fofoa ma faavae mai ai le soifua a‘oa‘oina e saili ai le atamai, auā o se ata faasolo lea i aso uma o le olaga i lea augatupulaga ma lea augatupulaga.
O le faailogaina o le 60 tausaga o aoga a le Malisi, e lē o toe po ai malaē, sa mafai ai ona feiloai nisi ua iloga mai o latou tulaga e pei o faafeagaiga taulagi, ta‘ita‘i o mafutaga ma faalapotopotoga faapea totonu o matagaluega ale malo faasetete o Kuiniselani.
O le Aso Sa aso 5 o Setema,o se aso fiafia lea ua lē gata i le aso faapitoa mo tamā, ae ua talafeagai lea auā sa osia ai se Misasa paia mo lea faamoemoe tāua.
O le afioga lava ia Patele Epati Tamati sa ta‘ita‘ia lea sauniga, sa matuai faatumulia i ē uma sa a‘otauina i aoga a le Katoliko e pei o Teine Tuai o St Marys, Teine Tuai o Pope Paulo VI faapea Tama Tuai o Sanele ae faapitoa i Tama Tuai o le Malisi.
O lea lava foi faatasiga na mafai ai ona molimauina ai le toatele o i latou sa lolofi atu e fia auai ai i totonu o le Asosi, e faaopoopo ia i latou ua iai nei, o nisi o tupu ma tamalii faapea failauga o le atunuu.
O nei asosi ua galulue faatasi o se aiga e tasi e lagolago auā alo ma fanau o a‘oa‘oina i aoga a le ekalesia i Samoa. O le komiti la o le asosi a Tama Tuai o le Malisi i Kuiniselani ua ma‘oti mai, e aofia ai le Peresitene – Sinave Fonoti; Sui Peresitene – Antonio Taito; Failautusi – Taii Afano Tualima ma le teu oloa – John Cortz.
O lea lava foi faamoemoe, na mafai ai ona tuuina mai tau‘au o nisi e fia auai i le mafutaga.
E maofa ai foi le loto i le fia o maila e alaala ai nisi, peitai na lele le ū i le vateatea e pei ona saunoa Patele Epati Tamati, e lei faafiti pe faavaivai le Isaraelu moni pe a faamanuiaina i le alofa moni, ua tau ai lau o le faamoemoe, pe ana lē ogatasi finagalo.
O le ‘auga lava o aute, o le agaga fia fesoasoani e faavaeina lea i le alofa naunautai, latou te lē faitaulia o latou taimi ma tupe faaalu mo nai tupulaga fai a‘e a le ekalesia Katoliko o soifua a‘e i Samoa.
