E matuā matagofie i luga o mauga o vae o lē ua fai mai le talalelei, o lē ua logologo mai le manuia, ua tala mai le tala lelei, ua faailoa mai foi le olataga.
O le malumalu o le Ekalesia Metotisi a Magele Tutotonu Koneferenisi Niu Sila, na faataunuuina ai se sauniga faapitoa i le osiga feagaiga a lea Matagaluega ma o latou mātua faaleagaga ia Rev Suiva‘aia Teo ma lona alii ia Muaimalae Teo.
O le afiafi o le Aso Faraile 30 o Ianuari na osia ai lea feagaiga, ma na auai uma susuga i faafeagaiga ma o latou faletua mai matagaluega o Aukilani faapea sui o aulotu faatasi ai ma nisi o le Ekalesia i Birkenhead i North Shore na galulue muamua ai le susuga i le faafeagaiga aemaise o la aiga na lua.
O le polokalame o le afiafi na fai ai le faletua ia Kalala Iosefa ma sui o le Matagaluega e faafeiloaia susuga i faafeagaiga ma o latou faletua faapea le mamalu o le au valaaulia sa molimauina lenei osiga feagaiga.
O upu tomua o le sauniga na saunoa i ai le Peresetene aoao o le Ekalesia ia Rev Tovia Aumua, ona sosoo ai lea ma le pese amata o le sauniga, ae savavali atu ai i totonu le susuga i le faafeagaiga ia Rev Suiva‘aia ma lona alii faatasi ai ma i latou o loo momoliina.
O le taimi lava lea o le sauniga na tuuina aloaia atu ai e aiga na lua ma sui o le ekalesia mai North Shore le susuga ia Rev Suiva‘aia Teo ma lona alii ia Muaimalae Teo i le Peresetene ma le sui Peresetene e fai ma faifeau o le matagaluega i Magele faatasi ai ma le tofiaina e avea ma Sea o le faasinoti a Niu Sila atoa.
O Rev Faaiva Alaelua o le taitai o le itumalo o Manukau, ae o loo faifeau i Otara na saunia le tatalo, ae o Rev Tau Lasi na laugaina le Afioga Faauuina a le Atua. O pese o le sauniga na lagiina lava e le aufaipese a le matagaluega Metotisi Tutotonu i Magele.
O le faapaiaina o le osiga feagaiga ma le faauuina o le Sea, na faatinoina lea e le Peresetene ia Rev Tovia Aumua faapea le sui Peresetene ia Dr Pela. O le faaiuina o lea osiga feagaiga na tatalo faatasi uma ai loa susuga i faafeagaiga i luga ia i laua auā le faatinoina o le laua galuega fou ua valaauina ai e le Atua.
O le tofia ai o Rev Suiva‘aia Teo ma lona alii ia Muaimalae Teo e fai ma Sea o le Ekalesia Metotisi Koneferenisi i Niu Sila na tofia sa‘o mai lava e le Peresetene ia Tovia Aumua na te faaauauina le tofiga sa ia tauaveina mai, ona ua ia galue i le isi valaauina mai le Atua e ala i le tofi Peresetene.
Ma ua toe tasi nei le tausaga o loo faaauauina ai e Rev Suiva‘aia Teo lenei tofi ona toe filifili foi lea o le isi tofiga fou.
O le taualuga o le afiafi na faaiu ai i le taumafataga na saunia e le Ekalesia i Magele, ma o le aao tusitusi o le Ekalesia sa fai ma fofoga o le po le tofa ia Muagututia Semu, ae o le failautusi o le itumalo o Aukilani ia Tuiloma na molimoliina le faafetai i le matagaluega a Magele Tutotonu e tusa ai ma le faaaloalo, ae tali faitau i ai le tofa ia Fonoimoana Mareko sa fai ma sui o le Ekalesia.
