O a‘u o le leoleo mamoe lelei, ou te iloa a‘u mamoe e iloa foi e a‘u mamoe lo‘u leo. O le Aso Toonai na tuanai atu na osi feagaiga ai le Ekalesia Faapotopotoga Kerisiano Samoa a le pitonuu o Watsonia i le aai i Melepone ma lo latou faifeau le susuga i le faafeagaiga taulagi ia Rev Sikeli Leasiolagi ma le faletua ia Litara.
O le susuga i le taitai toeaina Rev Aviti Etuale na taitaia le sauniga ma saunoa foi i le Upu faauuina a le Atua na tomatauina ai le feagaiga osia i le va o matafale uma o le aulotu ma lo latou feagaiga. Na saunoa le toeaina ia tasi le tino, tasi le loto ma le mafaufau e fai ai le galuega, ona tino mai lea o manuia o le Atua.
Na mae‘a le upu folafola sosoo ma le molimau matagofie a le faifeau fou Rev Sekeli e faafeiloai i lana ekalesia fou, ona alo lea i le taumafataga tele na maau i ai le aulotu, ma alo ai i faaaloaloga masani mo faamoemoe tetele faapenei.
Na tala ai le toga paia i le momoliina o le faifeau e pei ona malaga mai ai le paia o aiga na lua mai Samoa ma Niu Sila. Sa tu tootoo ai Tuiloma Tuiatua auā lava pelega mo lupe faalele a aiga ma afioaga mo le talalelei. O le susuga i le tiakono toeaina o le pulega a Vitoria le tofa Ape Sofara na saunoa e talifuaitau.
Na maualuga ma mati‘e le faamoemoe o le ekalesia ma lo latou faafeagaiga ona o le pule faasoifua a le silisiliese, ae tainane le tapuaiga malu a Samoa na potopoto. Na ta‘ape le fuamanusina ma le mama ua lomi ona o faaaloaloga ua maualuga, ua inumalie ai le faleselau Tatalo ia to mai le Lagi manuia faaleagaga o le ekalesia, ma ia tasi lo latou tino, tasi lo latou loto ma le mafaufau mo le Atua ma lona finagalo.
