Lo‘u au ua sili oe i penina tautele ma taimane, O lo‘u sei na fili mai le vao fugalaau e afe, O lou lalelei ua o se ata lafoia i vaitafe, Ou te lagi le pese i ou tofaga seia e moe gase.
O le sasala o le alofa ma le nanamu o lagona na avea ma vaaiga silisili i le sauniga na tuufaatasia ai le faatoafaiava o Kaisala ma le lalelei o Maryanni.
Na molimau le valaaulia ma a la uo “Ua moni le alofa”, ua sasala ma vaaia i o la foliga aulelei faatasi ma a la uosili ma aumeamamae.”
O le ‘afa o le lua i le aoauli o le Aso Faraile na se‘i mavae atu na o la tutulai ai i luma o le silafaga ati a le Atua, tainane le mamalu o le valaaulia ma Samoa na potopoto faapea nai o la aiga uma, ma tautino le solo a le tamaloa ia la tautoga ma faamaulu mama o faailoga o le alofa e oo i le oti, ona faamau loa lea ia la sainiga lima i pepa a le malo ma le ofisa fai faaipoipoga.
O le Roselyn Court Reception i le pitonuu o Essendon na faataunuu ai foi ma le taumafataga tele mo lo la aso fiafia.
Maeu foi le lalelei o le mamalu lasilasi o Samoa ma le valaaulia, ae o le malualii foi o mātua o le ulugalii fou, a o le onomea o teuga a nai tauaiga malaga mai Samoa, aemaise le tina matua ia Maria Nive Tiatia Mafoe na malaga mai Niu Sila.
O le faili mālie a Leniu Band na nafa ma le musika mo saasaaga ma siva o le aso tele, faatasi ma faafiafiaga na alofaiva i ai le susuga ia Taupau Matiga, le faletua ma le ausiva malosi.
O le faamoemoe ua taunuu o le laau o le soifua lea, viia le Atua ina ua ta‘ape ma le fiafia Samoa uma na potopoto ma le agaga faagaeetia.
Ia manuia lo lua aiga fou, faamoemoe i le Atua lua te manuia ai. Alofaaga mai o lua aiga uma aemaise o o lua mātua, Fasavalu Semu ma Lusia, uo ma aumeamamae.
