“Faafetai i le Pound 4 Pound Boxing mo le lagolago mai”…Ale Vena
Ua iai le talitonuga o le Pelesetene o Fusuaga Faapolofesa a Samoa le tofa i le Igoa Matua Ale Vena, o le a siitia maualuga fusuaga faapolofesa i Samoa ona o le ofi mai o se tasi o tamafanau a le atunuu lauiloa i le lakapi le afioga Tuigamala Vaaiga Tuigamala ma lana kamupani faalauiloa fusuaga o le Pound 4 Pound mai Niu Sila.
O le uluai fusuaga faapolofesa ua aumaia e lea tamalii ma lana kamupani o le a silasila ai Samoa ma le lalolagi i nisi o tama lauiloa i le fusu i le Pasefika aemaise o Amerika Samoa o le a masii mai se tasi o a latou tama fusu lelei e auai i ia fusuaga o le a faia i le aso 6 o Tesema i Apia.
O le faamoemoe o ia fusuaga o le siitia maualuga o le taaloga ma unaia ai foi alo ma fanau a le atunuu o loo fiafia i le faipele.
E toalua alo tama o le afioga Tuigamala Vaaiga Tuigamala o le a fufusu ai i ia faipelega faapolofesa, lea o le a fusu ai foi ma se tasi o alii talavou o Leti Leti o le a fetaui ma se alii fusu mai Fiti.
Fai mai Tuigamala, e leai se isi mea o loo ave i ai lana faamuamua, o le atinae o le faipele a tamafanau a le atunuu e pei foi ona fiafia ona alo e taaalo ai. Faaalia e Tuigamala o ia sa lelei tele ma lauiloa i le lakapi ae ua ola a‘e lana fanau e fiafia i le fusu e oo lava i lona afafine ae leai se isi e fiafia i le lakapi.
O le mau a le toatele o le a matuā tumutumu le atunuu i fusuaga o le a faia ia Tesema ona o le mau a se tasi o alii faasalalau sinia, le susuga Sioeli Taulealeausumai, o lea faatoa lelei se kamupani e faalauiloaina le taaloga.
O le talitonuina o Tuigamala Vaaiga ma lana kamupani na faaalia e lea alii faasalalau sinia o le faamaoniga lea o lana mau. O loo iai foi se isi faipelega faavaomalo o le a aumai i Samoa e Tuigamala ma lana kamupani lea o loo faamoemoe e faia i le aso 7 o Iulai o le tausaga fou 2015 a o lumanai le taaloga faitaulia a le Manu Samoa ma le Olopeleki i le aso e sosoo ai le aso 8 o Iulai.
O loo fuafua e fufusu ai nisi o tama tuai o le Manu Samoa ma le Olopeleki. Fai mai Tuigamala o se isi lea tapenaga tele a lana kamupani ona o le a fufusu ai foi nisi o tama lelei ua lauiloa i faipelega i Ausetalia ma Niu Sila aemaise o le Pasefika.
E lē tau fesiligia foi o le a sili ona tumutumu lea faipelega tele auā o le taimi tonu foi lea ua tumutumu mai le lalolagi i Samoa e fia maimoa i le uluai taaloga faavaomalo ua faia i se atunuu laititi o le Pasefika o le a taaalo ai le Olopeleki i eleele o le Manu Samoa mo le taimi muamua i le talafaasolopito o le lakapi i le lalolagi ma le Pasefika.
