O le malosi o le tuinanau, ua tauau ai ina pogisa le alofa i fanau aemaise o le mafutaga ua uma ona osia ma le tina i luma o le Atua e ala i le faaipoipoga. A o le upu foi a le Tusi, ‘A to le tuinanau ua fanau mai le agasala; a matua le agasala ua fanau mai le oti.’
O le mai lea ua sosolo pea e pei o se afi mumū i totonu o mafutaga a ulugalii o le toe sosola lava o le isi ma le tautoga a le isi. A lē oso i totonu o lotu ua tupu lava i totonu o le aiga poo le lotoifale o auaiga.
O le aoauli o le Aso Tofi na se‘i mavae atu nei, na lipotia mai ai e se tasi i luga o le Radio Samoa lenei mataupu mo se fesoasoani, ona ua tatae e lenei tagata le fatu o si nei tina ma si ana fanau, ae lē gata i lea ona ua faateia le aulotu ma le latou aiga i lenei mea ua tupu, ma o loo fia iloa e aiga o le toalua lea ua sosola, poo fea se vaega o le atunuu ua sosola i ai aemaise le faalumaina ua iai nei i aiga.
Na maua se fesootaiga a le tusitala ma le tina loto mafatia, ma o lana faamatalaga e ui e lei finagalo e faailoa lona suafa, fai mai a ia, sa iai faatasi lava ma lona toalua, le tamā le aiga, ma si a la fanau i le po o le Aso Toonai, ae malama le taeao ua leai le tamā mai le latou aiga.
Na sailiili mālie e le tina poo fea se mea o agai i ai, ae maua ane le faamatalaga ua sosola ma le isi mafine talavou o le latou aulotu. Na suesue mālie pea e le tina lea mataupu, ae emo ane le ata o le mafine lenei, e ui lava ina laitiiti ae foliga ua masani ai i le amio lea o le faatetea ulugalii.
E faapea le tala, sa iai foi se mea faapea na tupu ai muamua i le tamaitai lenei, ma toe faafoi ai loa i Samoa e lona aiga sa nofo ai, peitai sa toe audaaaamai ona na manatu le aiga ua iai se suiga.
Na ta‘ua foi e lenei tina mafatia, sa lilo i ona manatu o loo iai se faanunumi a lona toalua ma se tasi o ona uso i le galuega a le Atua, ae ina ua tupu lenei mea na ia talitonu ai loa o loo faaauau pea le mataupu a lea tamaitai i totonu o aiga.
Na faailoa foi e le tina, e oo foi i lona toalua e lē o se taimi muamua lea ua tupu ai se mea i lea alii ae sa fai muamua foi. Peitai o lona loto faamagalo ma lona vaai i le Atua, sa fai ai lava ma ia toe talia ma tuu avanoa i lenei tagata i lona fale.
Peitai la ua toe tupu mai lenei mataupu i lona aiga, ua ia lagona ai loa, ua tatau ona faasa‘o le mea e agai i ai le tagata leaga ma le lē alofa. O lenei tina e toatolu lana fanau laiti ua nofo nei na o ia ma tausi si ana fanau, faatasi ai ma le fesoasoani a lona auaiga.
Ua naunau nei le susuga i le faafeagaiga ma le ekalesia e fia maua se tala i se mea o iai le toalua lea, ae se‘i maua mai le tamaitai e toe faafoi i Samoa.
