E sui lava le fuainumera o le tausaga ae lē suia le tautua masani ma le faamāmā avega a le faletaavale o le G-Mana Wholesale Autos i lona lala fou i Otahuhu ma Papatoetoe, e ala lea i ana taavale mo aiga i Niu Sila nei a o taavale foi mo tatou aiga i Samoa, Tonga ma Fiti.
O le amata ai o galuega o le tausaga na faaalia ai e le afioga i le alii pule ia Galumalemana Tai Galumalemana le vevesi ma le lē malolo o lana aufaigaluega i le taumafai e faamalie ma tali le agai atu o le mamalu o le atunuu i le fia maua o ni latou sa mo le amataga o le 2015.
O le Aso Toonai ua mavae 24 o Ianuari na toe amata ai foi lana tautua faaauau, e ala lea i le saunia o se BBQ e tali ai le sua a le mamalu o le atunuu pe a agai atu e saili ni o latou taavale. E ta le 10 i le taeao ae amata ona gasolo atu le atunuu e matamata ma filifili se taavale auā fanau ua lata ina a‘e aoga.
Sa vaaia nisi o aiga na faatauina o latou taavale a o nisi na afe atu lava e tali le avanoa ua maua e tausami ai le BBQ, ae o na mea uma sa lē vaivai ai le aufaigaluega i le faamalieina o finagalo o le atunuu. Ua taunuu ai upu a Samoa, Ua matou foi ma le mama ua lomi ma le vaa ua goto i la outou faaaloalo faatamalii.
Ae talu ai o le valaaulia a le afioga i le alii pule i le faapaiaina o le fanua i Magele mo le maota o le Konesula, sa tau fai ai si tuai o galuega amata o le taeao.
O le tea o le 12 i le aoauli ae afea loa e le Konesula o Samoa le afioga ia Faolotoi Reupena Pogi faapea le afioga i le faipule ia Su‘a William Sio ma nisi o malo, le lotoā a le G-Mana i le sailia o ni sa mo aiga i Samoa faapea Niu Sila nei.
Sa faapea foi ona faasalalau tuusa‘o e le leitio 531 le tautua a le G-Mana i lea aso, faatasi ai ma le faali a le Mapuitiga sa faafiafia ai le mamalu o le atunuu. O le toatele o tagata sa maofa i le lelei ma le vave o vaega o loo faatino ai le manaoga, ai ona ua maua uma i totonu o le fale vaega uma e manaomia e faatino ai se taavale.
O le agaga faafetai a se tasi o ulugalii na ave i tua lo laua sa i lea aso, ona e tasi lava le taimi na o atu ai ma faatino lo la manaoga ae tali mai, o se fiafiaga tele mo i laua lea tulaga.
