Fautua le Palemia i sui o le HRPP o loo fia faaulu tagi o le palota, e onosai ia e lē o se mea umi foi le lima tausaga
O le Aso Lua o le vaiaso lenei pe a ta le 4 i le afiafi e tapunia ai le sefulu aso o loo aiaia e le tulafono e tatau ona faaulu ai ni tagi o le palota. O le sefulu aso lea na amata faitau mai i le aso Faraile 11 o Mati 2016 na faasilasila ai le faaiuga aloaia o le faigapalota.
E lē faitauina ai Aso Toonai ma Aso Sa faapea le Aso Faraile o le Eseta ma le Aso Gafua le aso malolo o le Eseta. O le a iloa ai pe fia ni tagi auā e oo mai i le amataga o le vaiaso nei e na o le tasi lava le tagi ua mautinoa o le mataupu lea mai le Itumalo o Alataua i Sisifo o loo tagi ai lē na avea ma faipule le tofa Lafaitele Patrick Leiataualesa faasaga i le sui faipule tamaitai na manumalo le afioga Aliimalemanu Alofa Tuuau.
E iai nisi mataupu na faaulu i le Aso Faraile ua mavae ae sa lē mafai ona mautinoa tonu poo fea itumalo a o suafa o sui o loo tagi. O le tele o mataupu o loo laumanuia ai ni tagi o le palota o le va o sui o le HRPP sa lē faamanuiaina faasaga i nisi o sui ua manumalo ma avea nei ma faipule o le Palemene. O le mafuaaga lea o se fesili i le alii Palemia poo le ā sana saunoaga ia i latou nei o sui tauva o le HRPP ua toe ave tagi i le faamasinoga.
“O le fautuaga lava ia o le lima tausaga e lē o se mea umi, tuu le avanoa i lea sui ua manumalo e tauave ai le tofi”. Ua iai ni molimau e lei faamaonia e faapea o nisi o sui sa tutu malosi e fai a latou tagi ua latou logosaia se tuualalo ua ave i ai ma ua lē faia, ae o nisi o loo tapena lava a latou molimau e lagolago ai a latou tagi o faatosina solitulafono, ma tagi o le lē agavaa o nisi tagata palota ua lesitala suafa i lola a o latou itumalo.
O nisi foi e faaulu ni tagi e oo lava ona valaau ma faatulaga mai e le faamasinoga aso o le a suesueina ai. Peitai e oo ane i le taimi ma le aso e valaau ai molimau ma tuuina atu i le faamasinoga folasaga a latou loia ae ua toe faaui i tua ma le faamatalaga a le loia ua mae‘a ona toe teuteu i tua.
O le ata lea sa tupu foi i nisi o faigapalota ua mavae lea sa laumanu‘ia ai tala ua togi tupe e le sui na faasaga i ai le tagi o faatosina palapalā, le sui na tagi ma ua faamuta ai ma le mataupu. O se tasi lea o faiga faaalatua o loo ta‘utino mai le ofisa o le komesina o faigapalota e ogaoga ma a iloa ma mautinoa ni faiga faapea e tatau ona molia le sui na tagi ma le sui na faasaga i ai le mataupu i le faia o ni auala faaalatua e natia ai se faiga solitulafono sa tatau ona suesueina e le faamasinoga ma faia i ai se faaiuga.
O le molimau ua oo mai na ta‘ua ai e faapea e oo loa se mataupu i le tulaga lea o le teuteu i le ave o se tupe e toe ave ai i tua se mataupu o le palota, gūgū loa Sakaria ua lē gagana.
O se mataupu o loo nunumi ai le toatele, ona afai foi la o le tuualalo lea a le taitai o le atunuu ua ave i sui o lana vaega o loo fuafua e fai tagi faasaga ia i latou ua manumalo mai tofi ona o faiga faatosina faasolitulafono, o le latou fesili la, faamata e iai se mutaaga o nei faiga faasolitulafono i isi palota oi luma, pe afai o le faiga lava lenei, e aumai le avafatafata ma ituaiga o lagona faapea i le vafealoai faaletagata e taofi ai le faia o le mea tonu, ina ia faasala pe faasa‘o le tagata o loo soli le tulafono? O le tagi talatala a nisi, e leai ma se malosi o lea tulafono.
