Ua mae‘a nei ona fausia le maota o le pulega o le faigamalo fou a le vaega faaupufai o le HRPP ina ua faalauiloa e le Palemia suafa o Minisita Lagolago fou e to‘a sefulutolu. O le a galulue i latou faatasi ma Minisita e 13 na muamua faalauiloa o le saofaiga a le Kapeneta fou, o le paeaiga faapalemene lona 16 ua mae‘a ona faatauto i le tuanai o le faigapalota i le aso 4 o Mati 2016.
O nisi o faipule sinia o le HRPP sa i totonu o le Kapeneta i le paeaiga ua mavae atu a le Palemene le afioga Faumuina Faaolatane Tiatia Liuga, ma Lauofo Fonotoe Nuafesili Pierre Lauofo, ua lē filifilia foi i tofi minisita lagolago.
Na mautinoa lea tulaga i le afiafi o le Aso Faraile ua mavae ina ua aofaga potopoto uma minisita o le Kapeneta ma nisi o sui faipule o le faafaletui i le potu fono o le kapeneta mo le fofogaina o Minisita Lagolago ua filifilia.
E tele tala sa salalau i le tuanai o le isi fono a le faafaletui i le vaiaso lava na tea nei e faapea na talanoaina ai le filifiliga o minisita lagolago. Fai mai se lipoti sa faaleo ai i le fonotaga le tatau ona filifili lava e le minisita o le kapeneta lana minisita lagolago.
Peitai sa maua se avanoa e fesiligia ai se tasi o faipule o le HRPP pe moni lea lipoti ae na ia faaalia, “E lē fetaui lena tulaga i lo‘u taofi auā e mafai ai lava ona filifili e le minisita lana lana uo mamae poo lana tama e lelei le la masaniga”. E lei manao le faipule e faailoa lona suafa ae o ia le isi minisita lagolago ua filifilia.
I Minisita na toe filifilia mai i le palota e aofia ai le Palemia ma le Sui Palemia, o le tofa Lauofo Fonotoe Pierre e lei toe filifilia e le Palemia i se tofi minisita ma sa lē oo foi lona tulaga lagolagoina i le sailiga o se sui taitai o le vaega faaupufai. O lea foi ua lē maua sona tofi minisita lagolago.
O Faumuina Faaolatane Tiatia Liuga, sa i le Kapeneta o le faigamalo ua tuanai atu nei ae na faamavae lea na tofia ai loa le faipule o Satupaitea le afioga Lautafi Fio Selafi Purcell ma toe atoa ai le 13 o minisita i le paeaiga lava ua tea atu nei. Ua lē filifilia i le Kapeneta ma ua lē faamanuiaina foi i se tofi minisita lagolago, ae sa avea ma minisita lagolago i le faigamalo ua mavae.
O se isi faipule sinia o le HRPP sa seei i tofi minisita o le Kapeneta ae ua lē maua se minisita lagolago, o le afioga i le tamaitai faipule Gatolaoifa‘ana Amataga Alesana Gidlow, ae sa ia umia lea tofiga i paeaiga e lua ua tuanai a le Palemene. O lana paeaiga muamua na manumalo ai i le palota tele o le 2001 na avea ai ma minisita o le Matagaluega o le Soifua Maloloina.
I le na o le 13 o minisita lagolago ua iai nei e fua i le aofaiga o minisita o le Kapeneta, ua laki le faipule o Faleata i Sisifo sa malosi i le Tautua Samoa ae na faamavae ma suia lana lagolago i le HRPP i le palota ua mavae.
O le tofa Lealailepule Rimoni Aiafi o le minisita lagolago lea o le Matagaluega o Fesootaiga ma Faamatalaga Faatekonolosi lea o loo iai foi ma le puleaina o le leitio o le 2AP. O se tasi o tamalii sa avea ma faipule ma minisita i nisi o paeaiga ua tuanai a o avea le afioga Tofilau Eti Alesana ma Palemia o le tofa Faasootauloa Pati Taulapapa ua avea nei ma se tasi o minisita lagolago.
O ia le isi faipule pito i matua ma tele tausaga o le soifua ua filifilia e lona itumalo mai le palota ua mavae. Ua faaalia e se tasi o ona alo ua valusefulu ma ona tupu tausaga o Faasootauloa Pati.
O le isi tamalii sa tulai muamua foi i le tofi faipule o le Palemene ae ua toe manuia mai i le palota o le tausaga nei o le afioga Alai‘asa Sepulona Moananu o le isi lea minisita lagolago.
Sa tulai muamua mai i le taimi o lua nofoa o le itumalo o Salega i le Palemene i lona suafa Tapuai.
E toafitu faipule o le paeaiga ua mavae ae ua toe filifilia mai le palota tele o le 2016 ua toe seei i tofi minisita lagolago ma o sui foi o le HRPP.
O le afioga Peseta Vaifou Tevaga‘ena, Taefu Lemi, Amituanai Fagaivalu Kenrick Samu, Lenata‘i Victor Tamapua, Sooalo Mene ma Seiuli Ueligitone Seiuli.
O faipule fou na faatoa filifilia mai i le taunuuga o le faigapalota o le tausaga nei o Tuifaasisina Misa Risati Leleisiuao Palemene, Salausa Dr John Ah Ching, Mulipola Leiataua Laki, ma Tofa Li‘o Foleni Li‘o.
Minisita & Minisita Lagolago & Matagaluega 2016-2021
Palemia & Minisita: Tuilaepa Sailele Malielegaoi (Lepa)
Minisita Lagolago: Peseta Vaifou Tevaga (Faasaleleaga Nu4)
Matagaluega o le Palemia e aofia ai le Ofisa o le Kapeneta; Matagaluega o le Va-i-Fafo ma Fefaatauaiga; Ofisa o le Loia Sili a le Malo; Komisi o Galuega a le Malo.
Sui Palemia & Minisita: Fiame Naomi Mataafa (Lotofaga)
Minisita Lagolago: Taefu Lemi Taefu (Falelatai & Samatau)
Matagaluega o Punaoa Faalenatura & Siosiomaga
Minisita: Lautafi Fio Selafi Purcell (Satupaitea)
Minisita Lagolago: Tuifaasisina Misa Lisati Leleisiuao (Palauli Sasa‘e)
Matagaluega o Pisinisi, Alamanuia ma Leipa; Matagaluega mo Faalapotopotoga Tumaoti; Pulega o Tagata Tafafao Maimoa Mai Fafo; Faalapotopotoga o Eleele a Samoa
Minisita: Tuitama Dr Talalelei Tuitama (Aana Alofi Nu1 Sasa‘e)
Minisita Lagolago: Salausa Dr John Ah Ching (Faleata Sasa‘e)
Matagaluega o le Soifua Maloloina
Minisita: Sala Fata Pinati (Gagaemauga Nu1)
Minisita Lagolago: Amituanai Fagaivalu Kenrick Samu (Aleipata Itupa i Luga)
Matagaluega o Leoleo & Falepuipui
Minisita: Sili Epa Tuioti (Faasaleleaga Nu1 Sasa‘e)
Minisita Lagolago: Mulipola Leiataua Laki (Aiga i le Tai)
Matagaluega o Tupe, Faletupe Tutotonu a Samoa ma le Faletupe o Atinae a Samoa
Minisita: Faimalotoa Kika Iemaima Stowers (Gagaifomauga Nu1)
Minisita Lagolago: Tofa Li‘o Foleni Li‘o (Faasaleleaga Nu3)
Matagaluega o Tina ma Tamaitai, Atinae o Nuu ma Afioaga & Aga Fesootai
Minisita: Laaulialemalietoa Polataivao Leuatea (Gagaifomauga Nu3)
Minisita Lagolago: Faasootauloa Pati Taulapapa (Gagaemauga Nu2)
Matagaluega o Faatoaga & Faigafaiva ma le Faalapotopotoga o Suesuega Faasaienisi a Samoa-SROS
Minisita: Afamasaga Lepuiai Rico Tupai (Aana Alofi Nu3)
Minisita Lagolago: Lealailepule Rimoni Aiafi (Faleata Sisifo)
Matagaluega o Fesootaiga & Faamatalaga Vavave Faaneionapo
Minisita: Faaolesa Katopau T. Ainuu (Vaimauga Sisifo Nu2)
Minisita Lagolago: Lenatai Victor Tamapua (Vaimauga Sisifo Nu1)
Matagaluega o Faamasinoga & Pulega Tau Faamasinoga
Minisita: Tialavea Feo Leniu Tionisio Hunt (Vaa o Fonoti)
Minisita Lagolago: Sooalo Umi Feo Mene (Gagaifomauga Nu2)
Matagaluega o Tupe Maua
Minisita: Papaliitele Niko Lee Hang (Tutaulaga Sasa‘e)
Minisita Lagolago: Seiuli Ueligitone Seiuli (Sagaga le Usoga)
Matagaluega o Galuega, Felauaiga & Galuega Tetele a le Malo
Minisita: Loau Sola Keneti Sio (Sagaga le Falefa)
Minisita Lagolago: Alai‘asa Moefaauouo Sepulona Moananu (Anoamaa Sasa‘e)
Matagaluega o Aoga, Taaloga & Aganuu
