O le masina fou o le a feagai ai se Samoa ua molia e le WINZ i le lē ta‘uina i le malo ua maua le galuega ma faigaluega, ae o loo maua ma le Penifiti.
O le falepuipui lava le tulaga e oo i ai ma e lē tio foi i le malo, ona o tagata o tatou, e na ona o i le lotu, ae a oo i mea tau tupe, ua lē iloa ta‘u le sa‘o.
O le Penifiti o le tupe mai i le malo mo tagata e lē mafai ona faigaluega ona e mama‘i, e lē mafai ona faigaluega.
E maua foi tupe a tagata ua leai se galuega.
Ia manatua o afu o tagata faigaluega uma o Niu Sila lea e maua ai le tupe lea e totogi atu ai e le malo Penifiti.
E leai se isi e fia faigaluega ona e fiafia e faigaluega, o tagata faigaluega uma, e faigaluega ona o le fia maua o tupe e ola ai aiga ma fanau, ma totogi ai fale ma aitalafu masani a aiga.
Afai o e ola i le Penifiti, ae maua sau galuega part time e maua ai se isi fasi tupe, o lou tiute o le ta‘u o le sa‘o ia WINZ. E lē faapea e logo loa WINZ ona lē maua loa lea o se tupe o le Penifiti. E iai a vaega o le tulafono, e faataga ai ona maua se isi vaega tupe, ma maua pea ma lau Penifiti.
Ae a faapea e te maua le Penifiti, ma sau galuega part time, ae lē logoina le WINZ, a maua e le malo pe lipoti oe e se isi i le tulafono, o le falepuipui lava le mea e oo i ai.
Manatua o afu o tagata faamaoni e faigaluega lena e maua ai e le malo tupe e totogi ai Penifiti mo latou ua mama‘i poo latou ua lē mafai ona faigaluega, ona o nisi tulaga.
O le auga o lenei article ia faamanatu atu ia i latou o ola i le Penifiti i le taimi nei, tiute e ta‘u le sa‘o. E matagā le igoa o oe lea na lē ta‘uina le sa‘o, matagā lou aiga ma fanau ae matagā uma atu ai ma Samoa pe a faaalu i fafo tala o mea faapenei.
Sa tusia foi i le tatou article ia Me 2012, se fautuaga i tagata e latou te mauaina ua tuu sese e le Bank i totou o a latou tusitupe se deposit ua ave sese e le Bank i totonu o se tusi a se isi tagata.
E tusa poo le Bank na faia mea nei e ta‘ua, e falepuipui lava le tagata e ona le Bank account lea na ave sese i ai e le Bank le tupe i totonu o a latou tusitupe.
Poo le ā ni faaosoosoga ma le tele o mea totogi, aua le faatamala i mea nei e ta‘ua auā e tele le matagā ma le maasiasi e maua ai pe a falepuipui.
E lē gata i le falepuipui, e mafai lava e Niu Sila ona toe aveeseina lau Residence Permit poo lou New Zealand citizen ae toe faafoi oe i Samoa.
E sili le nofo puipuia i lo le taumafai e sue se togafiti i mea faapenei ae ua leai se mea e mafai ona toe fai. Na o le falepuipui ma tipoti le mea e feagai ma le tagata e lē faamaoni.
