Ua faailoa e le alii fomai le tofa Leausa Dr Take Naseri, o se tama talavou lea na maliu i le tausaga ua mavae ona o aafiaga o le gasegase faigata o le AIDS, e lē o iai se molimau faamoemoeina e faapea na maua ona o sana pe‘a na ta.
O se lipoti na faasalalauina e lenei nusipepa i le lua vaiaso ua mavae, o loo ta‘ua ai e se molimau mai le faalapotopotoga o le AIDS Foundation a Samoa, o le molimau lea a lē ua maliu ina ua tāpā se galuega fesoasoani mo ia mai le faalapoptopotoga.
Peitai o le faamatalaga a le alii fomai o Leausa, e leai se faamaoniga o lea tulaga. I se talanoaga ma le alii fomai na ia ta‘ua ai sa faia le suesuega a le vaega o le matagaluega o le soifua maloloina o loo nafa ma lea gasegase, ae o loo iai le talitonuga o se feusuaiga na mafua ai ona aafia lē ua maliu.
O loo soifua pea le toalua o lē ua maliu lea ua aafia foi i le gasegase e mafua mai i lona toalua. O le tasi o le fanau a le ulugalii na uma lona ola ina ua fanau mai ua aafia foi, peitai o le la fanau matutua e lē o aafia.
O lē ua maliu na galue i lana lava taavale laititi la‘u pasese. O le alii fomai na faia le sailiiliga i lē ua maliu a o soifua ina ua aafia i le gasegase, e lei maua se fesootaiga.
Ae o le saunoaga a le alii fomai o Leausa Dr Take Naseri, o le taunuuga o lea suesuega e lē o mafai foi ona ia silafia seia vaganā le fomai na nafa ma le galuega. O faamatalaga uma e fesootai ma i latou ua aafia i le gasegase e lē mafai ona faasalalauina e pei o o latou suafa, ma nuu.
O se tasi lea o puipuiga malu e liolio i ai le matagaluega o le soifua maloloina ina ia maua ai le tulaga saogalemu o ē ua maua mai ni tuua‘iga poo nisi tulaga pe a silafia e tagata lautele.
O Samoa e pei ona faaalia e Leausa Dr Take Naseri, ua lē toe agavaa i ni fesoasoani e togafiti ai le AIDS mai le faalapotopotoga o lenei gasegase o loo faia togafitiga i atunuu uma o le lalolagi.
Faaalia e le alii fomai ua mafua lea tulaga ona e ui lava ina faapea ua aafia tagata i Samoa, ae e laitiiti le numera o tagata ua aafia pe a fua i le faitauaofai o tagata i Samoa.
Ua na o fesoasoani o loo auala mai i le faalapotopotoga o le soifua maloloina o le lalolagi le WHO o loo maua ai nisi o fesoasoani mo le togafitia o le AIDS i Samoa, faapea ma polokalame tau aoaoga mo le tetee atu i le gasegase. E toavalu tagata ua maua i le gasegase o loo soifua pea ma o loo togafitia e ala i vai ma fualaau.