“Faafetai tele Masa Zoll auā ua fai oe ma faamanuiaga mo matou uma ma o matou olaga.” O le leo lea o le faafetai na momoli ai saafiafiga alofa o le falefa a le Ekalesia Emanuelu i Aukilani nei i lo latou tina matua o Masa Zoll lea na latou faatinoina ai le faamanatuina o le 90 tausaga o lona soifua.
E maoa‘e foi le finau a lenei tina auā o le isi lenei toa sa na finauina malosi le gasu o le vaofilifili i le vaitaimi ma le vaitau sa faatoa afua mai ai le tau faaolaolaina o le lotu i totonu o Aotearoa nei.
O lona uiga o le isi lea toe Ulutaia o le tala lelei ua iloga sona aogā ma sana tautua aemaise foi o lona sao i le faataunuuina o le finagalo o le Atua e ala i le atinaeina ma le faavaeina o le Ekalesia i le manumaloina mai o agaga o tagata mo le malo o le Atua.
O lenei faamoemoe sa saunia lelei e aulotu a le Ekalesia Emanuelu (Emmanuel Christian Ministries) i le Aso Toonai na mavae atu nei. Na faamuamua lava foi mea i Matautusa i le saunigalotu na saunia lava e le susuga i le faifeau Ps Mika Lagavale ma o ia foi lea o le perisetene o le Ekalesia.
E le gata o le tapenaga ma le faataunuuina o le viiga i le Atua ona o le soifua galue ma le auaunaga ua afu a le tina, ae sa faapena foi ona fai o ia ma sui na momoliina le loto faafetai ma le agaga fiafia tele o tagata lolotu i le tina, e tusa ma lana galuega sa gapatia ma oloia ai lona soifua ona o lea ua matuā tulaga manuia ma olaola le Ekalesia i ona vaega uma.
Sa maua foi le avanoa na faafofoga ai le aofia ma le mamalu o le auvalaaulia i ni saunoaga molimau a alo o le tina aemaise foi o sui o le Ekalesia. Ma na molimauina ai le tele o le galuega sa feagai ma le tina o Masa ma nisi o sui o ē sa mua i malae i le tauasa maiga o le amataga o le galuega tala‘i aemaise o le faaolaolaina o le atinaeina o aulotu i totonu o Niu Sila.
O se mafutaga matagofie na saunia lelei e le Ekalesia aoao sa mafuta ai ma toe feiloai ai le toatele o tagata lolotu, o uo ma aumea mamae a le tina aemaise o susuga i faifeau mai lala eseese o le Ekalesia ua tupu olaola ma faasalalau i Aotearoa. Sa matuai fuli foi mafutaga a tina o aulotu taitasi e faaali lo latou fiafia i le tina e tusa ma faafiafiaga faaleagaga na tapenaina lelei auā lava le faafiafiaina o le tina faapea foi le mamalu o le au valaaulia.
Mo le tina ia Masa Zoll, malo le soifua lagimaina, viiga lava o le Atua e lē faaitiitia ona o oe ma au galuega lelei uma.
Manuia tele lou aso soifua ma ia saga faaopoopoina atili nisi aso ma nisi tausaga se tele mo lou soifua auauna ma maua ai pea le mafutaga ma oe le tina. O alofaaga mo oe mai susuga i faafeagaiga uma ma o latou faletua, o sui uma o aulotu Ekalesia Emanuelu aoao, o ou aiga uma lava i Aotearoa nei ma soo se tafa o le lalolagi o alala mai ai nisi sui, o au uo ma aumea mamae aemaise lava alofaaga ma faamanuiaga mai ou alo pele uma.
sayo
