Manatua Ligaliga Fusi ma lana auaunaga!
O le lutia o tatou i taimi faigata ma le oo mai o puapuaga, e tasi lava se lagona e oo mai, o le fia maua lea o se fesoasoani. O taimi o le valaau paia a le Atua, e ala i le oo mai o le maliu ma le oti, o se taimi faigata tele, ona e fai o lagona ootia ma le fanoanoa ona o le mafutaga motusia i le tino nei.
Ae o le a sili ai, pe afai o faailoga fesili pea ma le mautinoa, poo fea e taunuu i ai le malaga a lē ua tuua aiga ma uo pele, pe ulufale i le isi soifuaga e sili atu i le olaga nei, i le manuia e faavavau, ia poo le nofoaga foi lea e fai ma talasuaga a le toatele, o loo iai le tagitu‘i ma le lilivau o nifo, ma le oi ona o le oti faalua e faavavau. Peitai o le famasinoga lea o le tagata lava ia, auā e tutu taitoatasi lava tagata uma i luma o le nofoa faamasino e tasi o le Atua, sa tatau ai ona faia se filifiliga poto ma le mautinoa, a o maua le malosi ma soifua i le olaga nei. Ae peitai o tatou o totoe ma soifua pea, o le a faaauauina manaoga o lē ua maliu, i le tapenaina o vaega uma e masani ai i fuafuaga ma faatatauga i toe taimi, ma toe aso o lē ua maliu. E iai le manatu, o le mafuaaga tonu lea, ua tuuina atu ai se taumafaiga vaivai i le auaunaga a le Samoa Times, ina ia faatupu manatu, ma ia lautele ai le silafia o nisi o aiga o loo manaomia taiala ma se faamāmā avega i taimi o mafatiaga ma faanoanoaga.
O le fesoasoani a le fale faasausau o Ligaliga ma le aufaigaluega poo le Ligaliga Fusi Funeral Services i Magele, ua ofoina mai ai nisi o faamatalaga tāua ma le aogā, ina ua tapa ma fesiligia e le Samoa Times, aemaise lava i taimi o le maliu. Ona talu ai o lenei foi auaunaga, ua lē gata ina ua loa ma ua leva, a ua tauleleia foi lona igoa i le va ma tagata lautele, ae sili ai o le silasila ma le maitau a le faalapotopotoga o falemaliu uma i Niu Sila.
E le gata i lea, ae o le isi itu tāua tele, ona o loo tautua Ligaliga i Niu Sila, ae faapea foi ma Samoa. Peitai, o se feiloaiga ma le faauluuluga o le kamupani, le susuga ia Filipo Philip Ligaliga, sa ia faamaonia mai ai e faapea, e lē o toe mamao ona tatalaina lea o se isi ona lala i Brisbane i Ausetalia. O loo faagasolo ni galuega amata mo lea foi faamoemoe i le taimi nei, ma le fuafuaga a lē o le faaiuga o le tausaga nei lava, o le amataga o le tausaga fou, ua tatau ona tatala ma faataunuu lea moemitiga tāua.
Ae o se feiloaiga ma le tamaitai pule o loo vaaia le lala i Aukilani, le susuga ia Camellia Ligaliga-Lavea, sa ia faasoa mai ai le tele o vaega o loo fai ma faafitauli i le mamalu o le atunuu i taimi lava o le maliu o se tasi o le aiga.
E eseese nofoaga e ono tupu ai le maliu, o totonu o maota ma aiga, o le falemai, nofoaga faitele poo falefaigaluega foi. Ae o se saunoaga ma le faamāmā avega mai a Ligaliga Fusi Funeral Services, ua faamatuu mai ai ia vaega tāua, e faia pe a faafuasei mai le valaau a le Atua.
Maliu i totonu o maota poo totonu lava o le aiga
Saunoa Camellia, afai e maliu se tasi i totonu o lona maota ma lona lava aiga, ia muamua logo pe faafesootai lana fomai faaleaiga (family doctor). A lē o lea, ia faafesootai sa‘o se ofisa o leoleo o tau lalata ane, i le vaega o auaunaga mo tagata lautele. A lē o lea, ia fesootai loa se fale maliu e manatu i ai, latou te tauaveina le galuega. O le falemaliu foi, o le a fesoasoani tele ane, mo nisi o faamatalaga ma gaioiga e tatau ona faia muamua. Ia manatua o le fomai faleaiga a lē ua maliu e faafesootai, ae lē o le fomai a i latou o loo faamaopoopoina lea tulaga, se‘i vaganā o loo faaaogāina se fomai lava e tasi, e lē gata i lē ua maliu ae faapea foi le aiga. O le tāua o le fomai faaleaiga, ona o ia tonu lea na te faamaonia le tagata ua maliu, auā o ia foi lea o loo taulimaina faamaumauga ma faamatalaga uma o lea tagata. O le a fesoasoani tele lea mo galuega a leoleo, pe afai e sailia le mafuaga o le maliu. O le fomai faleaiga foi la, o le ia sainia le pepa faamaonia o le mafuaga o le maliu. Ae o vaega sili nei ona tāua mo aiga, poo le tagata foi o le a fai ma sooupu i le va ma le fomai poo leoleo.
Ia mautinoa, e ao ina faaaogāina le suafa faaletulafono (legal name) o lē ua maliu, mo soo se vaega lava e tapa, poo fomai, leoleo, atoa ai ma le falemaliu. Aua le faaaogāina se suafa matai, pe afai e lē o i totonu o pepa faaletulafono sa faaaogāina, se‘i vaganā o iai nisi faamaoniga. E sili ai pe a faaaogā pea le suafa o loo i faamaumauga a le fomai, pe afai e tutusa ma le suafa o loo iai i le tusifolau, pepafanau, poo le tusi faamaonia o le sitiseni. O le a faigofie tele lea, mo le tapenaina o le pepa maliu e pei ona manaomia i feuiaiga uma ma fuafuaga ma isi ofisa o le malo ma pisinisi tuma‘oti.
Sa ta‘ua e Camellia, o le faafitauli tele lea i le tele o aiga o loo latou maitauina i le tele o tausaga e oo mai lava i le taimi nei. Ona e manatu māmā tele i suafa o loo faaaogāina, peitai e faia le galuega a le fale maliu, i taiala ma tulafono a Niu Sila ua mae‘a ona faatulagaina. O nisi o aiga, ua ese le suafa e ta‘u i le fomai, ona tusia loa lea o le pepa maliu i le suafa sa tau i ai, ae mulimuli ane ese foi le suafa o loo i faamaumauga tāua e pei o le tusifolau ma le pepafanau, poo le pepa foi o le sitiseni.
E ese foi le suafa e faailoa i le falemaliu. O ia esesega uma, o le a faafaigata tele ai galuega uma, aemaise ai o le faatumuina o le pepa lesitala mo le maliu, auā o ia galuega uma, o loo faagaioi mai Ueligitone. O le a tele foi se taimi e faatali ai, pe afai ae iai nisi suiga e toe faia mulimuli, ona o le eseese o suafa o loo faamatuuina e sui o le aiga poo le fanau foi.
Maliu i le falemai, poo maota o tagata matutua ma nofoaga tuma‘oti (Rest homes & Hospice or Private)
O le a tele se fesoasoani e maua ane pe afai e maliu i totonu o nofoaga e pei ona ta‘ua. Ae mo le aiga ma fanau, e ao ina latou faafesootai ma logo se falemaliu e manatu i ai latou te tauavea le galuega. O le a oo atu lea auaunaga, ma tuuina atu nisi faamatalaga e manaomia, atoa ai ma le tauaveina loa ma le faagaioiga o le galuega. Ae o nisi nei o vaega tāua e ao foi ona sauni i ai ma faataunuuina.
Ia faailoa i le falemaliu, le umi o le a taoto ai le tino maliu i totonu o le latou nofoaga, ina ia mautinoa ai le ituaiga togafitiga talafeagai e tatau ona faia i ai. Ia tutusa le suafa o lē ua maliu, o loo i isi faamaumauga, ma le suafa e ta‘u i le falemaliu. O vaega tāua e ao ina mautinoa, o le aso soifua, o pepa faamaonia o le suafa (ID), o le tuatusi ma le suafa lava o loo i faamaumauga a le fomai faaleaiga. O le falemaliu o le a latou lesitalaina le maliu, atoa ai ma le faagaioia o le pepamaliu (Cause of Death).
Ia toe faamanatu atu lava, e tāua tele le tutusa o suafa e faaaogā i vaega uma lava, mai le amataga o talanoaga seia oo ina mae‘a galuega i matata eseese, ma faatofa atu i sē pele i aiga ma uo. Sa ta‘ua foi e Camellia e faapea, o nisi foi aiga, ua mananao e sui le suafa o lē ua maliu, mo le taimi e faatumu ai le pepa lesitala. E mafai ona faia lea suiga pe afai o taulimaina ni faamaoniga faletulafono, ae ia manatua e tatau pea lava ona sainia ma faamaonia (certify) e le fomai, JP, poo se Loia, soo se suiga e fia faia. O soo se suiga e fia faia, ia faia a o lei lafoina le pepa mo le lesitala.
E faigata tele ona toe fai se suiga, pe afai ua mae‘a ona lafo le pepa talosaga mo le leistalaina o le maliu. Saunoa Camellia, e mafai foi ona faia i ai se fesoasoani, peitai o le a umi se taimi e faatali ai mo lea tulaga, ona e tele vaega e toe manaomia mo lea suiga.
O le mafuaaga tonu lava lea, na mafua ai ona manatu e ao ina faapupula ma toe faamanino vaega uma i taimi e afea ai aiga i le oti poo le maliu. E iai foi le tulaga o fesoasoani o loo ofoina e le malo, e tauala i le Matagaluega o le WINZ. O le funeral grant, poo fesoasoani tau seleni mo maliu, e mafai ona talosagaina e aiga uma. Ae e ao lava ona manatua le mea lenei e tasi, ona e tāua tele i soo se fesootaiga lava e faia. Ia sa‘o le suafa, pe ia mautinoa e tasi lava le suafa o loo faaaogāina i le pepamaliu, ma pepa o le faatumuina mo le talosagaina o lea seleni mai le malo (funeral grant, WINZ).
E mo i latou e maliliu a o iai i ni asiasiga poo tafaoga i totonu o Niu Sila, ona talu ai e mautinoa foi e lē o iai ni a latou fomai faaleaiga tumau, o lona uiga e tatau lava ona logo leoleo mo lea tulaga. Ona e lē mafai e se fomai ona faamaonia lea tagata, ona e lē o iai ni ona faamaumauga ma faamatalaga e uiga ia te ia. Ae afai e manomia se fesoasoani, e mafai lava ona valaau se falemaliu poo le auaunaga a Ligaliga. Sa toe faamalamalama foi e Camellia se tasi o fesili e masani lava ona fesiligia ai la latou tautua. O nisi e valaau ane ma fesili, Pe fia le totogi pe a umi ona taoto le tino maliu i le falefaasausau.
O le tali mautinoa o lea fesili, pe afai foi o iai nisi e fia sialfia lea tulaga, e leai se matou pili faapitoa e tusa lava poo le ā le umi. O le tau lava e avatu i le amataga o se talanoaga, e na o le pau lava lena o le totogi. E lē totogia le matou auaunaga i le umi poo le puupuu foi o le taimi, o lona uiga e mafai lava ona taoto inei ia Ligaliga le tino maliu mo le lua, tolu vaiaso pe sili atu, e leai se tupe e toe faaopoopoina i le totogi sa faailoa atu i le amataga.
