O le tama poto e fiafia ai mātua

O le aso o seleselega fiafia, o le aso foi e ufitia ai le tagata sa galue mamafa i lagona faamalieina ona ua talia ana talosaga ma tauia le tele o ana galuega mamafa i le tele o aso, a o taumafai e saili le atamai i sona tomai ua ia filifilia e fia galue ai.
O le alii o Jonas Leatio‘o sa faauuina mai ma lona faailoga o le Bachelor of Social Work mai le aoga a le MIT e pei ona faataunuu ai lenei sauniga o le faauuga i le Aso Toonai talu ai.
O le faafetai ma le faamalo a ou aiga uma, ona ua iu manuia lou taumafai. Malo le finau atalii, faafetai mo lou ola finafinau ina ia laasia se isi sitepu maualuga o lou olaga.
O alofaaga ma faamanuiaga mai lou aiga uma, ae faasilisili mai ou mātua, le Fetalaiga Vaiolo ma lou tina ia Evelina Leatio‘o.