$60,300.00 mo le Tusigaigoa Ekalesia Hosanna Brisbane Church i Richlands mo le Malu o le Atua

Sa taumate faameataitai pe tua ma ni ā, a o lea ua  talanoa manu o le vateatea ma ua tapisa i le alofa o le Matai, o ni lagona faagaeetia ia o le susuga ia Ps Joshua Asafo Avia ma le faletua ia Hellen faapea le Ekalesia Hosanna Brisbane Church i Richlands ina ua sao ma uli le faamoemoe i le aso ananafi. E lē fiu le tagata saili malo i le Atua e ala i lana auaunaga.
O le susuga i le faafeagaiga ia Ps Joshua Asafo o se lupe faalele mai Salelologa a o le faletua ia Hellen Avia e mai Samusu i Aleipata. O i laua na uluai faavaeina mai le ekalesia Hosanna i Ueligitone Niu Sila maua ai isi ekalesia i Aukilani seia oo mai i le tausaga e 2008 na filifili ai e tuua Niu Sila mo Ausetalia.  Sa lei gata le taumafai atili e fia faaopooopo nisi ekalesia e pei ona iai nei Sini ma Melepone.
E 2 Ekalesia i Brisbane o Richlands ma Logan ma e i lalo o le faamalu o le Ekalesia Papatiso. O le 2010 sa faatauina ai le fanua o le Ekalesia Hosanna i Richlands e 4 eka e tusa lona tau ma le $1.6miliona lea e i le pitonuu o Forest Lake, ma o lea ua a‘e se tofa ina ia amata faagasolo se galuega mo le ‘Ala o le Atua e afua ai le faamoemoe lea sa faataunuuina i le Aso Toonai, 25 o Me.
O le hall a le Ekalesia EFKS Ipswich (Toeaina ia Rev Kerita & Binary Reupena) sa faataunuuina ai le tusigaigoa. Sa ta‘ua e le sui o le leitio sa auai le susuga i le a‘oa‘o ia Terry Filimaea Fauea, na lagona lona agaga faagaeetia i le maoa‘e ma le fai mea mafai o le aulotu aemaise le agalelei o tagata.
Sa faasolo ipu a matafale e 47 a le Ekalesia aemaise le auvalaaulia ma sa matuai matagofie le faamoemoe e ala i le opogi ma le lagolagoina o le faatalauula mai a le Ekalesia Hosanna Brisbane Church na o latou tauaaoina ai se seleni paia e $60,300.00.
O le Fofoga o le aso o le aao tusitusi lea o le Ekalesia, le tofa i le matua ia Aupeipeigamalie Tapuala Faalelei (Satapuala). Sa maualuga le faamoemoe i le auai o auauna paia a le Atua, Susuga ia Ps Manuia & Ruta Aloalii (Hosanna) Toeaina ia Ps Andrew & Lagi Schmidt (Voice of Christ); Rev Leuli Anamani & Tagiilima Logo (Evagelia Uesiliana Metotisi Goodna); Ps Tofilau & Barbara Tua (Voice of Christ); ma nisi faifeau ua lē māua aemaise le loaloa o le atunuu.
O loo faaauau pea sailiga seleni. Na mae‘a le taumafataga sa saunia e le ekalesia, ona alo lea e tali le maau o le atunuu e ala i faaaloaloga sa feagai lava ma le failautusi a le Ekalesia. O le tofa ia Pou‘oa mai Lufilufi sa faaleoina se agaga faafetai mai le aufaigaluega a le Atua ma le auvalaaulia.