Ina ua feagai ma le faamanatuina o le Tausaga Fou sa maua le avanoa e lotu ai le Sooatulau i le Ekalesia Metotisi i Papatoetoe i la latou lotu faaiu o le faamanatuina o le Tausaga Fou. Le lotu lea e faaigoa e le Ekalesia Metotisi o le “Lotu o le Faauma”.
O le 25 minute a o lei amataina le sauniga sa faamoemoe mo le 10 i le po lea 31 o Tesema 2012, na taunuu ai i le malumalu i Papatoetoe ma vaaia ni tamā se toatolu e laei papae o talanoa mai, i se tulimanu o luma lava o le hall i autafa o le falesa.
Na ma savavali atu ma lo‘u toalua ma faatalofa ma ta‘u i ai o ma igoa e pei lava ona masani ai se feiloaiga pe a lē masani le isi i le isi. Ua matou talanoa mo sina taimi puupuu, ona matou faamavae lea ae ma o i totonu o le malumalu e sue ni o ma nofoa.
O le taimi ua lata ina amata le sauniga, na susū atu le faafeagaiga ma usu loa le viiga amata e le aufaipese ma le aofia ma faasolo loa le tapuaiga, seia oo ina faasolo mai le polokalame o lauga o le po.
Na uluai faatalofa mai le faifeau i le Ekalesia faapea foi ma malo na faatasi atu i lea po. Uma le tatalo sosoo ma le pese, amata loa ona faalau mai tootoo o le po. Ua faalogo atu ua lau mai ai ma le igoa o le tamā o le aiga. Ia na talia fiafia le valaau mai e fai so ma sao i le po matagofie.
Na vaaia le sanisani o le aulotu e faafeiloai le tausaga fou aemaise foi o le laufofoga fiafia i la matou mafutaga puupuu i lea po faaiu o le tausaga.
Na mae‘a tootoo e tolu o le po sosoo loa ma le lauga matagofie saunia lelei mo le faaiuga o le tausaga e le susuga i le Faafeagaiga. Na tuua le sauniga matou o matamata i galuega tetele e tolu a le Ekalesia ua mae‘a ona fai: O le hall, maota o le faifeau ma le malumalu matagofie.
O nei galuega na fai faatasi lava i le taimi e tasi, ma e ofo i le filifiligā o le aulotu ma le malolosi e tautua le galuega ona o nei galuega tetele e lē taugofie. Na maua le tala fiafia ua lē o toe mamao ae mae‘a ona totogi nei galuega tetele.
O nai tagata sa matou lē masani ua omai faatalofa mai ma faamalo mai e tusa o le sao na faasoa ai i lea po. E lei lagona se matamuli ae na faafiafiaina i ma‘ua i le faamasani tagata o le Ekalesia ma le vaaia o le laufofoga fiafia faatasi ai ma si o latou faifeau.
Manaia le agaga faamasani tagata a lenei ekalesia ua amata ai le Tausaga Fou. Faafetai tele foi mo le mōli matagofie na faasoa mai mo maua. Ia saga faamanuia atu faasautualasi le Atua i lona tamaoaiga i luga ia te outou uma. Ia manuia tele galuega o le tauatina‘eina o le ekalesia i ona maota matagofie. Ua outou faia lava mea sili ma outou manumalo ai.
