Ua taunuu i Samoa se vaega e toalima o alii ma o alo lava foi o le atunuu na a‘oa‘oina i tomai tau palama ma ua faauu ai mai aoga matata eseese, a le WelTec ma Whitireia.
O le latou malaga atu ina ia fesoasoani i nisi o galuega laveai ae le Pulega o le Suavai, le Samoa Water Authority, i mafatiaga o loo feagai ai ma le atunuu talu mai faatama‘iaga a le afā o Eveni.
O lenei polokalame fou a le malo na faia, ina ia aooga fua ai i le aoga o matata eseese mo le tausaga, nisi i tomai faakamuta ma le faapalama, auā le fesoasoani atu i le aai o Kalaiesetete ma ona foi mafatiaga talu mai le mafuie tele na aafia ai.
Ae talu ai le tulai mai o mafatiaga i le atunuu ona o le afā talu ai nei, o lea ua moomia ai e Samoa se fesoasoani, ma ua agai atu ai nei alo o Samoa e faaaogā i ai lo latou tomai na maua mai le aoga a Whitireia ma WelTec.
E iai le manatu e tasi le masina e galulue ai nei alii Samoa i totonu o le atunuu a o lei toe foi mai. Sa faia se sauniga aloaia i Ueligitone i le Aso Lua talu ai, aso 22 e faamavae atu i lenei aumalaga o alii Samoa e toalima, faatasi ai ma lo latou faiaoga i le palama, o Ken Hodge. O le sauniga sa taitaia e Jackie Frizelle – lea ua lē o toe umi ona avea lea ma Hai-Komesina o Niu Sila i Samoa.
Sa auai atu foi i lea sauniga le Hai-Komesina o Samoa i Ueligitone, faapea foi nisi o susuga i faafeagaiga o ekalesia Samoa i Ueligitone.
Sa faailoa e le tamaitai o Ms Frizelle vaega uma o le a aofia i galuega fesoasoani a i latou e toalima o le a malaga, aemaise foi aafiaga o loo iai le atunuu, ma le moomia tele o auaunaga nei o le a latou agai atu e faatino.
Na ia ta‘ua, ina ua oo mafatiaga i Kalaiesetete, sa lei nofonofo Samoa ae sa fesoasoani mai.
Ua tatau ai foi la ona faia faapea e Niu Sila, i le auina atu o nisi ua iai tomai faapitoa nei, ina ia fesoasoani aemaise lava mo le toe faafoisia o le suavai taumafa mo le atunuu o loo aafia, aemaise ia faatumauina ai pea faigapaaga ma le galulue soosootauau o malo e lua.
O se tasi o i latou nei o loo malaga i Samoa, o le susuga Vinglouin Faleatua (Ving). O Ving o se tamā e toalima ona alo, ma e toatele nisi o le aiga o si ona tina o loo aafia i Samoa i faatamai‘aga a le afā.
O le ala lea o le naunau tele o Ving e fia oo atu ma faatino sana galuega fesoasoani e faaaogā ai lona tomai ua iai nei.
O lagona foi na o le susuga Tufou Aitogi, lea na faauu mai Whitireia, o lona faafetaia o le malo o Niu Sila, ina ua a‘e se tofa e tuuina mai lenei avanoa mo latou e toe foi atu ai e fesoasoani i si o latou atunuu pele o Samoa. O lea ua agai atu ai nei alo poo ni tamalii foi o le atunuu, ma le faanaunauga ina ia matuā aogā se latou fesoasoani e faamāmā avega ai i nai o tatou tagata ua mafatia.
O le polokalame lenei e pei ona aooga ai i latou ua malaga atu i Samoa, sa lagolagoina e le Tertiary Education Commission e ala i avanoa faasikolasipi a le Pasifika Trades, e pei ona faalauiloa i le tausaga talu ai, 2012; ma faatino ai nei a‘oa‘oga e le Whitireia ma le WelTec.
O se tasi o vaega o lenei polokalame fesoasoasi, o loo faatupe uma ai e le Ministry of Foreign Affairs and Trade, faigamalaga ma isi uma tupe faaalu mo i latou nei a o iai i Samoa.
