O le afioaga o Salepoua‘e i Saleimoa lea ua tatala ai le polokalame fou a le Matagaluega o Aoga, Taaloga ma Aganuu ina ia mafai ona faatosina mai mātua e fesoasoani i aoaoga a latou fanau.
O aoga e ono (6) i Upolu ma aoga e fa (4) i totonu o le motu tele i Salafai, lea ua faagasolo i ai lenei aoaoga mo mātua – aemaise lava i le taumafaiga ina ia faalelei le solo i tua o le tomai o fanau i le faitau tusi ma le tusitusi.
O le faamatalaga a le afioga i le Ofisa Sili lagolago, Afioga Luatua Semi Epati, o loo fai lava le tiute a faiaoga ae e tatau ona faamalosia le pitolaau a mātua i lo latou sao, o i latou o faiaoga muamua o le fanau mai i totonu o aiga.
O le tausaga na tea nei i sailiiliga a le Matagaluega o Aoga na maua ai le maualalo o le tulaga ua iai le faitau tusi a le fanau. O iina na faalauiloa ai e le Matagaluega e ala i le Ofisa Sili, Afioga Matafeo Falanaipupu Tanielu Aiafi, o le a faamalosia le faatinoga o faitau tusi i aoga uma.
E ui o lea e lei amataina lea taumafaiga i aoga uma a le atunuu ae o lea ua agai le Matagaluega i aoga e 10 ia ua filifilia se‘i valaau mātua e agai atu ma ia faatino ni polokalame e mafai ona agai ai latou e amata mai aoaoga nei i totonu o le aiga. Faaalia e le afioga Luatua, o lea ua faamanino i mātua le tāua o lo latou sao i le taumafaiga lenei ma le vaavaai foi ina ia iai se suiga i mataupu a le fanau i aso taitasi. O le isi tiute o mātua ua fautuaina e le Matagaluega o le vaavaai lea i le aoaoina o amio a le fanau, ona o se tasi lea o faigata i lenei vaitaimi i fanau o loo feagai ai ma faiaoga.
Faaalia e Luatua o aoga ia ua filifilia o aoga aupito pa‘ū lea i le itu tau i le faitau tusi i le atunuu atoa, ma o le mafuaaga lea ua ave ai le faamuamua i nei aoga i lenei polokalame.
