O le tele o tausaga o le afusisina ma luitau o toleniga i soo se taaloga ma faagatama e lē faigofie mo alo ma fanau, ona o le tau faapaleniina o taimi mo meaaoga, taimi faaleaiga, polokalame faalelotu faatasi ai ma taaloga, peitai, o le galulue faatasi o faiaoga, (coach) ma tamaiti aoga faapea mātua, o le faamāmā avega foi lea, ae lē faatusalia na tiga pe a faaeaina ma faapaleina alo ma fanau i manuia.
O le vaiaso na tuanai atu na faamanuiaina ai se alo Samoa le alii o Ioane Brown, o se alo e faasino i le fetalaiga ia Sa‘u Osovale Brown i le Fusi Uliuli (Black Belt) o le vasega muamua (1st degree) i le taaloga o le Martial Art, ina ua mae‘a le tolu tausaga o toleniga ma le a‘otauina i le iloa ona puipuia lona ola mai faalavelave e ono lamatia ai (self defence).
E ui ina umi ma fita le ala, ae o le alaga o le faamanū ma le agaga fiafia ina ua faapaleina ma laei le atalii i le fusi sa nanau i ai lona loto, faafoi ai le viiga i le Tamā sili o i le Lagi, o se saunoaga lea a le fetalaiga ia Sa‘u, na momoli ai foi le agaga faafetai i le faiaoga le afioga ia Lupematasila Sau Gasio, o se tamalii o le atunuu ua tele tausaga o tautua i nei faalagamaea e lē gata mo alo ma fanau, ae mo soo se Samoa lava, o loo faia le tautua a L. Sau Gasio i le Hi Life Gym i le pitonuu o Tullamarine.
Na saunoa Lupematasila e silia ma le luasefulu fanau Samoa o loo ia a‘otauina i le taimi nei, ma e tele lava avanoa e ono mafai ona manuia ai i tulaga maualuluga ma fusi tetele pe a tumau pea le fiafia mo le taaloga. O lona naunautaiga ma o le finagalo foi lea o le mamalu o le atunuu o loo tulei atu pea a latou fanau, ina ia mafai ma iloa e tamaiti ona puipuia latou lava.
Momoli le faamalo a le tatou pepa mo le alii o Ioane ma lona taumafai, aemaise o fanau uma o finau mo lo latou saogalemu, faapea le tautua a Lupematasila Sau Gasio.
