1 Tesalonia 1:1 “O i matou, o Paulo, ma Suliano, ma Timoteo, o la matou tusi lenei i le ekalesia o tagata Tesalonia, o i le Atua le tama atoa ma le Alii o Iesu Keriso.”
O le tusi i le Ekalesia i Tesalonia e taofi nisi popoto o le Tusi Paia, o le uluai tusi lea a Paulo sa tusi. E ui o se tusi e laitiiti, ae o loo natia ai nisi o faaaliga tāua a le Alii.
O le tusi a Galuega o loo tau ataata mai ai le faiā ma le sootaga a le aposetolo o Paulo ma le ekalesia i Tesalonia. Lea e ta‘u mai ai sa malaga Paulo i Tesalonia mai Filipi, ma le taimi sa nofo ai ma amata faafailele le Ekalesia, ma avea o se ekalesia manuia tele i na ona po.
Ina ua malaga ese Paulo ma galue i Korinito, sa maua mai ai ni tala e uiga i le mea ua tupu i le Ekalesia i Tesalonia, ua faaseseina le talitonuga o tagata, ona o le mataupu e uiga i le toe afio mai, ma ua suia ai uiga o nisi, ua lē toe galulue.
Ua tupu foi faatasi ma fevaevaeaiga, na mafua ai ona tusi Paulo ia fesoasoani e faafilemu le ekalesia, ma toe tatai i latou i le a‘oa‘oga tonu e tatau ona iai, ma ia matuā tumau i le taimi o puapuaga.
O le fuaiupu amata la o le tusi, sa filifili ma le faaeteete e le tusitala e momoli atu ai le moni o le talalelei.
1. O le tulaga o le ekalesia i le lalolagi
O le upu “ekalesia” e sau mai le gagana Eleni o lona uiga o le “vavae ese.” Auā foi o le ekalesia e iai sona tulaga faapitoa; o le faalapotopotoga o tagata ua vave ese mai le agasala ina ia faapaiaina mo le Atua (1 Peteru 2:9). O le valaau ona o le alofa, e ala mai ia Iesu Keriso. A potopoto la le ekalesia e tapuai, latou te faafetaia e lē aunoa le alofa o le Atua, ina ua maua le ola fuataina ona o Iesu.
O le ekalesia i Tesalonia sa fetaiai ma ni luitau, ona o le aai o fetaulaiga-ala o fefaatauaiga. E tele ekalesia faapaupau e iai, ae o le malosi foi ia o tagata i le sailiga o le tamaoaiga o le tino. Ma o le aai foi e lolofi atu i ai le mau tagata eseese, ma o loo iai faatasi ma se avanoa e faaevagelia ai e le Ekalesia nei mau tagata. Auā foi o le valaauina lea o le ekalesia, ia auauna i isi ma ia fai ma molimau a Iesu Keriso.
2. O le malosiaga o le Ekalesia
O le ekalesia o le tino paia, ma e manaomia le mana o le Atua e faataunuu ai ana misiona. E maua lea matatia ina ua talia Iesu e fai ma Alii i totonu o lou olaga. E pei lava o le tala a Paulo i le ekalesia i Filipi, “Ou te mafaia mea uma lava i le faamalosi mai o Keriso ia te au.” (Filipi 4:13). O lona uiga, o le malosiaga o tatou ma lo tatou aogā i le lalolagi, e fua faatatau i le loloto o le tatou ola faatuatua ia Iesu.
O lo tatou ola faakerisiano ma le feagai ai ma faafitauli, o faaosoosoga ma mailei o le olaga nei, e faaalia uma lava ma e fua i le ola faalagolago i le mana ua tuutele mai o Keriso Iesu.
3. O le tagata e autū i ai viiga
O le ekalesia, e tatau na faatumutumu i ana tapuaiga le faaneeneeina o Iesu Keriso. O Iesu o le maa tulimanu lea o le Ekalesia. E faaaogā e Paulo nisi nei o upu e faamatala ai, ia fai Iesu ma tama autū.
(a) O ia o le Alii. O le upu lea i le faaeleni, e tutusa lelei ma le upu Ieova i le feagaiga tuai. O Iesu o ia o le Alii, o le Alii o le Atua lava ia. O le faia la o Iesu ma Alii i o tatou olaga, e tatau ai ona faamuamua o ia i mea uma, e oo lava i polokalame faatino a soo se ekalesia, ia fai faatatau uma mo le viiga o Iesu.
(e) Iesu. O le tala a le agelu ia Iosefa, e faaigoa le tama ia Iesu. Auā foi o le uiga o le igoa Iesu; o le faaola. Faaola tagata mai a latou agasala. (Mataio 1:21). O le faatāuaina la o Iesu, ona o ia o le faaola. Ua agavaa o ia e aveeseina a tatou agasala ma faaola tatou mai le oti.
(i) Keriso. O Iesu o le Mesia, o le taunuuga o folafolaga ma perofetaga ia Isaraelu, o Iesu o lē ua faauuina. O Iesu lea na te aumaia le faamoemoe ola ia tatou.
O le taunuuga o le soifuaga o le tagata, e faamoemoe lea i le tali atu ia Iesu ma lana faaolataga. Auā foi ua tele le mau tala‘iga, ma e tausisi lava le tagata ia i lana lotu ma lana talitonuga.
Ae afai ua see ese tatou mai le ute, poo le faavae o le Ekalesia – o Iesu, o le a fai a tatou Ekalesia ma ekalesia vaivai, ua leai se malosiaga faaleatua, ma ua toilalo foi lo tatou ola molimau mo ia.
E lē gata i lea, o le a avea tatou ma tagata lolotu, ae ua augapiu ma se moni e aliali i o tatou olaga e faatatau i le mana toetu o le Alii o Iesu Keriso, lea tatou e taulagi, o tatou o fanau a le Atua. Samoa e, o faigalotu, e tatau ona fesoasoani tele e faasino i tatou ia Keriso Iesu. Afai e leai, e ono avea a tatou faigalotu e pei o ni kalapu poo ni faapotopotoga e mafuta faatasi ai, ae o le mana o le Atua, ua matuā tatou teena lava.
