‘O le a taugata atu i le steak!’…Palemia

O le toe tatala o le ofi mai i Samoa o le siusiu o le pīpī ua ta‘ua e le Alii Palemia o le a sau lava ma lona tau. E ala lava ona fai e pei ona ta‘ua e le alii Palemia i tusitala, o le tau faamalie  ai o le toatamai o Amerika i le finauga a Samoa e fia ofi i totonu o le Faalapotopotoga o Fefaatauaiga a le Lalolagi (World Trade Organisation).
O nei feutanaiga e tatau ona malilie ai malo tetele i aiaiga o fefaatauaiga i se atunuu o loo taumafai atu mo lea faalapotopotoga le WTO. O le mau na tuu atu e Amerika seiloga lava e talia e Samoa le toe tatala o le faatauga o le siusiu o le pīpī lea e sau mai i Amerika, e leai sana lagolago i lea taumafaiga a Samoa. O le finauga na tuu atu e Samoa e pei ona ta‘ua e le Alii Palemia na lē malilie ai Amerika.
“O le tulaga lava ia o le pīpī e sau lava ma lona siusiu, ae o ā na mea e ‘ai e le palagi le tino atoa o le pīpī ae aumai siusiu e ‘ai e tatou, ua atili ai le puputa ma le mama‘i”. Faaalia e le Susuga Tuilaepa Sailele Malielegaoi, o le finauga lea na mautinoa lava le lē fiafia ai o Amerika.    E ui o lea o le taumafai la e faamalie Amerika ma lana palota ina ia ofi Samoa i le WTO lea lava ua tatala ai le avanoa e toe aumai ai siusiu pīpī i Samoa. Ae na ta‘ua e le taitai o le Malo o lea o le a tatala ae e lē taugofie.
Na o tagata lava la e iai le tupe e totogi ai lea oloa o le a mafai ona maua lea taumafa. O lea ua mautu e 300% le lafoga o le a faaopoopo i le tau o lea oloa pe a aumai i Samoa ma e lē mafai ona faatau i faleoloa, o le a aumai sa‘o lava mo le faaaogāina e aiga i taumafa.
O le popolega tele lava o le Malo ona o le mafuaaga lava na aveese ai lenei oloa ona o le faatuputupulaia o gasegase lē pipisi ma o le lololo o lea taumafa na mautinoa le fesoasoani i le siisii pea o le numera o i latou i Samoa ua aafia ai i le gasegase o le suka, le toto maualuga, gugu ma gasegase o le fatu.
O le finauga a nisi o le atunuu na tapa o latou finagalo i lenei mataupu na finauina ai e lē o le siusiu o le pīpī e mafua ai ia gasegase ae o le soona taumafa lava o tagata Samoa ma le lē toe faagaioi o le tino.
“E lelei foi lena e tuu ai le amio lea e fai e le toatele e aumai faananā pusa siusiu pīpī mai i Tutuila”. Faaalia e nisi le faafetai i le tafa o le finagalo o le malo i lenei mataupu peitai e pei ona ta‘ua e le Alii Palemia o le a taugata atu i lo le steak le tau o le siusiu o le pīpī.
Faaalia e le Alii Palemia ua leai se eseesega o le galuega o loo fai nei ina ia togafitia i latou ua aafia i le tau faamamā o le toto, ma le isi alii i Samoa nei na faatotope atu i Niu Sila mo togafitiga ua gau le auvae, ae suesue atu ua mafua le manu‘a ona o le “fia fusu ae leaga meafaigaluega. Na alu e inu ‘ava fufusu ai ma se talavou aafia ai loa ona toe tigaina lea o le Malo e totogi le tupe e ave ai mo togafitiga i fafo,” o le saunoaga lea a le Alii Palemia.