Ua faaalia e le Alii Palemia ua sauni e tusi i le Iuni Lakapi a Niu Sila ina ia taofi ai lana amio lea e faia o le taumafai e taofiofi tama taaalo o Samoa ma isi atumotu o le Pasefika mai i le filifilia a ‘au e pei o le Manu Samoa, le ‘au tele a Tonga ma le ‘au tele a Fiti.
“A fua i le malosiaga o le All Blacks i le ipu o le Lalolagi a le IRB o le 2011, o tama o le Pasefika lo latou malosiaga, ae o lea lava e fai mai togafiti ia a le Iuni lakapi a Niu Sila,” o se saunoaga lea a le Taitaifono o le Iuni Lakapi a Samoa, le Alii Palemia foi lea, Susuga Tuilaepa Lupesoliai Sailele Malielegaoi ina ua mae‘a le fonotaga a le Iuni Lakapi a Samoa i le faaiuga o le vaiaso.
Faaalia e le Alii Taitaifono o lea ua sauni e fai sana tusi ona o le “…lē lelei tele o lenei faiga”. “O lea e fia fai i ai, afai ua fia filifili sau to‘a 50 filifili, ona tuu lea o le avanoa e agai mai ai fanau nei a le Pasefika e taaalo mo ‘au a atunuu a o latou mātua… ae ua iloa lelei lava foi e le Iuni a Niu Sila ma le Iuni a Ausetalia o le tama lea e lē filifilia e lua lava mea e oo i ai, o le fia taui masui ma o le a lagona mo le taimi muamua le fesootaiga i le atunuu lea a ona mātua o le a agai e taalo ai”.
Faaalia e le susuga Tuilaepa e manino lava lea tulaga i le eseese o taaalo a tama mai le taimi e tausinio ai i Niu Sila poo Ausetalia ma le taimi e taaalo ai i le Manu Samoa.
Na ia ta‘ua o se tagata lava e lei iloga lelei lona tulai mai i ‘au tetele nei, e molimauina le suiga tele i le taalo auā o loo taalo ita ma fia taui ma sui i le lē filifilia o ia, ae e lē gata i lea o le taaalo ua iai le lotonuu mo Samoa poo Tonga poo Fiti foi.
O le atugaluga lenei ua laga soo e le Taitaifono o le Iuni Lakapi a Samoa ona o se manatu e taumafai lava Niu Sila e oomi i lalo taumafaiga a Iuni lakapi laiti nei a le Pasefika e ui i le tele o le sao o fanau a le Pasefika ia latou ‘au.
O le atugaluga foi na ta‘ua e le susuga Tuilaepa ua aafia ai foi le Iuni Lakapi a Ausetalia.
O le vaiaso lenei ua faalauiloa mai ai le ‘au tele a le Wallabies a Ausetaia lea e toafā lelei alo o Samoa ua filifili mai ai i le to‘a 25 filifilia a lea ‘au tele.
Faaalia e le susuga Tuilaepa o le filifiliga a le alii taalo Niu Sila o Joseph Leilua e taalo mo le Manu Samoa ae see ese mai i le filifiliga a le All Blacks a Niu Sila o se faaiuga lelei tele lea ona o le manatu o le Taitaifono, e tele atu le avanoa e vave ai le alu i luga o taumafaiga a lea alo o le atunuu pe a taalo i le ‘au a Samoa nai i lo le ‘au a Niu Sila.
O le tele o taimi na faaalia e le Alii Palemia e taofiofi tama taaalo ma faatuai filifiliga a Niu Sila ae o atu tama taaalo ua lē faataaaloa e le All Blacks mo se taimi umi ae o le avanoa e maua i ‘au e pei o le Manu ma Tonga ma Fiti, e vave atu ai le laalaa i luga o a latou taumafaiga ma avanoa faavaomalo e taaalo ai.
O le isi lava mafuaaga o lenei faafitauli o mātua, e iai lava le faamuamua i le faataaalo o a latou fanau i ‘au a Niu Sila poo Ausetalia, seiloga lava ua leai ni avanoa i ‘au ia faato’a tau mafaufau ai e agai mai i Samoa poo isi ‘au a le Pasefika”.
O lea ua faamautu le ‘au tele a Samoa mo lana taamilosaga i Aferika i Saute ma o le isi avanoa lea ua tuu atu i le alii o Joseph Leilua i le Manu Samoa.