E tele faamatalaga ma taofi o nisi i le mataupu e uiga i le afioga ia Taito Phillip Field, ona e lē gata ina ua teena e le Faamasinoga o Apili poo le toe iloiloina o le faaiuga sa faia muamua, le talosaga sa faauluina, ae sa fesiligia foi pe toe iai se isi vaega o totoe e toe finauina ai le moni ma le sa‘o o lea faaiuga.
E tasi le tagata sa manaomia e toe maua mai ai se tala lata mai mo lea faamoemoe, o le tamaitai loia o loo nafa ma le mataupu. O Helen Cull sa ia finauina muamua le toe apili sa faia ma ua teena nei.
O ia foi lea ua toe sauni mo le isi taamilosaga e toe fusu ma saili se isi sitepu, e faaauau ai le taaloga ma le faamasinoga.
Sa feiloai atu i le tamaitai loia i le vaiaso talu ai, ma fesiligia ai, Poo fea, a o le ā le isi laasaga lea o le a toe silasila i ai. E lē gata i lea ae sa toe fesiligia foi, Pe o iai pea se faamoemoe e mafai ona toe gagauina le faaiuga a le faamasinoga sa faia, ona o lea ua tali mai le faamasinoga o talosaga toe iloilo, ma ua ta‘ua ai le sa‘o ma le tonu o le faaiuga sa faia muamua.
E lei fia tali le loia Hellen Cull i le isi maga o le fesili, ae tasi le vaega sa ia faailoa mai ma tali mai ai e faapea, Ua taulimaina se faatonuga ioe, e mafai ona toe saili avanoa mo le toe finauina pea o le faaiuga o loo iai nei.
E ui ina ua teena mai le talosaga e le Faamasinoga o Apili, peitai o loo tatala le avanoa mo le Faamasinoga Aupito Maualuga (Supreme Court). Sa ta‘ua e le tamaitai loia, o le isi lea laasaga ua silasila nei i ai, ma ua saili avanoa nei i ai mo le mataupu a le afioga ia Taito.
E iai foi mafuaaga sa lei mafai ai ona tatala tele mai le finagalo ma faamatalaga a le loia. O loo ia taofi mamau pea ma o le a faato‘ā faailoa nisi vaega o lona finagalo mo se isi taimi o lumanai.
O le tali la e pei ona ta‘ua mai e le tamaitai loia, Ua sauni e saili avanoa mo le Faamasinoga Aupito Maualuga mo le finauina pea o le faaiuga muamua, ma le faaiuga ua toe teena ai le talosaga toe apili.
Sa taumafai foi i se tasi o alo o Taito, le tamaitai o Fiasili ona talu ai o loo iai pea le tina poo le faletua ia Maxine i Samoa. Sa fesiligia foi i se lagona o le aiga agai i le mataupu, ae sa ia ta‘ua ua mae‘a ona ioe faatasi ma le loia i le faaiuga e pei ona faatagaina ai Helen e talanoa mai i le Samoa Times.
Ae na pau le tulaga o loo silasila iai ma sauni i ai, o le sailia lea o seleni mo le faatupeina o lenei faamoemoe atoa.
Ua mae‘a ma tuanai atu le isi vaega, ma e lē o ni tamai tupe foi sa faaalu ai, peitai o lea foi ua toe sauni atu mo le isi taumafaiga, ia ua sili atu foi isi tupe e manaomia ai.
Ae ui i lea, o loo malosi pea le talitonuga e tali mai le Atua i le faamoemoe, aemaise e lē fiu mo le sailia o le mea moni ma le amiotonu o loo naunau i ai lona tamā.
