O le faamanatu ai o le Vaiaso mo Tupulaga Talavou i lenei tausaga, ua faamamafa ai nisi o teuteuga e mafai ona faamautu ai le isi Faiga Faavae mo Tupulaga Talavou i le isi lima i le 10 tausaga.
O le faiga faavae ua mae‘a nei, e ono lava vaega o loo ave i ai le faatāua, e aofia ai i ia manulauti na mulimulitai i ai le Matagaluega o Tina ma Tamaitai Atina‘e o Nuu ma Agafesootai, le faatāua o le ola maloloina o tupulaga talavou, o le maua o avanoa e atina‘e ai a latou pisinisi, o le faatāua ua ave i le siosiomaga, o lo latou soifua fanau, aemaise o le taumafaiga ina ia ‘alo ese ma soligatulafono.
O le tausaga lenei o le taulai ina ia toe faamautu manulauti nei ma le faamamafa ua ave nei i le saili ai o galuega mo le toatele o tupulaga talavou ua lē maua ni galuega e maua ai totogi tai vaiaso ma le tailua vaiaso pe masina foi.
Ua faaalia e Taumanupepe Sydney Faasau o le Ofisa Sili Lagolago a le Matagaluega i le vaega o Tupulaga Talavou, o loo tele galuega ua faatautaia e lea vaega o le Matagaluega ina ia faamautu ai lenei taumafaiga.
Ua ioe Taumanupepe o se faafitauli le toatele pea o le numera o tupulaga ua lē o iai ni galuega e maua ai ni totogi.
O i latou foi nei e pei ona faalauiloaina i lenei vaiaso, ua lē maua avanoa e a‘oa‘oina ai pe a mae‘a aoga maualuluga ona e lē mafai ona tau savali mai i le taulaga e faaauau a‘oa‘oga o matata eseese.
O le isi lea talosaga na faaleo i le unaiga o auala e maua ai galuega a fanau nei e lē ausia avanoa sikolasipi ma isi tomai e maua ai galuega i ofisa ma faalapotopotoga a le malo ma Kamupani Tuma‘oti.
Faaalia e Taumanupepe ua tele tausaga o faaaogā pea le faamatalaga lea o le toatele o le tupulaga a le atunuu e lē o maua ni totogi ae o loo maua lava seleni e ala lea i galuega tau faatoaga, o faigafaiva ma galuega faufale o loo faatino i totonu o nuu ma aiga.
“Ia ae e moni lava o loo maua seleni ae e lē o maua i le auala lea e ta‘ua ai o tagata faigaluega – e tatau ona totogi tailua vaiaso pe tai vaiaso foi auā o i latou nei e mafai ona maua tupe ae e faavaitaimi,” o se saunoaga lea a Taumanupepe.
O le fesili la na lāgā poo le ā le galuega a le Malo o faia e tau tuuitiitia ai lea faafitauli.
Na faaalia e Taumanupepe, o lalo o le Polokalame o le Talavou ua manatu le latou Matagaluega ina ia unai ai a‘oa‘oga ia ua lāgā e sui o nuu, o loo matuā moomia i afioaga i tua.
A‘oa‘oga ia o matata e pei o le faakamuta, o galuega inisinia taavale, o tomai i le fai eletise, palama ma ua iai foi manaoga mo tamaitai e a‘oa‘oina tomai faasuisui, le gasesega o taumafa ma galuega taulima.
Ua iai polokalame faapea i lalo o le Talavou i le taimi nei, ae o le faiga faavae fou o le a maioio ai loa fesoasoani mo tupulaga nei e lē o maua avanoa e sosoo ai a‘oa‘oga.
