E iva mafuaaga na mafua ai ona savalia, pe sa faatulagaina ai le savali tele a tagata Pasefika i le taulaga tele i Aukilani i le Aso Toonai na tea nei, aso 16 o Iuni.
O le savali sa taumafai e momolia ai se feau tāua i le faiga malo o lenei vaitaimi, ina ia tau logosaia ai le amata faagalogalo ai o tagata Pasefika mai ana fuafuaga faataoto mo nei ma le lumanai.
1. Ia faataugofie fale o le malo
2. Ia ‘anoa ma lelei aoaoga
3. Ia faaleleia le tulaga tau soifua maloloina
4. Ia tutusa aiā tatau ma le faaaogāina o Faamasinoga
5. Ia tele ni galuega
6. Ia vaaia ma faamuamua fanau ma aiga
7. Ia vaaia le tulaga o tapuaiga ma lotu
8. Ia lelei ma ia manuia le lumanai
9. Ia faamanuia ma ia malupuipuia Aukilani ma Aotearoa
O nisi ia o vaega ma mea taitasi sa faaautu i ai le savali sa faataunuina, ma le agaga maualuga o le a avea o se faamanatu tāua ma o le a faafofogaina e le alii Palemia ma lana faigamalo i lenei vaitau.
O le agaga e tasi, loto e tasi, tutu faatasi, faamalosia le tulaga o tu ma aga faa-Pasefika auā le manuia o augatupulaga uma o loo fai a‘e mo le lumanai. O isi ia o vaaiga ma manaoga sa afifi i totonu a o faagasolo lea savali e pei ona ta‘ua.
O isi itu sa faatāuaina e le savali e pei ona sa tuufaatasia, e aofia ai le lagolagoina pea o uso Maori poo tagata Whenua ona o a latou aiā tatau. Ia faatāuaina le sao o mātua ma tuaa Pasefika sa latou muai asia ma tautua ia Niu Sila.
Sa maitauina le toatele o tagata Pasefika sa auai ma faatasi ai i le savali i lea aso. O le isi tulaga sa maitauina ona sa faatino le savali i se auala tausaafia ma le agamalu. O se savali faaaloalo e pei ona masani ai tagata Pasefika.
E toatele sui Faipule o vaega faaupufai eseese sa auai foi i lea savali. Ae sa faapea foi ona talia aloaia e le alii Pulenuu o le Aai Malosi i Aukilani, le susuga ia Len Brown. O le ta o le iva i le taeao o le Aso Toonai, aso 16 o Iuni, lea sa faataunuuina ai le savali.
Na amata mai i Albert Park i Aukilani ma faagasolo ane ai i le tele o magaala i totonu lava o le aai tele o Aukilani.
