Ua tele tausaga o taumafai le mamalu o le afioaga o Taelefaga e saili fofo i se faafitauli ua tulai mai pea ma ua masalomia le faatupu ai faaletonu i le soifua maloloina o le afioaga.
Ua agai i le Malo e ala i le Soifua Maloloina, ua agai i le Matagaluega o le Puna‘oa Faalenatura ma le Siosiomaga aemaise le fesootai pea ma le Malosiaga tau Eletise (EPC) ae e foliga mai o lea faatoa maua mai se tali mautu o le latou fanoga ina ia faamamā le vaito‘a lea e agai mai i le afi i Taelefaga ona ua le gata ina aafia ai le soifua manuia o tagata ae ua le taumate le aafia ai meaola o le gataifale.
O le tausaga fou, faatoa amata ai galuega faaleleia mo le foia o le manogi leaga o loo feagai ma le afioaga o Taelefaga e mafua mai i le vaito‘a mai le afi eletise.
Faaalia e le afioga i le Minisita o galuega tetele a le Malo, Manu‘alesagalala Enokati Posala, o le taimi nei, ua faagasolo le faataatiaga o le ata mo paipa e agai sa‘o ai le vai i le sami ae peitai o le tausaga fou lea o le a amata ai loa galuega faatino.
Na ia faaalia foi, ua mae‘a ona feiloai ma sui mai le afioaga ma ua logoina foi i ai lea tulaga e tusa ai ma faaseā na faaoo mai. E le fou lea faafitauli i tagata o Taelefaga ma sa toe afea le Pulega o le Malosiaga tau eletise-EPC ma e iai le feiloaiga e pei ona ta‘ua e le alii Minisita.
O se tasi o feutanaiga a le EPC ma le afioaga, o le faataga lea ona tapē e Taelefaga o le afi aemaise lava i taimi e tetele ai le manogi leaga lea o loo feagai ma le nuu.
Sa faaalia foi e le afioga ia Fuiava Gago Leiataua, o le pulenuu o Taelefaga, sa afea le Matagaluega o le Soifua Maloloina ona o popolega i aafiaga e ono aafia ai ma gasegase ai tagata o le nuu aemaise aiga oloo nonofo latalata i lea nofoaga.
Sa toatele na maua i ni faatafagasegase ma na masalomia lava o le vaito‘a lea ua mafua ai le apoia o le toatele e nonofo lata ane i lea nofoaga i gasegase peitai e lei faamaonia lea tulaga.
Sa oo atu sui o le Soifua Maloloina e tusa o lea talosaga ma na faaalia i le afioaga, e lē gasegase ai se isi i le manogi lea ma e tai tutusa lava ma le manogi o loo feagai ma Saleimoa i togatogo o loo iai. E tusa ai ma aafiaga i le Siosiomaga ona o lea foi atinae, sa fesiligia ai le Matagaluega o Puna‘oa faalenatura ma le Siosiomaga-MNRE i se ripoti.
Faaalia e le alii pule lagolago o le MNRE, Faleafaga Tony Tipamaa, o le vaega o fuafuaga o nofoaga i le taulaga-PUMA sa tapenaina le ripoti o le nofoaga o loo iai le afi i Taelefaga.
E lei mautu mai la lea tulaga i se ripoti tuufaatasia ae pau le itu ua mautinoa mai le afioga ia Manu‘alesagalala, o fuafuaga ua iai nei, o le toe faaleleia o le nofoaga o loo iai le afi mo le foia o le manogi o loo feagai ma tagata o Taelefaga.
O lea la ua taatia mai le fuafuaga a le Malosiaga tau eletise i lenei mataupu, ae o le fesili tele ua tulai mai, afai o lea o le a tatala atu le vai leaga lea e to‘a i le tausaga fou – e alu sa‘o lava i le sami.
O le vai na faapea ona agai i le ogasami o Taelefaga i lenei taimi atoa, ua aafia ai vaega o le sami, ma afai ae alu sa‘o i le sami e mautinoa o le a tulai mai ai foi se isi faafitauli tele atu, ona uma lea o le manogi leaga ae o le vai leaga lenei.
O lea ua aafia le siosiomaga o le gataifale i lea itu o le atu Fagaloa, ma o le a faateteleina pe afai e amata ona faagasolo pea i ai le suavai leaga lenei mai i le afi i Taelefaga.
