“O Iesu le Tali” – Koneseti Tupulaga talavou Samoa (PIPC) Onehunga

O le faamoemoe ua taunuu, o le laau o le soifua lea.  ‘O Iesu o le Tali’ o le autū lea o le mafutaga tuufaatasi a le tupulaga talavou Ekalesia Samoa Perepereane (PIPC) i Onehunga i le po o le Aso Toonai o le faaiuga o le vaiaso. O se taimi muamua lenei ua tuufaatasia ai se koneseti tele faapea o siva, faafiafiaga ma tala faatino faaleagaga a le autalavou.
Manatu e lē o po se lilo i le silafia o le atunuu i lenei vaitau o le televave o le malamalama faatekonolosi ma le mau mea fiafia, ua tosina ese ai le tupulaga mai le ola faaleagaga ma mafutaga faaautalavou. O le auga tonu lea o lenei mafutaga, ina ia toe fafagu le faavae moni o le ola faaleagaga ma le manuia amulī, aemaise o le faatāuaina o le ola faaletupulaga talavou i mafutaga faapenei i totonu o ekalesia.
O se faamoemoe sa fau po fau ao e lei faigofie lona tuufaatasiga. E valu lelei vaiaso o le tapenaga a le autalavou peitai na iu ma le manuia ma le fiafia i le viiga o le Atua.
O le polokalame atoa sa faatinoina lava e le tupulaga talavou o le ekalesia, molimauina e le auvalaaulia, aemaise o tupulaga talavou mai isi ekalesia o le Pulega sa auai, ma le mamalu o le Ekalesia PIPC i Onehunga lava.
O se po fiafia ma le matagofie, i le silasila ma le molimau a le toatele, ae silisili ai le faafiafiaina o mātua ma le ekalesia, ina ua tino mai le faamoemoe sa tauasa mai ai le fanau i aso e tele, ma le faamanuiaina o loto i le talenia ma le onomea o le tupulaga talavou i taga eseese o a latou faafiafiaga.
E lei alu tamala le autalavou i latou tapenaga, auā e lē gata i le saunia lelei o togiga, ae taliu ane foi i faafiafiaga, e silia ma le luasefulu aitema na faatinoina i lea po, aemaise o le taumafataga mamafa na talimasinei ai le afifio atu o le aofia ma le auvalaaulia. O se tapenaga tele lea, ma o le maitau a le toatele, e fai mea mafai tele le autalavou PIPC a Onehunga.
O le aofaiga o le aufaafiafia e to‘a luasefulufitu, sefulutasi alii, sefuluono tamaitai, o le tapiano o Tapunuu Sauluitoga Mose, o ta‘ita‘i (leaders) o Julie Wilson, Katerina Fatu ma Iusitini Junior Rokeni. O le ta‘ita‘i aoao o le Aoga Aso Sa o le susuga Agaseata Muaimalae, o ia foi na saunoa i upu faafeiloai o le polokalame o le po ma le ta‘ita‘i o le autalavou o Logomaua Su‘a o le Aoao fesoasoani foi lea sa nafa ma le taitaia o le tuufaatasiga atoa o le faamoemoe o le autalavou.
O le ekalesia PIPC Onehunga o loo taitaia lea e le susuga i le faafeagaiga ia Rev Mika Faamausili ma le faletua ia Liai Faamausili, na saunoa i upu faamanuia e faaiu ai le polokalame matagofie i lea po.