O lenei o le a oo i le Kerisimasi, o aso e tatau ai ona fiafia Ekalesia, aiga, nuu ma alalafaga. Ae pagā lenei, o loo tulai mai pea faafitauli i totonu o Ekalesia ma lotu, e lē tatau ona tulai mai.
O le ā ea le mafuaaga o nei faafitauli? Ou te lē tusi lima na o faifeau. Ou te faitioina foi Ekalesia i le lē mataala.
O Niu Sila lenei. E lē pule le faifeau i meatotino a le Ekalesia aemaise mea tau tupe. E falepuipui foi lava faifeau pe a latou faaaogā sese tupe a Ekalesia, pe latou te pulea le faaaogāina o meatotino a le Ekalesia e aunoa ma le talanoaina malamalama o mataupu ma tagata uma o le Ekalesia, ma fai se maliliega tusitusia i minute o se fono, ua malilie le Ekalesia i se mataupu ona faato‘ā faatino lea. Ia taiala tulafono tusitusia i totonu o le Trust Deed a le Ekalesia, i mea a faaaogā ai tupe ma meatotino a le Ekalesia.
O mataupu o loo feagai ma lo‘u ofisa i le fale faamasino (High Court) o vesiga a Ekalesia, e tele ina mafua mai o le lē iloa e le faifeau lona tulaga ma ona tiute i le tulafono a Niu Sila, i totonu o Ekalesia.
E ese lava le tofi faafaifeau. E lē ave ane le tofi faifeau e faapea ai le faifeau o ia na te pulea meatotino a le Ekalesia. E le ave ane foi le tofi faifeau e faatonu sese ai e se faifeau nisi o le Ekalesia latou te faifaimea faatasi, e fai ni tulaga solitulafono i totonu o le Ekalesia, ae nofonofo le faifeau ma faapea mai, e lē o ia na faia le faafitauli lea e tulai mai i totonu o le Ekalesia.
O mea nei ou te ta‘ua i luga, o mea o loo tutupu i le taimi nei o loo fai ai faamasinoga i le High Court o loo o‘u tu ai. O lea ou te malamalama o loo toatele lava faifeau o loo faamaoni ma fai malamalama o latou tiute, ae o loo toatele foi i latou ua tele le lē faamaoni, ma tauvalea uma ai faifeau.
Atonu e mafai ona fesoasoani faifeau o loo faamaoni i o latou uso faifeau ina ia taofi ai mea leaga ia e tutupu mai i totonu o aulotu, ma fai se auala e aua ai le tauvaleaina faifeau.
AIĀ TATAU MA TIUTE O TAGATA O LE EKALESIA:
E ala foi ona fai sese mea i totonu o lotu e faifeau, o le lē mataala o tagata o le Ekalesia. O le isi mea ua pei e fefefe tagata o Ekalesia e fesiligia le faifeau ona o le talitonuga sese, a fesiligia le faifeau, e malaia ai ona o le faifeau o le fegaiga a le Atua.
Ona o le tulafono a Niu Sila, e puipui ai tagata uma lava, e oo i le Palemia, ma faifeau ma oe lena e i totonu o le tou Ekalesia, o lea la, ia mataala. Faaaogā tou aiā tatau (legal rights) i le tulafono, e fesiligia ai le faifeau ma i latou e faia tonu o le faaaogāina o meatotino a le Ekalesia.
A tou naunau ia ola le tou lotu, ia fai tou tiute i le tulafono, ma le lototele e iai vaega eseese o le faiga e le faifeau o le tou galuega lotu.
A fia malamalama, talosaga e aumai ia te oe kopi o minute o fono a le Ekalesia ma ni kopi i minute o fono a Trustees e talanoaina ai ni mataupu o meatotino. Ia e malamalama i se mea e lē o manino ia te oe. O tagata uma o aulotu, o outou o Beneficiaries. E lua au aiā tatau i le tulafono e te tautala ai ma fesili i se mea e te lē o malamalama ai. (1) O oe o le tagata o le aulotu. (2) O oe o le beneficiary o le trust.
O lou tiute o le fesili, faaali lou manatu ae aua le taa‘ina oe i manatu lautele, pe a e iloa e sese le mea lea e taumafai le faifeau poo nisi foi o le Ekalesia e fai.
O Ekalesia ola o Ekalesia e galulue faatasi le faifeau ma le Ekalesia. E felagolagomai le faiga o le galuega. E lē pulea faamalosi e le faifeau galuega a le Ekalesia ma Trustees.
O Ekalesia uma lava e tatau ona iai se DEED OF TRUST e faamaoti ai ona tusia galuega e faia e Trustees (latou ua tofia e vaaia meatotino a le Ekalesia).
O le tele o faifeau ma Ekalesia, e na ona fai o Trust Deeds, ae taatia e lē faaaogāina. O le tele o mataupu ia e oo i le fale faamasino, e fai Trust Deeds ae lē faaaogāina tulafono la e tusia i Trust Deeds, ae fai na o fono a Ekalesia, ona finau mai lea ua uma fono a Trustees, ona sa fai fono a Ekalesia. E ese lava fono a le Ekalesia, ese fono a Trustees.
Tautuanā, e ese tiute o le Faifeau, ese tiute o tagata o le Ekalesia, ese tiute o Trustees, ese foi tiute o Beneficiaries.
A lē faia tiute of Trustees, ae faamoemoe faapea ua ala ona lē faia tiute o Trustees ona o le faatonuga a le faifeau, poo o le ava foi i le faifeau, e leai se lafitaga o se Trustee i se moliaga i le tulafono pe a leiloa se tupe poo ua lē faaaoga sa‘o meatotino i lalo o le Trust lea e i le vaaiga a Trustees.
A fesiligia foi e nisi o se Ekalesia se mea ua fai e le faifeau e lē o sa‘o i le vaaiga a le Ekalesia, pe lē o manino i tagata o le Ekalesia lea e fia malamalama, o le tiute i le tulafono o le faifeau o le faamalamalama o le mataupu ma fai se fono e talanoaina ai se mataupu.
E leai se aiā a se faifeau e telefoni ai leoleo, pe fai i se isi o le Ekalesia e telefoni leoleo e aveese tagata ia e fesiligia faifeau i mataupu tau lotu.
Ia mataala foi tagata o Ekalesia taitasi, a sese le faifeau, taofi mea sese. O tou tiute na o outou o tagata o le Ekalesia. O le tou tiute o outou o tagata o le Ekalesia o le tulai e fai le mea sa‘o, ia ola le galuega a le Atua.
E puipui i le tulafono aiā tatau a tagata uma i totonu o lotu, e amata mai i le faifeau e oo i tamaiti.
Ia manuia le Kerisimasi
