O le aso 16 o le masina o Tesema i le afiafi poo le ‘afa o le ono (6.30pm) ae amata loa le sauniga lotu na saunia e sui o le Samoa United Party, le Tautua Samoa faapea ai le Tumuai Tutusa.
O se tuufaatasiga muamua lea ua aloaia le omai faatasi ai o tamalii ma tamaitai ua iai le manaoga e taufetuli i le sailiga palota i le tausaga fou.
O le a faamauina lenei aso i le talafaasolopito o Samoa.
O le faaiuga lava o finagalo faaalia o le aso lenei o le a iloa ai foi le faaauau ma le faataape o le vaega faaupufai ia mafai ona faamatala le tāua o taumafaiga ua oo mai ai i lenei aso.
O se finagalo lea o se tasi o tamalii ua galulue faatasi ina ia mafai ai ona tulai mai se tuufaatasiga o le a mafai ona tulai atu o se itu Agai i totonu o le Tuufaatasiga lea o Faipule.
Ua aloaia ai nei le Coalition poo le Tuufaatasiga o Pati o le Tautua, le Tumuai Tutusa ma le Samoa United Party.
O le faamoemoe ina ia malosi so latou leo pe afai e ofi atu o latou sui i le Palemene e ala i le faigapalota tele a le atunuu i le tausaga fou.
O le faamatalaga a le sui o lea tuufaatasiga, le Fetalaiga ia Tafaese Sala Uili, lea e tamoe mai i le tausinioga o tofi o le tausaga fou i Vaimauga Sasa‘e, o le fono muamua lea ua faia i lona fale, o le fono lea e mautu ai lava le faaauau o nei tuufaatasiga pe leai foi.
“O ā foi lava la lipoti ma le mau faamatalaga na faalele a o lei oo mai i le aso lenei, e mafai ona ou faapea atu e lē moni uma ia faamatalaga auā e lei iai se feiloaiga aloaia a vaega nei e tolu ae o lea faato‘ā feiloai lava lenei ma ua mafai ai ona maua se finagalo autasi pe tutufaatasi pe faataape ae tauva le tagata ia,” o se saunoaga lea a Tafaese Uili, lea foi sa avea ma Minisita o le Soifua Maloloina i lalo o le HRPP i tausaga ua mavae.
Na tumutumu le laoa o Tafaese ina ua oo atu sui taitasi o vaega faaupufai e pei ona ta‘ua ma na mautinoa le iai o le agaga lea e tasi o le taumafai ina ia tuufaatasia. Sa iai nisi sui e lei auai e pei o Palusalue Faapo II faapea ai Su‘a Rimoni Ah Chong ma isi sui e lei mafai ona oo atu ona o faalavelave lē maaalofia.
Sa folasia faanoi ona amata loa lea o le feiloaiga i se ava na faafeiloai ai e sui o le afioaga o Vailele sui a usufono. E lē gata i lea na faatautaia se sauniga a o lei amata talanoaga.
O le faaiuga o folasaga o finagalo na mafai ai loa ona malilie uma sui auai ina ia saini se Maliega ua faamalamalama ai le manaoga o sui uma ina ia tutufaatasi. Ina ua tāpā Tafaese pe sa iai se faaiuga mo se ta‘ita‘i o le latou Vaega tuufaatasi lenei, na ia ta‘ua e faailoa uma mai i le aso 20 o Tesema lea tulaga ma o le a mafai ai loa ona faalauiloa aloaia uma mai sui o lenei Tuufaatasiga ma isi fuafuaga o se anavatau o le a finau uma i ai sui tauva o nei vaega faaupufai.
O le Maota o le Peresitene o le Tautua le afioga Afualo Dr Wood Salele i Matautu lea o le a faalauiloa mai ai le Tuufaatasiga lenei i le aso 20, ma o inā foi o le a faalauiloa mai ai ma se ta‘ita‘i a o se sui ta‘ita‘i foi o le vaega faaupufai.
