Ona o lenei ua iai suiga i le tulafono e vave ave faamalosi ai tagata (deportation) i Samoa e lē o iai ni pemita i luga o le tulafono e nonofo ai i Niu Sila, ua tele o tatou tagata e vili mai i lo‘u ofisa ma fesili mai poo le ā le tulaga o tagata na fai faaipoipoga i Samoa, sau i Niu Sila toe fetaui ma se isi fafine poo se tamaloa, toe faaipoipo lea i le fafine poo le tamaloa lea e i Niu Sila, ina ia mafai ai ona fai pepa nofomau i Niu Sila, ae lei tatalaina le faaipoipoga ma le toalua la e i Samoa.
O le tele lava o latou ia e vili mai, o tamaloloa, e fai mai lava o le fafine la ei Samoa, ua toe fai foi le isi toalua.
O le Tulafono mo le Tatalaina o Faaipoipoga:
Afai e fai se faaipoipoga a se ulugalii i le falesa, poo le ofisa o le malo e fai ai faaipoipoga, ma ua uma ona lesitala lea faaipoipoga i luga o le tulafono a le malo, se‘i vaganā ua fai se apalai aloaia i luga o le tulafono e tatala ai lea faaipoipoga i luma o le fale faamasino, ona faato‘ā mafai lea ona tatala i le tulafono le faaipoipoga.
I luga o le tulafono a Niu Sila e lua tausaga (2) lua te tetea ai ma lou toalua muamua ona faato‘ā mafai lea ona e apalai i le fale faamasino e tatala le lua faaipoipoga.
O le upu tetea (separation) i le tulafono, e iai lona uiga aloaia. E tatau ona e alu i se loia e faamalamalama lelei atu ia te oe le uiga o le upu lea, ma le taimi e amata ona faitau mai ai le lua tuasaga o le lua teteaga, ona faato‘ā mafai lea ona tatala le faaipoipoga.
A atoa loa le lua tausaga o lua tetea, ona fai lea o le apalai aloaia i le tulafono e tatala le lua faaipoipoga (divorce). Ina ia malamalama le faamasino i le taimi tonu na lua tetea ai ma lou aiga muamua, ma ina ia talitonuina e le faamasino ua atoa le lua tausaga o lua tetea (separate), e fai sau tautoga i luga o le Tusi Paia (affidavit) e ta‘u uma ai le taimi na lua tetea ai, aemaise ia iai ni faamatalaga e faamalieina ai le faamasinoga, ua atoa lelei le lua tausaga e lua te lei toe faatasi ma lou toalua muamua.
Se‘i vaganā ua tatala aloaia i le tulafono lau faaipoipoga muamua, ae faasā i le tulafono ona e sau i Niu Sila toe faaipoipo ma se isi tagata ae lei tatalaina lau fa’aipoipoga na fai i Samoa.
Afai ua e sau i Niu Sila e toe faaipoipo ma se isi ua nofomau i Niu Sila, ona faaaogā lea o le faaipoipoga ma le tagata lea ei Niu Sila e apalai ai lau nofomau i Niu Sila, e te falepuipui pe a maua e Niu Sila ua toe fai sau faaipoipoga i Niu Sila ae lei tatalaina lau faaipoipoga muamua i Samoa.
E toe soloia ma aveese lau nofomau pe afai ae maua ifo, o le faaipoipoga i Niu Sila na fai a o lei tatalaina lau faaipoipoga muamua i le tulafono. E le gata i le soloia o pepa nofomau, ae tele lou afaina i le tulafono (illegal).
E Eseese Mamao le Tulafono ma le Talitonuga Faasamoa:
A toe fai se aiga o se isi o oulua lea na faaipoipo, e lē amanaia i le tulafono le aiga fou lea ua fai a o lei tatalaina i luga o le tulafono le faaipoipoga muamua.
E le ave ane le toe alu o le fafine poo le tamaloa la ei Samoa, toe fai se isi toalua, e laveai ai oe lea e i Niu Sila, pe a e toe faaipoipo i se isi tagata ae lei tatalaina i le tulafono lau faaipoipoga muamua.
Tatala muamua le faaipoipoga muamua ona faato‘ā toe faaipoipo lea i se isi tagata. E toe soloia uma pepa malaga na fai i luga o se faaipoipoga na fai ina ia maua ai le nofomau i Niu Sila (sham marriage). E sili le puipuia i lo le togafitia.
