Ua faamaonia nei tala sa laumanu‘ia i tausaga e lei mamao atu, le iai o se finagalo o le Malo e tapuni le Kolisi o Vaipouli i Savaii. O lona uiga o le kolisi lava lea e tasi a le Malo sa i le motu tele i Salafai, o le a lē toe tatalaina ona faitotoa mo alo ma fanau o le motu tele ona ua iai se faaiuga e see atu fanau e faaaogā kolisi e iva ua itumalo eseese o Puleono.
O le a faigofie ai ona latalata i nuu ma afioaga o loo nonofo ai fanau, ma faigofie ai foi mo mātua i le itu o feoaiga.
O Vaipouli ua mamao tele mo fanau aemaise e mamao i uta le nofoaga o iai, faaopoopo i ai le taugata o feoaiga ma le tele o tupe e faaalu i lona faagaioia, ona maua lea o le tali o le fuafuaga sa taoto e sili loa ona tapuni.
O Tesema o le tausaga nei o le a faatino ai lea fuafuaga pe a mae‘a lenei tausaga faaleaoaoga. O fanau o loo aooga ai e faaatoa a latou suesuega i tausaga o i luma, o le a agai sa‘o i Kolisi o loo latalata ane i o latou nuu ma itumalo, ma o le a leai se faaletonu o lea tulaga.
O le faia o le faaiuga ia Vaipouli, o se tala faamomoiloto mo le toatele sa a‘oa‘oina i lea kolisi, auā sa faapea ailoga a iai se tulaga faapea e tupu.
Peitai ua faailoa e le pulega o le Matagaluega o Aoga, Taaloga ma Aganuu, o le suesuega na faia pe tatala pea pe tapuni loa le kolisi, sa feiloai ai ma mātua o fanau o loo aooga i le kolisi i le taimi nei, ma faailoa i ai fuafuaga a le malo i le mafuaaga ua a‘e ai se finagalo e sili pe a tapuni.
O le tasi o mafuaaga autū o lea faaiuga ona o le aofaiga o fanau ua palasi tele, lea e na o le 250 o loo aooga ai i le taimi nei, e fua lea i le aofaiga e tatau ona aooga i se kolisi ma se aoga maualuga e 750.
O le tausaga e 1921 i le taimi o pulegamalo faakolone a Niu Sila na faavae ai Vaipouli, ma sa autū lava i se aoga maualuga e agai i ai fanau i Savaii e nonofo i lea faaitu o le motu tele. Ua na o Vaipouli lava o loo faaauau pea lana nofo tumau ona o le tau mamao o nuu e omai ai tamaiti.
Ae na faia le iuga a le matagaluega a aoga i nai tausaga e lei mamao atu, e tapuni loa le nofo tumau mo kolisi o Avele ma le Kolisi o Samoa seia oo mai i le taimi nei, e lē o toe iai ni tamaiti o nofo tumau i ia kolisi e lua a le Malo i Upolu.
