Na leai se vaipanoa o le faleaiga o le Valentine i Henderson na avanoa i le po o le Aso Toonai 26 o Aperila i uo ma aiga o le tamaitai ia Janice Faletagoai Aukusitino Auvaa i le agai atu e molimau le faamanatuina o lona 21 tausaga.
Na totogi uma e le aiga o le tamaitai le fale atoa ina ia mafai ona mafuta faatasi uma lona aiga mai Ausetalia, Samoa faapea Niu Sila nei e patipatia tausaga e tele ua foai e le Atua ia te ia. Na amata le polokalame i le sauniga lotu na taitaia e le susuga i le Sea ia Tovio Aumua mai le Sinoti Samoa Koneferenisi Metotisi Niu Sila.
Sa molimau le faafeagaiga i le soifua aoga ma le ola galue o le tamaitai i totonu o le ekalesia, na ta‘ua ai i lana saunoaga uiga tausaafia o le tamaitai ma lona fiafia i soo se tagata. O le tatalo na saunia e le susuga i le tiakono ia Ropeti Mitchell mai le ekalesia Katoliko i Glen Eden. Na mae‘a le sauniga ona molimau lea o le tamā ia Faletagoai Aukusitino Auvaa i le latou mafutaga ma lona alo ma foai atu ai ma le ki o le faailoga o le isi laasaga fou o le teine talavou.
E tele ni upu apoapoai na saunoa i ai le tamā e tapue ai le olaga o si ona afafine. O le taimi o le taumafataga na faasolo ai ma aitema o le aiga o Janice e molimoli ai o latou alofaaga ma faamanuiaga i le atoaga o lona 21 tausaga. O Janice o le alo o le tamā ia Faletagoai Auvaa mai i Falealupo ma le tina ia Malaeniu Auvaa mai i Satupaitea, ma sa aoga i le Katoliko i St Dominic ma avea ai foi ma taitai i totonu o le aoga, ma faamanuiaina ai i le Iunivesete i Aukilani.
O le fofoga o le po, o tuagane o le tamaitai le susuga ia Alifa Auvaa ma lona uso ia Talitonu Auvaa, o laua foi sa faatulima e faafeiloai i le mamalu o le auvalaaulia, a o le tootoo o aiga na lua i le taimi o faaaloaloga o le susuga ia Selesele Mafi Asiata, ma na ia molimoli ai foi le faafetai i le susuga i le Sea o le faasinoti ma le auvalaaulia sa aofaga potopoto e molimau le aso fanau o Janice.
O le sui o le ekalesia ma Samoa potopoto le susuga ia Pemasa Neru sa tali fuaitau i le saunoaga a le tootoo o le afiafi.
