O le tautuaina o le atunuu o se taulaga e faalagolago i taleni ma meaalofa aemaise o le poto ma le tomai e faatino ai, e eseese foi ala manuia e maua ma foai atu mo se lelei o Samoa lautele.
O le tautua a le “My Samoana” o se polokalame leitio i la tatou gagana Samoa, e faatino i luga o le ālaleo a le Apu FM i po o Aso Faraile taitasi mai le itula e 8 i le 11, o loo galulue ai le afioga ia Toilolo ma le faletua ia Pei Taulapapa, le susuga ia Falealii Nathan Maiava ma le susuga ia Pai Sauvao Nanai.
E lē gata o le tautua i peau o le ea, ae o loo faatino foi nisi a latou tautua i itu eseese mo le lelei o le atunuu lautele, e pei ona iai le afiafi o le Aso Toonai na tuanai atu na faatinoina ai sa latou fiafia mo aiga, na mafai ona fiafia faatasi ai le aiga atoa mai lava i mātua e oo i fanau.
O se afiafi sa tele le fofoga taumafa ma faafiafiaga, ae leai ma se ‘ava malosi na faatagaina. Na maitauina le taupati atu o le atunuu e opogi le faamoemoe ona o le faatāuaina o aiga. O le fofoga o le po sa feagai ma le susuga ia Pai Sauvao, ae o le musika mālie sa fiafia faatasi uma ai tagata i siva ma saasaaga sa faatautaia e DJ Tripple T ma DJ Deal.
Na maimoaina ai foi ni siva Hawaii ma Tahiti na faatinoina e le ausiva a le Nuholani, faapea siva na saunia e Jenifer Nonu ma ona alo, ma viiviiga na lagiina e Sarah Muliau. Sa saunia foi faailoga mo le laei Samoa pito i manaia na manumalo ai Sale Sao i le manufata na foai e le faleoloa o le Kiwi Pacific Store.
Na faafiafiaina uma foi le mamalu na faamanuiaina i faailoga o le lulu sa faia. Na faaalia e le faletua ia Pei Taulapapa, o le tupe na maua i le faamoemoe o le My Samoana, na faimeaalofa atu ai i le Apu FM, o le faalapotopotoga a le Rising Generation ma le faaalapotopotoga a le Doors of Opportunity.
E momoli le faafetai i nei tamalii ma faletua ona ua lē gata i le faatāuaina o aiga, ae ua silasila foi mo le lelei lautele e ala i meaalofa mo nei faalapotopotoga.
