E tele ma anoanoai le mau faamatalaga ua faasalalauina i tusitusiga i nusipepa, leitio ma televise, i le taumafai lea e tulituliloa pea le susuga i le alii fusu, ao se tamalii foi o le atunuu le tofa ia Toailetai David Tua.
E le gata ina fia maua poo fea tonu, ao le a se isi laasaga mo lona taumafai, aemaise se taunuuga ua oo iai le mataupu e ese mai, i le tulaga tau fusuaga.
O le aso Tofi o le vaiaaso na tea nei sa maua ai se feiloaiga a le Samoa Times, ma le susuga ia Tavita, sa fesiligia ai i sona finagalo, e uiga i mataupu e pei ona fia maua iai se malamalamaaga.
O le mataupu i le va ma le televise a Maori, o le va o Tavita ma le pulega muamua sa feagai ma ana taaloga, Kevin Barry ma Martin Pugh, ma le manaoga mulimuli, o le fia mautinoa lea pe faataunuuina le fusuaga sa faamoemoe iai mo le faaiuga o le tausaga nei aemaise ai poo ai o fuafua la te fetaui i se taimi lata mai.
Sa taua e Toailetai e faapea, oloo iai le fuafuaga e faia ni fusuaga se tolu i Niu Sila nei, e tasi e faia i Kalaisetete, tasi e fai i Ueligitone, ma le isi i Aukilani. Ae peitai e sao lelei lava, ua fai si tele o mea ua fetineiai mai i lenei vaitaimi, ma oloo tau fuafua lelei lava, aua e taua uma mea ia oloo faasasaga mai, ao le taimi nei, oloo taumafai ina ia vaevae ma faatulaga muamua mea taitasi ina ia mafai ona faamalieina manaoga, ma faataunuu i le taimi sao e fai ai.
O loo faagasolo pea le galuega ma le latou pulega, aemaise ai o le faatalitali nei mo se tulaga o le a tulai mai ai lona taumafai i le faasologa o tama fusu pito i luga o le lalolagi.
Sa taua e Tavita, o fuafuaga uma o loo taoto i le taimi nei, ona oloo talia se faaiuga mai le pulega ale lalolagi, e faamautu mai ai lona tulaga ua see atu iai talu ona maea le taaloga ma Shane Cameron.
O le talanoaga lenei ma Toaletai David Tua, ua taumafai e vaevaeina ia manino le faitau i vaega uma o le taumafai o le alo o le atunuu.
David Tua ma le Televise a Maori.
SamoaTimes: O fea o taoto ai le mataupu i le va o oe ma le TV a tagata Maori?
David Tua: Faafetai mo le fesili, O le mea moni e solitulafono au, solitulafono foi le Duco, (kamupani sa faafoeina le fusuaga), ona o le feagaiga sa sainia, e tusa ma le tolu ni fusuaga latou te faasalalauina, peitai sa lei mafai ona mulimulitai iai i lea maliliega, ina ua tulai le fusuaga ma le alii o Shane Cameron, ua le faataunuuina ai le maliliega, ae ua tuuina atu aia e faasalalau ai ele Sky TV.
Ae ui lava i lea faaletonu sa tau tulai mai, peitai, ua maea ona soalaupuleina lea tulaga, ma ua toe faaoi ai la matou sootaga vavalalata ma uso Maori. Ma ua faamalieina foi itu e lua e oo mai i le taimi nei.
David Tua ma Kevin Barry, Martin Pugh
SamoaTimes: Sa maua tala sa outou talanoa i fafo mai o le faamasinoga, ma Kevin Barry ma Martin Pugh, O le a lea talanoaga, ao le a foi se taunuuga ua oo iai?
David Tua: Faafetai mo le fesili, o le taimi nei, e moni sa fai la matou talanoaga ma uso ia, ona sa taumafai lava ina ia vave foia, ma tuuese atu lea foi faafitauli, ae sei tuu atoatoa le mafaufau, ma sauniuniga mo nisi o taaloga i le lumanai.
O le taimi nei la ua faamalieina uma itu, o au ma laua, ma ua leai foi se faamasinoga, ma o le mutaaga foi lea o lea mataupu, ua lagona ai lava le fiafia loto faafetai, ave foi le viiga i le Atua ona o lona fesoasoani mai ua masuiga malie ai lea mataupu sa matua faafaigata tele i lou mafaufau. E faafetai ai foi i le tapuaiga a nai ou tama, ma tina matutua, aemaise lou atunuu pele.
Samoa Times: O le a sau maitau ia Kevin ma Martin i le taimi sa outou feiloai ai, O iai se lagona toe fia auai mai o ia uso?
David Tua : Ia sao lelei lava, o le tulaga moni lava lena, sa ou iloaina ma ua iai foi ni talanoaga e faatatau i lou taumafai e faamaonia ai le toe fia soso mai, aemaise lava o Kevin, ma e le mafai foi ona galo ni vaega lelei sa galue malosi ai lea uso ma fesoasoani mai i le amataga o lou taumafai.
Atonu e iai se taimi o i luma, ae sei tulituli pea le tulaga ua oo iai mo lenei taimi, ma ua faamagalo atu foi i ia uso.
.
Samoa Times: Ua atoatoa la lou saoloto mai ia faafitauli, ao le a sona taua ia te oe o le faaiuga ua taatia ai nei lea foi mataupu?
David Tua : Ioe, ua matuai ou fiafia lava, ua tele foi le saoloto o lou mafaufau, manatua foi a saoloto le mafaufau, ua mafai foi ona faataunuuina gaioiga a le tino. O le mea moni lava ua fesoasoani tele le faaiuga mo au, aemaise o le taulai o le vaai mo le lumanai, o le a le toe faalavelave ai i au fuafuaga.
Samoa Times : Ua mautinoa e fai se isi taaloga i le faaiuga o le tausaga nei?
David Tua: O le taimi nei ua leai se fusuaga sa fuafua e faia, ao lei maea lenei tausaga. O le mafuaaga ona e polokiki foi le faiga o taaloga fusuaga latou ia. O loo faatali pea i le faatulagaina ua iai nei tama fusu o le lalolagi, o lea faamoemoe e tatau ona maua mai i se taimi o le tausaga nei lava.
E taua tele lea faaiuga aua e fia iloa tonu foi poo le a le tulaga ua ou iai nei mai le faasologa o tama fusu pito i luga, a mautu le vaega lea, ona faamautu ai loa lea o se fusuaga lata mai. E le gata i lea, o le a faatoa iloa ai foi, poo ai ua sauni ma ta taaalo, ia poo le fai loa oni faatosina e saili ai sau paga.
O le taimi nei la oloo vaavaai i le faaiuga o Ianuari poo le masina o Fepuari o le tausaga fou, e tatau ona fai ai se isi fusuaga.
Samoa Times : Sa taua ni alii fusu se toalua, sa fia fetaui ia oe, o Friday the 13, ma le alii o Raham, o ai o le toalua lea e te manao e muamua mai?
David Tua: He he, ia soo se isi lava, aua o loo ou sauni lava mo soo se tasi, o loo faaauau pea lava foi ona ou koleni malosi, ona o le taumafai lava e faatumauina lou malosi e puipuia ai lou tagata,
O loo taulai nei le vaai a le susuga ia David Tua, ma tuu atu lana lagolagosua i le faamoemoe o le Egale Academy, lea o loo tapenaina se fusuaga e saili tupe ai mo le galulolo i Samoa. O lea faamoemoe o le a faataunuuina i le aso 27 o Novema o le tausaga nei.
O loo faaauau foi faigamalaga a le alii fusu i lana tamai mini cars lanu uliuli, oloo tusia ai lona igoa i le pito i luma, ma faalogologo ai poo ai o le a tuu i luga lona lima la te fetaui i se taimi o le tausaga fou.
