E Tauaso le Alofa (17)

E toe faamalo atu i le mamalu o le aufaitau i lenei foi vaiaso. E iai lava le manatu maualuga o loo faapea ona tumau atu le alofa ma le agalelei o le tausiga a lo tatou Atua i lo outou soifua. Malo le lagi e mama, malo foi le folau. Ae o lenei foi ua agai mai ina ia toe sosoo atu le Vaega 17 o le tatou tala faasolo e pei ona masani ai i vaiaso taitasi, ae lelei ona alo mai loa i lau faitau.
Na pau mai le tatou tala i le vaiaso lea na tea i le taimi sa talanoa ai le alii o Taua ma Mativa i le telefoni, ona o le fia iloa e Taua pe moni faamatalaga o lea e feoai Mativa ma le teine o Rosalia.
Na tuu i lalo le telefoni e le tama o Mativa ona ia toe savali ane lea i lona potu ma taoto i lona moega. Ia manatua foi, e valaau ane Taua ae o le taimi lea o loo faasolosolo mafaufauga a le tama i le toe fia foi lea i Samoa, talu ai lona faalumaina ma le maasiasi i le mea na maua atu ai laua e le afafine o le faifeau, le teine o Sinatala.
E ui lava la sa maua atu o loo tau faavevela afi o le Salamasina ma faasauni o le a faaofi i le ava, ae ua mou ai lava ma le fiafia o le tama i se mafutaga fia mafuta ma le teine o Rosalia. O le upu moni, ua avaga le loto o Mativa ia Rosalia ona o ia o se teine lalelei tele.
E leai lava ma se tasi o le aufaipese a le ekalesia ua vaai i ai le tama talu ona taunuu mai i Niu Sila e tutusa ma le tamaitai o Rosalia i le vaai a le tama.
A o faasolosolo mafaufauga o Mativa ma taotooto i lona moega sa toe faafuasei lava ona mamafa mai i lona mafaufau le tulaga e pei ona valaau ane ai le alii o Taua.
Ua fetuleni mai le mau fesili ma ia fesiligia ai nei foi tagata ua fai nei faaupuga, ae i lona talitonuga na o ia, e leai ma se isi ua iloa le va lea o laua, sei vagana ai lava ia ma le teine o Rosalia.
Ua toe mafaufau le tama pe o le a se sootaga vavalalata a le alii o Taua ma Rosalia i se mafutaga faaleuo, ae o lea o loo nofo ma le upu a Rosalia na fai ane ai Taua ia te ia peitai e lei tali i ai.
Ua tele mai le mau fesili i le fegasoloai o mafaufauga o le taulealea, ona tu lea i luga ma taumafai e savalivali solo i totonu o lona potu, sei tau faagalo atu ai nei mau luitau ua saputu mai i lona ulu. Aua o le upu moni, ua amata ona malosi mai faaosoosoga o lagona o le ita ma le loto tiga, talu ai le faaiuga o tala a Taua lea na fai ane i le tama, e vaai i ai i se isi mea e tupu pe afai ae le tautala sao.
I se isi foi itu, ua amata ona tau ita Mativa ia Rosalia aua e foliga mai ua pelogia ma olegia o ia e le teine i ana upu, ae o lea e foliga mai ai lava ua leva ona fai le feoaiga i lo la va ma Taua.
Ua le lelei se mea a Mativa ona ua faomalo manatu o le ita i lona mafaufau, ona ia savali ane loa lea ma fesili ia Sinatala pe na te iloaina le numera o le telefoni e maua i ai Taua.
“Sole, o le a le mea ua sui ai faafuasei ou foliga. E iai se mea ua tupu”? O le fesili ane lea a Sinatala. “Leai, e leai se mea o tupu, ae o lea ou te fia talanoa i le alii lea o Taua”.
“Aisea e te fia talanoa ai fua ia Taua, ae o le a le mea na valaau mai ai lena alii latou ia”? Na fiu Mativa e sisio solo ana faamatalaga ma taumafai e alo alo mamao mai, ae na lei faatafa ai le tui fesili atu e Sinatala, ona e tau mai lava i foliga ma le faiga o tala a le tama e pei e iai se mea o tupu. “Sole, e lelei lou tautala sao mai ma faailoa mai ia te au pe iai se mea o tupu nai lo lou tago i le telefoni ma ou vili loa ia Taua”.
Na saofai i lalo le tama ona faamatala lea o ona lagona ua tutupu ae talu ai le valaau mai a Taua ma suesue ia pe faamata o la feoai a Rosalia. E le gata i lea, o le faamatalaga a Taua e vaai i ai i se isi mea e tupu mai pe afai ae ia iloaina mulimuli e na te le o tautala sao atu ia te ia. “Ia sei vaai lava a laia i ai.
O le a le feau a lena manuki ia gutu umi e suesue ai fua oe. Ae pei a o le tama foi lele e ifo atu i ai teine uma o le nuu ma moomoo atu i ai.
Leaga lava si au matanana e fia tama mamafa tele. Ia tuu ai laia lea faapena. Aua e te vili fua i ai ae sei uma ona ou talanoa lea i ai i se taimi. Ae alu oe e fai au feau masani o le afiafi ma vaai pe o le a se tatou meaai e tatau ona fai toeitiiti taunuu mai le faifeau ma le faletua”.
E fai talanoaga a le vaega lea i luma i le potu malolo, ae o le taimi lea o loo tagi ai Rosalia i totonu o lona potu ma fao i luga o lona moega.
Ua maligi ona loimata ma susu atoa ai le aluga o loo too ai ona mata. Ua matua vaivai lava le loto o le teine ona o lona maasiasi, aemaise ai e le o ia o se tagata e pei o isi teine e tautalaiti solo.
O le mafuaaga foi lea na ala ai ona nofo i le fale o le faifeau ona o ona uiga usitai ma le tausaafia, agamalu ma le poto e fai feau, ae sili ai o lona lelei lea i le tausiga o le va nonofo ma tagata o le nuu ma le aulotu.
E iai lava Aoao sa lauga ane i le falesa o le nuu sa faapea ona moomoo o latou loto ina ia avea Rosalia ma o latou faletua.
Peitai sa mamao ma manatu o le teine lona fia fai toalua aua e lei taitai lona olaga.
E tulitausia i le vaaiga o mata a le tupulaga tama le teine ona o ona uiga ia faatasi ai ma lona lalelei.
Na pau lava lagona ia o loo faatumulia ai lona mafaufau, o lagona o le maasiasi, aua fa ia o le a faapea nei Sinatala o le ituaiga olaga lea o loo ola ai, ae leiloa faatoa tafili saunoa lea o se tasi i lona tino, e ui lava ina e lei uia lualoto o loo taoto ai le penina tautele o loo faananau i ai le toatele.
E ui ina maasiasi le teine, ae sa lagona lona faafetai i le Atua aua o ia na tuu atoa lava lona tagata e pule ai le alii o Mativa. Peitai o lea ua toe faasao mai lona mamalu na semanu a fano ae lei faapaiaina ma ofoina atu mo se tasi e tatau ai i se mafutaga i aso uma o le olaga.
Na tasi le faaiuga a le teine o le a fai, e sili ai ia lona toe foi i lona aiga e nofo ai aua e leai lava se uiga e toe nofo ai i le fale o le faifeau a o lea ua iai lona ila.
E ui lava foi e lei iloa e nisi, ae e fai taliga o aupa. O le tala foi latou ia e fai ona vae. Na tu i luga le teine ona savali ane lea i fafo ma ona loimata ona alu atu lea ma tootuli i luma o Sinatala.
Sei tatou toe taliu atu i Samoa i le teine o Maumea ma le alii o Tala. Na foi Maumea i le latou fale ina ua uma le la talanoaga ma Tala ae ua alu lava lona ulu i le la tuugatala lea ua fai ina ia fetaui i le aso e sosoo ai i le taulaga.
E ui ina sa tele vaega na manumanu ma puipui i ai Maumea, ae ua le mafai foi le alu atu o lona loto i le la fuafuaga ua faataatia aua ua ese foi ona lagona mo Tala.
O le tele o taimi sa iai lona masalosalo i faamatalaga na aumai e uiga i le taulealea, ae o le tele o nei mau tala e le o ni tala lelei.
Peitai e na o le tasi lava le aso lea ua ia vaaia ai le suia faafuasei o Tala ma o se suiga lava e aliali mai ai le tagata ua manumalo mai le leaga e avea ma lelei.
O le aso na sosoo ai na alu ai loa Maumea i Apia ma e ta ane le sefululua ua tu tu i luma tonu lava o le maa faamanatu o tagata na maliliu i le taua lea o loo i luma o le Eleele Fou.
E lei umi lava ona tu tu Maumea i luma o le Eleele Fou ae sosolo ane loa ma le tamai taavale lanumoana a le alii o Tala ona piki loa lea o ia ma faasasao i le faleaiga a Pinati.
Na uma ona faatau a la meaai ona agai ane lea i le faleoloa o Avai ua faatau ai a la vaiinu ona alu loa lea o le la taavale.
O le teine o Maumea, e nofo fua lava i totonu o le taavale ae ua le mapu le ta ta vale o lona fatu.
Ua amata ona susu ona alofivae aua ua liua ona lagona ma ua foliga mai e ese le iuga o le la taligasua lea ua faasauni atu i ai. E fai foi la o le popole o le loto o Maumea ae o le alii o Tala ua leiloa se vaipanoa e oo i ai lona fiafia aua o lea ua maua le avanoa e la te talanoa ai na o laua.
Ua tu mai i ona luma le malu o laufanua o Mulinuu ma le paolo o niu ma laau o loo faamalumalu ai tia o tofafa ai tupu o le atunuu ua lagomau mai tiasa, ona tei ai lea ua faasasao le taavale e aunoa ma se toe faaluafesasi i se isi nofoaga.
Na tei Maumea ina ua ia iloa o Mulinuu lea ua faatutu i ai le la taavale ona faapea ane lea ia Tala. “Sole Tala o fea o le a e ave i ai au i lenei aoauli teatea?”
“Aua e te popole Mea, manaia lava le malu o le laau la ei Mulinuu i le talisua ona ta toe omai ai lea”. “Se sei vaai poo se taligasua lelei lena taligasua Tala i nei tei se isi ua mao aluma”.
Na ata le taulealea ma mimilo le ave o le taavale i le faitotoa e ui atu i le nofoaga o loo iai tia tetele i le penisula, ona paka lea o le taavale ma faapea ane i le teine. “Ia tainane foi o se taligasua sualua pe la ea o ai o iloa mai aua e na o taua lava”.
Faia Pea